Esa 10
10
Andũ ma Ĩsilaeli Maieka Kũtwaa Aka ma Mbaĩ ingĩ
1Yĩla Esala waendee kũvoya na kumbũla, aĩĩte na akavalũka mbee wa Ĩkalũ, nguthu nene ya andũ ma Ĩsilaeli: Aũme, aka na syana, nĩmaũngamie mamũthyũlũlũkĩte o namo maĩĩte me na woo mwingĩ. 2Nĩvo ĩndĩ Sekania mwana wa Yeieli, wa mũsyĩ wa Elamu weeie Esala atĩĩ, “Nĩtwĩthĩĩtwe tũte aĩkĩĩku kwa Ngai waitũ nũndũ wa kũtwaa aka ma nthĩ ingĩ, ĩndĩ yu o na ũu wĩ o vo, ve o wĩkwatyo kwondũ wa andũ ma Ĩsilaeli. 3Yu nĩtũseũvye ũtianĩo na Ngai waitũ kana nĩtũũlũngya iveti ii na syana syasyo. Nĩtũkwĩka ũndũ we na andũ ala angĩ manengete mĩao ya Ngai ndaĩa mũũtũtavya. Twĩĩka ũndũ mĩao ya Ngai ĩkwasya. 4Ũkĩla wĩke ũndũ, nũndũ ũũ nĩ wĩa waku, nĩtũũkũtetheesya, ĩthĩwa na ũkũmbaũ na ũyĩka ũu.”
5Nĩvo ĩndĩ Esala waũngamie na atuma atongoi ma athembi, ma Alivai na ma andũ ala angĩ ma Ĩsilaeli mevĩta kana nĩmekwĩanĩsya maũndũ ala Sekania wawetie. Kwoou nĩmeevĩtie. 6Esala nĩwaumie vala waĩ mbee wa Ĩkalũ, na athi nyũmba kwa Yeoanani mwana wa Eliasivu vala wekalile ũtukũ ũsu. Ndaaya kana akanyw'a kĩndũ; aendeeie kũĩa nũndũ andũ ala maumie kũla matwaĩtwe me atave maendeeie kwĩthĩwa mate aĩkĩĩku.
7Nĩvo ĩndĩ ũtũmani wanenganiwe ũtwaĩwe andũ onthe ma Yuta na ma Yelũsalemu, ala masyokie kuma kũla matwaĩtwe me atave, mewe nĩmoke mombanĩe Yelũsalemu. 8Atongoi moo nĩmeeaĩte makasya kana ũla ũkũlea kũka mĩthenya ĩtatũ ĩte mĩthelu, syĩndũ syake syonthe nĩkwoswa nake mwene ayumw'a ngwatanĩonĩ ya ala masyokete kuma kũla matwaĩtwe me atave. 9Mĩthenya ĩsu ĩtatũ ĩtanathela, mũthenyanĩ wa mĩongo ĩlĩ wa mwei wa kenda, andũ onthe ala matwĩe kĩsionĩ kya nthĩ ya Yuta na ya Mbengyameni, nĩmookie Yelũsalemu na moombanĩa kĩwanzanĩ kya Ĩkalũ. Andũ nĩmatetemaa nũndũ wa mbua nene mũno ĩla yauĩte, na nũndũ wa kĩla kyatumĩte mombana.
10Nĩvo ĩndĩ mũthembi Esala waũngamie na aneena namo ayasya atĩĩ, “Nĩmwĩthĩĩtwe mũte aĩkĩĩku, nĩmũtwaĩte aka ma nthĩ ingĩ na kwa nzĩa ĩsu mũkongeleela mavĩtyo ma Ĩsilaeli. 11Yu ĩndĩ umbũlĩlai Mwĩai Ngai, Ngai wa aaũmae menyu na mũyĩka kwenda kwake. Ĩvathanei na andũ ala mamũthyũlũlũkĩte, na mũiekana na aka ma nthĩ ingĩ ala mũtwaĩte.”
12Andũ nĩmasũngĩie na wasya mũnene masya atĩĩ, “Ĩĩ, nĩw'o. No nginya twĩke ũndũ wasya. 13Ĩndĩ vaa twĩ aingĩ, na nĩkuĩte mũno. Tũitonya kũendeea kũũngama nza. Ũũ ti ũndũ ũtonya kwĩkwa na mũthenya ũmwe kana ĩlĩ, nũndũ aingĩ maitũ nĩtwĩkĩte naĩ ĩsu. 14Atongoi maitũ nĩmaũngame vandũ vaitũ ithyonthe. Mũndũ o na wĩva kuma ndũanĩ sitũ syonthe, ũla ũtwaĩte mũndũ mũka kuma nthĩ ingĩ, nĩoke ĩvindanĩ yĩla ũvangĩĩwe na ayũkany'a na atumĩa na asili ma ndũa yake. Kwa nzĩa ĩsu, woo ũla Ngai wĩ naw'o nũndũ wa ũndũ ũũ nũũvetangwa.” 15Vai mũndũ waaleana na woni ũsu ate o Yonathani mwana wa Asaeli, na Yaseia mwana wa Tikiva, ala matetheew'e nĩ Mesulamu na Savethai ũla waĩ Mũlivai.
16Andũ ala masyokete kuma kũla matwaĩtwe me atave nĩmeetĩkĩlile woni ũsu. Mũthembi Esala nĩwanyuvie andũ amwe katĩ wa atongoi ma mĩsyĩ, ũmwe kuma kĩla mũsyĩ. Nĩwaandĩkie masyĩtwa moo. Mũthenyanĩ wa mbee, mwei wa ĩkũmi nĩmambĩĩie kũsũanĩa ũndũ ũsu. 17Mũthenya wa mbee wa mwei wa mbee ũivika, atongoi asu nĩmaminanĩte na aũme onthe ala matwaĩte aka kuma nthĩ ingĩ.
Aũme Ala matwaĩte Aka ma Nthĩ ingĩ
18Katĩ wa nzyawa sya athembi aũme aa nĩmo matwaĩte aka ma nthĩ ingĩ:
Kuma nzyawanĩ sya Yesua mwana wa Yeosataki na ana-a-ĩthe make: Maaseia, Elieseli, Yalivu na Ngetalia. 19Aũme asu nĩmathanie kũlũngya iveti syoo na maumya nthembo ya ndũũme nũndũ wa naĩ syoo.
20Aũme ma nzyawa sya Imeli maĩ Aanani na Sevatia.
21Ma nzyawa sya Alimu maĩ Maaseia, Eliya, Semaia, Yeieli na Usia.
22Ma nzyawa sya Vasuli maĩ Elioenai, Maaseia Ĩsumaeli, Nethaneli, Yosavati na Elasa.
23Katĩ wa Alivai vaĩ Yosavati, Simei, Kelaia (ũla kwa ĩsyĩtwa yĩngĩ wetawa Kelita), Vethaia, Yuta na Elieseli.
24Katĩ wa Aini vaĩ Eliasivu. Katĩ wa asikalĩ ala masungaa mĩvĩa ya Ĩkalũ vaĩ Salumu, Telemu na Uli.
25Katĩ wa andũ ala angĩ ma Ĩsilaeli aũme ma nzyawa sya Valosi maĩ Lamia, Isia, Malikiya, Miyamini, Eleasali, Malikiya na Mbenaia.
26Ma nzyawa sya Elamu maĩ Matania, Nzekalia, Yeieli, Avati, Yelemothi na Eliya.
27Ma nzyawa sya Nzatũ maĩ Elioenai, Eliasivu, Matania, Yelemothi, Nzavati na Asisa.
28Ma nzyawa sya Mbevai maĩ Yeoanani, Aanania, Nzavai na Athilai.
29Ma nzyawa sya Mbani maĩ Mesulamu, Maluku, Ataia, Yasuvu, Seali na Yelemothi.
30Ma nzyawa sya Vaathi-moavi maĩ Atena, Kelali, Mbenaia, Maaseia, Matania, Mbesaleli, Mbinui na Manase.
31Ma nzyawa sya Alimu maĩ Elieseli, Isiya, Maalikiya, Semaia, Simeoni,
32Mbengyameni, Maluku na Semalia.
33Ma nzyawa sya Asumu maĩ Matenai, Matatha, Nzavati, Eliveleti, Yelemai, Manase na Simei.
34Ma nzyawa sya Mbani maĩ Maatai, Amilamu, Ueli, 35Mbenaia, Mbeteia, Kelui, 36Vania, Melemothi, Eliasivu, 37Metania, Matenai na Yaasu.
38Ma nzyawa sya Mbinui maĩ Simei, 39Selemia, Nathani, Ataia, 40Makinatevai, Sasai, Sialai, 41Asaleli, Selemia, Semalia, 42Salumu, Amalia na Yosevu.
43Ma nzyawa sya Nevo maĩ Yeieli, Matithia, Nzavati, Nzevina, Yatai, Yoeli na Mbenaia.
44Aũme asu onthe nĩmatwaĩte aka ma nthĩ ingĩ. Nĩmalũngilye iveti isu vamwe na syana syoo.
Currently Selected:
Esa 10: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
