Esa 1

Kulusu Ayumya Mwĩao Andũ ala maĩ Atave Masyoke

1 # Yel 25.11; 29.10 Mwakanĩ wa mbee wa kũsumbĩka kwa Kulusu mũsumbĩ wa Velisia, Mwĩai Ngai nĩwatumie ũndũ waneenete kwĩsĩla kwa mwathani Yelemia wĩanĩw'a. Mwĩai Ngai nĩwatumie Mũsumbĩ Kulusu aumya mwĩao ũũ, na atũmana ũthi ũkasomwe na wasya mũnene kĩla vandũ ũsumbĩnĩ wake:

2 # Ĩsa 44.28 “Mũsumbĩ Kulusu wa Velisia easya atĩĩ, ‘Mwĩai Ngai, Ngai wa Ĩtu nũnengete mosumbĩ onthe ĩũlũ wa nthĩ, na akanyuva nĩmwakĩe Ĩkalũ Yelũsalemu nthĩ ya Yuta. 3Ngai nĩethĩwe nenyu inyw'onthe, inyw'ĩ andũ make. Endai Yelũsalemu na mũyaka ĩngĩ Ĩkalũ ya Mwĩai Ngai, Ngai wa Ĩsilaeli, Ngai ũla ũthaithĩawa Yelũsalemu. 4Andũ make ala me nthĩ ya ũeninĩ me atave me vala maĩ nĩmatetheew'e nĩ atũi moo. Nĩmamanenge silĩva na thaavu, syĩndũ sya kũtũmĩa, indo, o vamwe na nthembo ila syumaw'a na ngoo ya kwenda sya kũthi kumĩsya Ĩkalũnĩ ya Ngai yĩla yĩ Yelũsalemu.’ ”

5Nĩvo ĩndĩ atongoi ma mĩsyĩ ya mbaĩ ya Yuta na ya Mbengyameni, athembi na Alivai na andũ ala angĩ onthe ala Ngai wathangaaĩtye meeyũmbanisye, nĩ kana mathi makake ĩngĩ Ĩkalũ ya Mwĩai Ngai yĩla yĩ Yelũsalemu. 6Atũi moo onthe nĩmamatetheeisye na syĩndũ iseũvĩtw'e na silĩva na thaavu, syĩndũ sya kũtũmĩa, na indo na mĩthĩnzĩo ĩngĩ ya vata, o vamwe na syĩndũ syonthe ila syaumĩtw'e na ngoo ya kwenda. 7O vamwe na ũu, Mũsumbĩ Kulusu nĩwamatũngĩie mĩio ya Ĩkalũ ĩla Mũsumbĩ Nevukatinesa woosete Ĩkalũnĩ yĩla yĩ Yelũsalemu, na akamia ĩkalũnĩ ya ngai syake. 8Kulusu nĩwanengie Mithiletathi mũnene wa kĩnandũ kya kĩ-ũsumbĩ mĩio ĩsu, nake Mithiletathi amĩtala na amĩnenga Sesivasali ngavana wa Yuta. 9Ũũ nĩw'o ũtalo wa mĩio ĩsu:

Masaani mĩongo ĩtatũ ma thaavu;

masaani ngili ma silĩva;

masaani angĩ mĩongo ilĩ na kenda.

10Mbakũli mĩongo ĩtatũ sya thaavu;

mbakũli nini maana ana na ĩkũmi sya silĩva na mĩio ĩngĩ ngili ĩmwe.

11Ũtalo wa mĩio yonthe ya silĩva na ya thaavu waĩ ngili itano na maana ana. Sesivasali akuie syĩndũ isu syonthe ĩvindanĩ yĩla andũ ala maĩ atave maumie Mbavilonĩ maendete Yelũsalemu.

Currently Selected:

Esa 1: KAMBA

Highlight

Copy

Compare