Ĩsa 13
13
Mwĩai Ngai Akakany'a Mbavilonĩ
1 #
Ĩsa 47.1-15; Yel 50.1—51.64 Ii nĩ ndeto ngito ila Ngai waneenie ĩũlũ wa Mbavilonĩ, aivuanĩsya Ĩsaia mwana wa Amosu woninĩ:
2Ũngamyai wonany'o kĩĩmanĩ kĩthei kĩte mĩtĩ,
tavyai asikalĩ na wasya mũnene;
moneleelyei na kw'oko,
malike mĩvĩanĩ ya andũ me ndaĩa.
3Nyie mwene nĩnĩyĩaĩĩte andũ makwa ala avathe,
nĩnĩtĩte ngũmbaũ syakwa ila syĩkathĩĩaa nũndũ wa ũsindi wakwa,
nĩ kana syũke kwĩanĩsya kĩla nĩvangĩte kwĩka ũthatunĩ wakwa.
4Ĩthukĩĩsyei kĩlonzo kĩla kĩ iĩmanĩ,
kĩlonzo kĩilyĩ ta kya andũ aingĩ!
Ĩthukĩĩsyei kĩlonzo kya mosumbĩ,
kya nthĩ syũmbanĩte vamwe!
Mwĩai Ngai Mwene Ũtonyi W'onthe
esisya kana nguthu ya asikalĩ ala maendete kaũnĩ nĩyĩyũmbanĩtye.
5Mokĩte kuma nthĩ syĩ kũasa,
maumĩte kũla nthĩ ĩthelele,
Mwĩai Ngai nĩwũkĩte kũmina nthĩ yonthe,
akuĩte mĩio yake ya kaũ ya ũthatu wake.
6 #
Yoe 1.15
Ĩai! Nĩkwĩthĩwa mũthenya wa Mwĩai Ngai wĩ vakuvĩ;
mũthenya ũsu ũkooka ta wanangĩko kuma kwa Mwene Ũtonyi W'onthe!
7Kwoou moko ma andũ onthe makaleela,
na kĩla mũndũ aikwatwa nĩ w'ĩa mwingĩ mũno.
8Andũ onthe makasaanĩw'a,
makakwatwa nĩ w'ĩa na kyalya,
makeethĩwa na woo ta wa mũndũ mũka ũkwaũnya.
Makasiany'a maseng'ete,
na mothyũ moo makeethĩwa mausũĩte nthoni.
9Mũthenya wa Mwĩai Ngai nĩwũkĩte,
mũthenya wa thĩna mwingĩ, wĩ na ũthatu na woo mwingĩ.
Ũkatuma nthĩ yĩthĩwa yĩ nthei,
na kũmina eki ma naĩ ala me nthĩnĩ wayo.
10 #
Esek 32.7; Mat 24.29; Mk 13.24-25; Lk 21.15; Ũvu 6.12-13 Ndata na syĩndũ ila syumasya kyeni sya matunĩ,
iikaumya kyeni kyasyo;
syũa yĩkauma yĩna kĩvindu,
na mwei ndũkaumya kyeni kyaw'o.
11Mwĩai Ngai easya atĩĩ,
“Ngakany'a nthĩ nũndũ wa naĩ syayo,
na ala athũku nũndũ wa mavĩtyo moo.
Ngamina ũng'endu wa ala mekathĩĩaa,
na mĩng'athĩlĩĩlyo ya ala mate tei.
12Ngatuma andũ methĩwa me vinya kwoneka o na mbee wa thaavu ũla mũseo,
ĩĩ, makeethĩwa me vinya kwoneka o na mbee wa thaavu kuma Ovili.
13Ngatuma ĩtu yĩtetema,
nayo nthĩ ĩkathingitha yume vala yĩthĩawa,
nũndũ wa ũthatu wakwa nyie Mwĩai Ngai Mwene Ũtonyi W'onthe,
mũthenyanĩ ũsu wa ũthatu wakwa mũnene.
14“Ta ndaatai ĩkũsyĩmwa,
kana ta malondu mate na mũĩthi,
kĩla mũndũ akasyoka andũnĩ make,
na kĩla mũndũ akakĩa athi nthĩ ĩla yake mwene.
15Mũndũ o na wĩva ũla wĩoneka akatonywa mũkuthũ,
na ũla wĩkwatwa akooawa na ũvyũ.
16Tũũkenge twoo tũkang'atanganw'a masyaĩĩsye tũtilĩkange ilungu;
nyũmba syoo ikatavwa mĩio na aka moo makakwatwa na vinya.
17“Nĩngũthangaasya Ametia mamavithũkĩe,
Ametia ala matatalaa silĩva ta kĩndũ,
o na mayendeeaw'a nĩ thaavu.
18Makooaa anake na maangi moo,
maikew'ĩa tũũkenge tei,
o na maikew'ĩa syana ĩnee.
19 #
Mwa 19.24
Mbavilonĩ ĩla nĩyo ũsumbĩ ũla mwanake kwĩ mosumbĩ ala angĩ onthe,
ĩla andũ mayo mekathĩĩaa nayo,
ĩkeethĩwa ĩilyĩ ta Sondomu na Ngomola ila nyie Ngai naanangie.
20Ndũa ĩsu ndĩkatũwa nĩ mũndũ,
o na ndĩkekalwa nĩ andũ tene na tene;
Vai Mũalavu ũkamba ĩeema yake vo,
o na vai mũĩthi ũkatindisya ndĩthya yake ya mbũi na malondu vo.
21 #
Ĩsa 34.14; Nzev 2.14; Ũvu 18.2 Ĩndĩ nyamũ mbai sya kĩthekanĩ ikatindiaa vo,
na nyũmba sya ndũa ĩsu ikausũa ndunduuli.
Nyaa ikatũa vo,
na mbũi sya kĩthekanĩ ikatũvĩaa vo.
22Mbiti ikaambĩa nyũmbanĩ syayo ndũmu,
na mbĩwa iikũma syĩ nyũmbanĩ nzeo sya kĩ-ũsumbĩ.
Ĩvinda ya kwanangwa kwa ndũa ya Mbavilonĩ yĩ vakuvĩ,
na mĩthenya ya yo ĩkilĩlye kũthela.”
Currently Selected:
Ĩsa 13: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
