Esa 8

Andũ ala Masyokie kuma kũla Matwaĩtwe me Atave

1Aa nĩ masyĩtwa ma atongoi ma mĩsyĩ, na mosyaanĩo ma andũ ala twasyokie ĩmwe kuma Mbavilonĩ kũla twatwaĩtwe twĩ atave, ĩvindanĩ ya Mũsumbĩ Alitasasita. 2Ngelisoni wa mũsyĩ wa Vineasi, Ndanieli wa mũsyĩ wa Ĩthamali, Atusi wa mũsyĩ wa Ndeviti. 3Atusi aĩ mwana wa Sekania. Nzekalia wa mũsyĩ wa Valosi; Nzekalia aĩ vamwe na aũme ĩana na mĩongo ĩtano ma mũsyĩ wake. 4Elionei mwana wa Nzelaia wa mũsyĩ wa Vaathi-moavi; Elionei aĩ vamwe na aũme maana elĩ ma mũsyĩ wake. 5Sekania mwana wa Yaanzieli wa mũsyĩ wa Nzatũ; Sekania aĩ vamwe na aũme maana atatũ ma mũsyĩ wake. 6Eveti mwana wa Yonathani wa mũsyĩ wa Atinii; Eveti aĩ vamwe na aũme mĩongo ĩtano ma mũsyĩ wake. 7Yesaia mwana wa Athalia wa mũsyĩ wa Elamu; Yesaia aĩ vamwe na aũme mĩongo mũonza ma mũsyĩ wake. 8Nzevatia mwana wa Mikaeli wa mũsyĩ wa Sevatia; Nzevatia aĩ vamwe na aũme mĩongo nyanya ma mũsyĩ wake. 9Ovatia mwana wa Yeieli wa mũsyĩ wa Yoavu; Ovatia aĩ vamwe na aũme maana elĩ na ĩkũmi na nyanya ma mũsyĩ wake. 10Selomithi mwana wa Yosivia wa mũsyĩ wa Mbani; Selomithi aĩ vamwe na aũme ĩana na mĩongo thanthatũ ma mũsyĩ wake. 11Nzekalia mwana wa Mbevai wa mũsyĩ wa Mbevai; Nzekalia aĩ vamwe na aũme mĩongo ĩlĩ na nyanya ma mũsyĩ wake. 12Yoanani mwana wa Akatani wa mũsyĩ wa Asikati; Yoanani aĩ vamwe na aũme ĩana na ĩkũmi ma mũsyĩ wake. 13Eliveleti, Yeueli, na Semaya ma mũsyĩ wa Atonikamu; maĩ vamwe na aũme mĩongo thanthatũ mũsyĩ woo; aa mesie kũka ĩtina. 14Uthai na Nzakuli andũ ma mũsyĩ wa Mbikivai; maĩ vamwe na aũme mĩongo mũonza ma mũsyĩ woo.

Esala Aimantha Alivai ma Kũthũkũma Ĩkalũnĩ

15Nĩnoombanĩisye nguthu ĩsu yonthe ũsĩnĩ ũla ũtheete nginya ndũanĩ ya Aava, na twekala vau mĩthenya ĩtatũ. Nĩnamanyie kana vaĩ athembi nguthunĩ ĩsu, ĩndĩ vayaĩ Alivai. 16Nĩvo ĩndĩ natũmanie Elieseli, Alieli, Semaia, Elinathani, Yalivu, Elinathani, Nathani, Nzekalia, na Mesulamu, ala maĩ atongoi. O ta ũu nĩnatũmanie Yoialivu na Elinathani ala maĩ amanyĩsya. 17Nĩnatũmie andũ asu onthe vala ve Ito, mũnene wa andũ ala maĩ Kasivia, makamũkũlye na maikũlya ala maĩ ngwatanĩo nake, athũkũmi ma Ĩkalũnĩ, atũtũmĩe andũ moke kũthũkũma Ngai Ĩkalũnĩ. 18Nĩkwĩthĩwa twaĩ na mumo wa Ngai, nĩmatũtũmĩie Selevia, mũndũ waĩ na ũmanyi, Mũlivai kuma mũsyĩnĩ wa Mali. Selevia ookanisye na ana make na ana-a-ĩthe ĩkũmi na nyanya. 19O ta ũu nĩmatũtũmĩie Asavia na Yesaia ma mbaĩ ya Melali. Mookanisye na andũ mĩongo ĩlĩ ma mũsyĩ woo. 20Vamwe na asu, vaĩ athũkũmi ma Ĩkalũ maana elĩ na mĩongo ĩlĩ, ala aaũmae moo manyuvĩtwe nĩ Mũsumbĩ Ndeviti e na anini make, nĩ kana matetheeasye Alivai. Onthe maandĩkĩtwe kĩla mũndũ na ĩsyĩtwa yake.

Esala Aitongoesya Andũ Mavoye na Kũtĩĩa Kũya

21Twĩ vau ũsĩnĩ wa Aava, natavanisye tũtĩĩe kũya, nĩ kana twĩnyivye mbee wa Ngai na tũimũkũlya atũtongoesye kyalonĩ kitũ, na aitũsũvĩa vamwe na syana sitũ na syĩndũ sitũ. 22Nĩneewie nthoni sya kũkũlya mũsumbĩ atũnenge asikalĩ, na asikalĩ malĩsĩte mbalasinĩ nĩ kana matũsũvĩe kuma amaithanĩ maitũ twĩ kyalonĩ, nũndũ naĩ nĩneea mũsumbĩ kana Ngai waitũ aathimaa onthe ala mamwĩkwatasya, ĩndĩ ndendeeaw'a nĩ mũndũ o na wĩva ũla ũleanaa nake na nũmũkanasya.

23Kwoou nĩtwatĩĩie kũya na twavoya Ngai atũsũvĩe. Ngai nĩweewie mboya sitũ.

Mĩthĩnzĩo kwondũ wa Ĩkalũ

24Nĩvo ĩndĩ katĩ wa athembi ala maĩ atongoi nanyuvie athembi ĩkũmi na elĩ: Selevia, Asavia na athembi angĩ ĩkũmi. 25Nĩnamathimĩie nthembo ya silĩva, thaavu, na mĩio ĩla mũsumbĩ, atai make, anini make na andũ onthe ma Ĩsilaeli manenganĩte nĩ kana itũmĩwe Ĩkalũnĩ. 26Ii nĩsyo syĩndũ ila nathimie: Kĩlo ngili mĩongo ĩlĩ na ilĩ sya silĩva, mĩio ĩana ĩseũvĩtw'e na silĩva yĩna ũito wa kĩlo mĩongo mũonza, kĩlo ngili itatũ na maana ana sya thaavu, 27na mbakũli mĩongo ĩlĩ iseũvĩtw'e na thaavu syĩ na ũito wa kĩlo nyanya na ngulamu maana ana. O ta ũu vaĩ mbakũli ilĩ iseũvĩtw'e na kyũma kĩtawa mbulonzi nzeo ngute, syĩ na thooa wĩanene na wa mbakũli sya thaavu.

28Nĩnaneenie namo namea atĩĩ, “Inyw'ĩ vamwe na syĩndũ ii mwĩ avathe kwondũ wa Mwĩai Ngai. Silĩva na thaavu nĩ nthembo yumĩtw'e na ngoo ya kwenda kwondũ wa Mwĩai Ngai, Ngai wa aaũmae menyu. 29Sũvĩai syĩndũ isu nginya mũkavike Ĩkalũnĩ. Mwĩ nyũmbanĩ ya athembi, ithimei na mũyĩinenga atongoi ma athembi, ma Alivai na atongoi ma andũ ma Ĩsilaeli ala me Yelũsalemu.” 30Kwoou athembi na Alivai nĩmoosie silĩva, thaavu na mĩio yonthe ĩla mathimĩiwe, nĩ kana maitwae Yelũsalemu Ĩkalũnĩ ya Ngai waitũ.

Kũsyoka Yelũsalemu

31Twaumie Ũsĩnĩ wa Aava tũthi Yelũsalemu mũthenyanĩ wa ĩkũmi na ilĩ wa mwei wa mbee. Ngai waitũ aĩ vamwe naitũ, na atũsũvĩa tũikavithũkĩwe nĩ amaitha kana tũkwatwe nĩ andũ twĩ kyalonĩ. 32Nĩtwavikie Yelũsalemu na twekala vo mĩthenya ĩtatũ. 33Mũthenyanĩ wa kana nĩtwaendie Ĩkalũnĩ, twathima silĩva, thaavu na ĩla mĩio na twainenga mũthembi Melemothi mwana wa Ulia. Melemothi aĩ vamwe na Eleasali mwana wa Vineasi na Alivai elĩ: Yosavati mwana wa Yesua, na Noatia mwana wa Mbinui. 34Syĩndũ syonthe nĩsyatalilwe na syathimwa na ũito wasyo waandĩkwa.

35Andũ onthe ala maumie kũla matwaĩtwe me atave nĩmathembeie Mwĩai Ngai wa Ĩsilaeli nthembo sya kũvĩvw'a. Mathembie tũsalũ ĩkũmi na twĩlĩ kwondũ wa andũ onthe ma Ĩsilaeli, ndũũme mĩongo kenda na thanthatũ, na tũtena twa malondu mĩongo mũonza na mũonza. O ta ũu nĩmathembie nthenge ĩkũmi na ilĩ syĩthĩwe nthembo kwondũ wa ũekeo wa naĩ. Nyamũ isu syonthe syaĩ nthembo ya kũvĩvw'a ya Mwĩai Ngai. 36O ta ũu nĩmanengie anini ma mũsumbĩ, na makavana ala maũngamĩe kĩsio kya nthĩ kĩla kĩ ngalĩko ya wumĩlonĩ wa syũa motw'ĩo ala manengetwe nĩ mũsumbĩ, namo maumya ũtethyo kwondũ wa andũ na kwondũ wa Ĩkalũ.

Currently Selected:

Esa 8: KAMBA

Highlight

Copy

Compare