Est-Kĩk 4
4
Molitekai Aikũlya Ũtethyo Kuma Kũla kwĩ Esita
1Yĩla Molitekai wamanyie ĩũlũ wa maũndũ onthe ala meekĩkĩte, nĩwatembũangie ngũa syake nĩ woo. Nĩwasyokie eekĩa ngũa ngaamu sya makunia, na eeyũmbanga mũu mũtwe na avĩtĩla ndũanĩ aĩĩte kĩĩo kĩ woo na wasya mũnene. 2Nĩwaendie nginya mũomonĩ wa mũvĩa wa nyũmba ya mũsumbĩ, nũndũ vai mũndũ waĩ atonya kũlika kwa mũsumbĩ ekĩĩte ngũa ngaamu sya makunia.
3Nthĩnĩ wa kĩla kĩsio vala ũtw'ĩo ũsu wa mũsumbĩ wavikaa, nĩveethĩawa kĩĩo na kyeva kĩnene andũnĩ ma mbaĩ ya Ayuti. O ta ũu nĩmatĩĩaa kũya, makaĩa kĩĩo kĩ woo na wasya mũnene, na aingĩ moo mayĩkĩa ngũa ngaamu sya makunia na kwĩyiliitya mũunĩ.
4Yĩla athũkũmi ala ma aka na ala angĩ maĩ aũme avakũe mamũtavisye Esita maũndũ ala Molitekai waendee kwĩka, kĩveti kĩu kya mũsumbĩ nĩkyeethĩiwe na kĩũũyũ kĩnene. Nĩkyanenganie ngũa itwaĩwe Molitekai nĩ kana aumye ngũa ngaamu sya makunia, ĩndĩ ailea vyũ. 5Nĩvo ĩndĩ Esita watũmanie Athaki, ũmwe wa ala aũme avakũe ma mũsumbĩ, ũla wanyuvĩtwe nĩ mũsumbĩ ethĩwe mũthũkũmi wake, aende vala ve Molitekai akamanye nĩ kyaũ kĩendee na kyumanĩte na ũndũ mwaũ. 6Athaki nĩwaendie vala ve Molitekai mũomonĩ wa mũvĩa wa kũlika nyũmbanĩ ya mũsumbĩ ĩla yaĩ ndũanĩ katĩ. 7Molitekai nĩwamũtavisye maũndũ onthe ala meekĩkĩte, na mbesa syonthe ila Amani wathanĩte kũnengane syĩkĩwe kĩnandũnĩ kya mũsumbĩ nĩ kana Ayuti onthe moawe. 8O ta ũu Molitekai nĩwanengie Athaki valũa ĩla yaandĩkĩtwe ũtw'ĩo ũla wanenganĩiwe vau Susa, ũeleetye kana Ayuti onthe nĩmaĩlĩte kũawa. Molitekai nĩwamũkũlilye nĩ kana atwaĩe Esita valũa ĩsu, na aimũelesya maũndũ asu na kũmũkũlya athi akesũvane kwa mũsumbĩ nĩ kana andũ ma mbaĩ yake mew'ĩwe tei. 9Athaki nĩwaendie atavya Esita maũndũ onthe ala wataviw'e nĩ Molitekai. 10Esita nĩwatũmie Athaki kũla kwĩ Molitekai akamwĩe atĩĩ, 11“Athũkũmi onthe ma mũsumbĩ na andũ ala angĩ onthe mekalaa isionĩ ila syĩ ungu wa ũsumbĩ wake, nĩmesĩ kana ve mwĩao ũmwe tũ, ũla waasya kana mũndũ-ũme kana mũndũ mũka o na wĩva, ũla wĩthi alike nyũmbanĩ ya mũsumbĩ vala wĩkalaa atetĩtwe vo, akooawa. Mũndũ ũla ũtakoawa no ũla wĩlika vo na mũsumbĩ ayũkĩlya ĩla ndata yake ya thaavu kwonany'a kana ũsu ndaĩlĩte kũawa. Yu mĩthenya mĩongo ĩtatũ nĩ mĩthelu nyie ndalika kwa mũsumbĩ, nũndũ ndaandũmana nĩthi vo.”
12Yĩla Molitekai wakwatie ũtũmani wa Esita, 13nĩwanenganie ũsũngĩo ũũ, “Ndũkasũanĩe kana nũndũ wĩ nyũmbanĩ ya mũsumbĩ, no ue wĩ weka ũkavonoka katĩ wa Ayuti ala angĩ onthe. 14Nũndũ ethĩwa ũkavindya ĩvinda ta yĩĩ, ũkiakisyo na ũtangĩĩo wa Ayuti ũkauma kũndũ kũngĩ, ĩndĩ we na andũ ma mũsyĩ wenyu mũkooawa. Nũũ wĩsĩ kana ndũneetw'ĩkĩthw'a mũka wa mũsumbĩ kwondũ wa ĩvinda ta yĩĩ twĩ nayo.”
15Nĩvo ĩndĩ nake Esita wanenganie ũsũngĩo ũũ ũtwaĩwe Molitekai: 16“Enda wũmbany'e Ayuti onthe ala me ndũanĩ ya Susa, na mũitĩĩa kũya na kũvoya nũndũ wakwa. Mũikaye kana kũnyw'a kĩndũ vandũ va mĩthenya ĩtatũ, ũtukũ na mũthenya. Nakwa vamwe na athũkũmi makwa ma aka nĩtũũtĩĩa kũya o ta ũu. Ĩtina wa ũu, ngathi vala ve mũsumbĩ, o na kau ũndũ ũsu ndwosana na mĩao, na ĩndĩ ethĩwa nĩ kũkw'a ngakw'a.” 17Molitekai nĩwaendie na eeka maũndũ onthe ala Esita wamũtavisye.
Mboya ya Molitekai
17a Nĩvo ĩndĩ Molitekai wamũvoyie Mwĩai aililikana maũndũ ala Mwĩai weekĩte ĩvinda ya tene. Nĩwavoyie asya atĩĩ:
17b We Mwĩai! We ũla ũsumbĩkaa syĩndũ syonthe,
syĩndũ syonthe ila woombie syĩ ungu wa ũtonyi waku,
na vai mũndũ ũtonya ũkũsiĩĩa ethĩwa nũkwenda kũtangĩĩa Ĩsilaeli.
17c We nĩwoombie ĩtu na nthĩ,
na syĩndũ syonthe sya kũseng'ya ila syĩ kũũ nthĩ.
Nue Mwĩai wa syonthe,
na vai mũndũ ũtonya ũkũsiĩĩa we Mwĩai.
17d We Mwĩai nĩwĩsĩ maũndũ onthe; nĩwĩsĩ kana ndinaalea kũtulĩlya Amani ndu, ũla mũndũ wĩ ngathĩĩo, nũndũ naĩ na ngũlũ, ngathĩĩo, kana nũndũ wa kwenda nĩnengwe ndaĩa. Nĩthĩwa naĩ nĩyũmbanĩtye kũmumunya nyaĩĩ sya Amani nĩ kana nĩtangĩĩe Ĩsilaeli! 17eĨndĩ nĩnaleile kũmũtulĩlya ndu nĩ kana ndikataĩe mũndũ vandũ va kũtaĩa Ngai. Ndikatulĩlya ndu mũndũ o na wĩva, ate o we Mwĩai wakwa no ue nĩtulĩlasya ndu, na ndikekaa ũu nĩna ngathĩĩo. 17fNa ĩndĩ yu we Mwĩai Ngai Mũsumbĩ, Ngai wa Avalaamu, tangĩĩa andũ maku. Amaitha maitũ memantha mwanya matũmine; meenda kũtũmina ithyĩ ũtiĩwa waku wa kuma tene. 17gNdũkaekane na andũ maku ala woovoisye kuma nthĩ ya Misili matw'ĩke maku. 17h#Kuma 3.6 Ĩw'a mboya yakwa, na ũitwĩw'ĩa tei ithyĩ ũtiĩwa waku. Ame Mwĩai, alyũla kĩĩo kitũ kĩtw'ĩke ũtanu, nĩ kana twĩkale thayũ na tũikwinĩaa mbathi sya ũkũtaĩa. Ndũkatũmine ithyĩ ala tũkũtaĩaa.”
17i Andũ onthe ma Ĩsilaeli nĩmaĩie mũno nũndũ nĩmamanyie kana makilĩlye kũawa.
Mboya ya Esita
17k Esita mũka wa mũsumbĩ e na kĩũũyũ kingĩ nĩwaendie mbee wa Mwĩai amũvoye. Nĩwaumisye ngũa syake nzeo mũno na eekĩa ngũa ila syeekĩawa ĩvinda ya kyeva na woo, na vandũ va kwĩvaka mauta ma thooa mũnene nĩweeyũmbie mũu na kyaa mũtwe. Nĩweekie ũndũ ũtonya nĩ kana mwĩĩ wake woneke ũte mwaĩlu, na aeka nzw'ĩĩ yake yĩ nthokoanu ĩniine mwĩĩnĩ wake ũla wendete kwanakavya mũno. Esita nĩwavoyie Mwĩai, Ngai wa Ĩsilaeli ayasya atĩĩ, 17l“Ame Mwĩai wakwa, we wĩ weka nue Mũsumbĩ waitũ. Ndethye nũndũ nĩ nyioka na ndi na mũndũ wa kũndethya ateo we, na ngilĩlye kũlika mũisyonĩ. 17mKuma nĩ mũnini nĩneewie andũ ma mbaĩ yakwa mayasya kana we Mwĩai nĩwanyuvie andũ ma Ĩsilaeli kuma mbaĩnĩ ila ingĩ syonthe, na wanyuva aaũmae maitũ kuma kwa aaĩthe moo nĩ kana matw'ĩke andũ maku tene na tene, na kana nĩwamekie maũndũ onthe ala wamathie. 17nĨndĩ yu nĩtwĩkĩte naĩ tũkaũvĩtĩsya, naku nũtũnenganĩte ũtonyinĩ wa amaitha maitũ, nĩkwĩthĩwa nĩtwathaithie ngai syoo. We Mwĩai wĩ mũlũngalu. 17oĨndĩ yu amaitha maitũ mayĩanĩwe nĩkwona twĩ ũkombonĩ mũthũku. Maseũvĩtye ũtianĩo na ngai syoo, mavetange mĩao ĩla ũnenganĩte na kũmina andũ maku ala makũtaĩaa, na o ta ũu mayananga kĩthembeo kyaku na kũvetanga ũkumyo wa nyũmba yaku. 17pMeenda andũ ĩũlũ wa nthĩ mataĩae mĩvw'anano ya mana, na kũkumya tene na tene asumbĩ ala makusaa. 17qAme Mwĩai ndũkanenge syĩndũ ite thayũ ũtonyi waku, na ndũkamaeke matũthekee twavalũka. Ĩndĩ alyũla mĩvango yoo ĩmaetee ũthũku nemo, na ũituma ũla waĩ wa mbee kũtũseũvĩsya mũvango mũthũku aminwa nĩ kana ethĩwe ngelekany'o kwoo. 17rAme Mwĩai tũlilikane, ĩyonany'e kwitũ ĩvindanĩ yĩĩ ya thĩna, na ũinenga nyie ũkũmbaũ, we Mũsumbĩ wa ngai syonthe na Mũnene wa mosumbĩ onthe. 17sNenge ndeto nzeo sya kũneena na mũsumbĩ, na ũialyũla ngoo yake amene mũndũ ũla ũkũkita naitũ, nĩ kana aminwe vamwe na ala me mũamba nake. 17tĨndĩ tũtangĩĩe na ũtonyi waku, na ũindethya nyie ũla nĩ nyioka, na ndi na mũndũ wa kũndethya ateo we Mwĩai. 17uWe nĩwĩsĩ maũndũ onthe, na nĩwĩsĩ kana nĩnĩmenete ndaĩa ĩla nĩnengawe nĩ andũ ala matakwĩsĩ, na kana nĩnĩmenete kũmanyana kĩ-mwĩĩ na andũ aa mate ma mbaĩ yaitũ na mate aĩke. 17wNĩwĩsĩ kana nyie ndi ũndũ ũngĩ ndonya kwĩka. Nĩnĩmenete ngovia ya kĩ-ũsumbĩ ĩla nĩthĩawa naĩlĩte kwĩkĩa ta mũka wa mũsumbĩ ĩvinda yĩla kwĩ syathĩ sya mwanya sya kĩ-ũsumbĩ. Nĩmĩmenete ta kĩtani kĩthokoanu, na ndimĩkĩaa ĩvinda yĩla kũte syathĩ isu. 17x#Yund 9.13 Nyie mũthũkũmi waku ndyaaĩsanĩa na Amani, kana kũtaĩa mboka sya mũsumbĩ, o na ndyaanyw'a ndivai ila ĩthembewe ngai syake. 17yNyie mũthũkũmi waku ndyaaĩthĩwa na ũtanu kuma mũthenya ũla naetiwe vaa nginya ũmũnthĩ, ateo nthĩnĩ waku we Mwĩai Ngai wa Avalaamu. 17z#Nda 1.8; Yund 12.2 Ame Ngai, we ũla wĩna ũtonyi ĩũlũ wa andũ onthe, ĩw'a mboya sya ala me kũkw'a ngoo, na ũitũtangĩĩa kuma ũtonyinĩ wa andũ athũku, na ũimbetangĩa w'ĩa ũla nĩ naw'o.”
Currently Selected:
Est-Kĩk 4: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
Est-Kĩk 4
4
Molitekai Aikũlya Ũtethyo Kuma Kũla kwĩ Esita
1Yĩla Molitekai wamanyie ĩũlũ wa maũndũ onthe ala meekĩkĩte, nĩwatembũangie ngũa syake nĩ woo. Nĩwasyokie eekĩa ngũa ngaamu sya makunia, na eeyũmbanga mũu mũtwe na avĩtĩla ndũanĩ aĩĩte kĩĩo kĩ woo na wasya mũnene. 2Nĩwaendie nginya mũomonĩ wa mũvĩa wa nyũmba ya mũsumbĩ, nũndũ vai mũndũ waĩ atonya kũlika kwa mũsumbĩ ekĩĩte ngũa ngaamu sya makunia.
3Nthĩnĩ wa kĩla kĩsio vala ũtw'ĩo ũsu wa mũsumbĩ wavikaa, nĩveethĩawa kĩĩo na kyeva kĩnene andũnĩ ma mbaĩ ya Ayuti. O ta ũu nĩmatĩĩaa kũya, makaĩa kĩĩo kĩ woo na wasya mũnene, na aingĩ moo mayĩkĩa ngũa ngaamu sya makunia na kwĩyiliitya mũunĩ.
4Yĩla athũkũmi ala ma aka na ala angĩ maĩ aũme avakũe mamũtavisye Esita maũndũ ala Molitekai waendee kwĩka, kĩveti kĩu kya mũsumbĩ nĩkyeethĩiwe na kĩũũyũ kĩnene. Nĩkyanenganie ngũa itwaĩwe Molitekai nĩ kana aumye ngũa ngaamu sya makunia, ĩndĩ ailea vyũ. 5Nĩvo ĩndĩ Esita watũmanie Athaki, ũmwe wa ala aũme avakũe ma mũsumbĩ, ũla wanyuvĩtwe nĩ mũsumbĩ ethĩwe mũthũkũmi wake, aende vala ve Molitekai akamanye nĩ kyaũ kĩendee na kyumanĩte na ũndũ mwaũ. 6Athaki nĩwaendie vala ve Molitekai mũomonĩ wa mũvĩa wa kũlika nyũmbanĩ ya mũsumbĩ ĩla yaĩ ndũanĩ katĩ. 7Molitekai nĩwamũtavisye maũndũ onthe ala meekĩkĩte, na mbesa syonthe ila Amani wathanĩte kũnengane syĩkĩwe kĩnandũnĩ kya mũsumbĩ nĩ kana Ayuti onthe moawe. 8O ta ũu Molitekai nĩwanengie Athaki valũa ĩla yaandĩkĩtwe ũtw'ĩo ũla wanenganĩiwe vau Susa, ũeleetye kana Ayuti onthe nĩmaĩlĩte kũawa. Molitekai nĩwamũkũlilye nĩ kana atwaĩe Esita valũa ĩsu, na aimũelesya maũndũ asu na kũmũkũlya athi akesũvane kwa mũsumbĩ nĩ kana andũ ma mbaĩ yake mew'ĩwe tei. 9Athaki nĩwaendie atavya Esita maũndũ onthe ala wataviw'e nĩ Molitekai. 10Esita nĩwatũmie Athaki kũla kwĩ Molitekai akamwĩe atĩĩ, 11“Athũkũmi onthe ma mũsumbĩ na andũ ala angĩ onthe mekalaa isionĩ ila syĩ ungu wa ũsumbĩ wake, nĩmesĩ kana ve mwĩao ũmwe tũ, ũla waasya kana mũndũ-ũme kana mũndũ mũka o na wĩva, ũla wĩthi alike nyũmbanĩ ya mũsumbĩ vala wĩkalaa atetĩtwe vo, akooawa. Mũndũ ũla ũtakoawa no ũla wĩlika vo na mũsumbĩ ayũkĩlya ĩla ndata yake ya thaavu kwonany'a kana ũsu ndaĩlĩte kũawa. Yu mĩthenya mĩongo ĩtatũ nĩ mĩthelu nyie ndalika kwa mũsumbĩ, nũndũ ndaandũmana nĩthi vo.”
12Yĩla Molitekai wakwatie ũtũmani wa Esita, 13nĩwanenganie ũsũngĩo ũũ, “Ndũkasũanĩe kana nũndũ wĩ nyũmbanĩ ya mũsumbĩ, no ue wĩ weka ũkavonoka katĩ wa Ayuti ala angĩ onthe. 14Nũndũ ethĩwa ũkavindya ĩvinda ta yĩĩ, ũkiakisyo na ũtangĩĩo wa Ayuti ũkauma kũndũ kũngĩ, ĩndĩ we na andũ ma mũsyĩ wenyu mũkooawa. Nũũ wĩsĩ kana ndũneetw'ĩkĩthw'a mũka wa mũsumbĩ kwondũ wa ĩvinda ta yĩĩ twĩ nayo.”
15Nĩvo ĩndĩ nake Esita wanenganie ũsũngĩo ũũ ũtwaĩwe Molitekai: 16“Enda wũmbany'e Ayuti onthe ala me ndũanĩ ya Susa, na mũitĩĩa kũya na kũvoya nũndũ wakwa. Mũikaye kana kũnyw'a kĩndũ vandũ va mĩthenya ĩtatũ, ũtukũ na mũthenya. Nakwa vamwe na athũkũmi makwa ma aka nĩtũũtĩĩa kũya o ta ũu. Ĩtina wa ũu, ngathi vala ve mũsumbĩ, o na kau ũndũ ũsu ndwosana na mĩao, na ĩndĩ ethĩwa nĩ kũkw'a ngakw'a.” 17Molitekai nĩwaendie na eeka maũndũ onthe ala Esita wamũtavisye.
Mboya ya Molitekai
17a Nĩvo ĩndĩ Molitekai wamũvoyie Mwĩai aililikana maũndũ ala Mwĩai weekĩte ĩvinda ya tene. Nĩwavoyie asya atĩĩ:
17b We Mwĩai! We ũla ũsumbĩkaa syĩndũ syonthe,
syĩndũ syonthe ila woombie syĩ ungu wa ũtonyi waku,
na vai mũndũ ũtonya ũkũsiĩĩa ethĩwa nũkwenda kũtangĩĩa Ĩsilaeli.
17c We nĩwoombie ĩtu na nthĩ,
na syĩndũ syonthe sya kũseng'ya ila syĩ kũũ nthĩ.
Nue Mwĩai wa syonthe,
na vai mũndũ ũtonya ũkũsiĩĩa we Mwĩai.
17d We Mwĩai nĩwĩsĩ maũndũ onthe; nĩwĩsĩ kana ndinaalea kũtulĩlya Amani ndu, ũla mũndũ wĩ ngathĩĩo, nũndũ naĩ na ngũlũ, ngathĩĩo, kana nũndũ wa kwenda nĩnengwe ndaĩa. Nĩthĩwa naĩ nĩyũmbanĩtye kũmumunya nyaĩĩ sya Amani nĩ kana nĩtangĩĩe Ĩsilaeli! 17eĨndĩ nĩnaleile kũmũtulĩlya ndu nĩ kana ndikataĩe mũndũ vandũ va kũtaĩa Ngai. Ndikatulĩlya ndu mũndũ o na wĩva, ate o we Mwĩai wakwa no ue nĩtulĩlasya ndu, na ndikekaa ũu nĩna ngathĩĩo. 17fNa ĩndĩ yu we Mwĩai Ngai Mũsumbĩ, Ngai wa Avalaamu, tangĩĩa andũ maku. Amaitha maitũ memantha mwanya matũmine; meenda kũtũmina ithyĩ ũtiĩwa waku wa kuma tene. 17gNdũkaekane na andũ maku ala woovoisye kuma nthĩ ya Misili matw'ĩke maku. 17h#Kuma 3.6 Ĩw'a mboya yakwa, na ũitwĩw'ĩa tei ithyĩ ũtiĩwa waku. Ame Mwĩai, alyũla kĩĩo kitũ kĩtw'ĩke ũtanu, nĩ kana twĩkale thayũ na tũikwinĩaa mbathi sya ũkũtaĩa. Ndũkatũmine ithyĩ ala tũkũtaĩaa.”
17i Andũ onthe ma Ĩsilaeli nĩmaĩie mũno nũndũ nĩmamanyie kana makilĩlye kũawa.
Mboya ya Esita
17k Esita mũka wa mũsumbĩ e na kĩũũyũ kingĩ nĩwaendie mbee wa Mwĩai amũvoye. Nĩwaumisye ngũa syake nzeo mũno na eekĩa ngũa ila syeekĩawa ĩvinda ya kyeva na woo, na vandũ va kwĩvaka mauta ma thooa mũnene nĩweeyũmbie mũu na kyaa mũtwe. Nĩweekie ũndũ ũtonya nĩ kana mwĩĩ wake woneke ũte mwaĩlu, na aeka nzw'ĩĩ yake yĩ nthokoanu ĩniine mwĩĩnĩ wake ũla wendete kwanakavya mũno. Esita nĩwavoyie Mwĩai, Ngai wa Ĩsilaeli ayasya atĩĩ, 17l“Ame Mwĩai wakwa, we wĩ weka nue Mũsumbĩ waitũ. Ndethye nũndũ nĩ nyioka na ndi na mũndũ wa kũndethya ateo we, na ngilĩlye kũlika mũisyonĩ. 17mKuma nĩ mũnini nĩneewie andũ ma mbaĩ yakwa mayasya kana we Mwĩai nĩwanyuvie andũ ma Ĩsilaeli kuma mbaĩnĩ ila ingĩ syonthe, na wanyuva aaũmae maitũ kuma kwa aaĩthe moo nĩ kana matw'ĩke andũ maku tene na tene, na kana nĩwamekie maũndũ onthe ala wamathie. 17nĨndĩ yu nĩtwĩkĩte naĩ tũkaũvĩtĩsya, naku nũtũnenganĩte ũtonyinĩ wa amaitha maitũ, nĩkwĩthĩwa nĩtwathaithie ngai syoo. We Mwĩai wĩ mũlũngalu. 17oĨndĩ yu amaitha maitũ mayĩanĩwe nĩkwona twĩ ũkombonĩ mũthũku. Maseũvĩtye ũtianĩo na ngai syoo, mavetange mĩao ĩla ũnenganĩte na kũmina andũ maku ala makũtaĩaa, na o ta ũu mayananga kĩthembeo kyaku na kũvetanga ũkumyo wa nyũmba yaku. 17pMeenda andũ ĩũlũ wa nthĩ mataĩae mĩvw'anano ya mana, na kũkumya tene na tene asumbĩ ala makusaa. 17qAme Mwĩai ndũkanenge syĩndũ ite thayũ ũtonyi waku, na ndũkamaeke matũthekee twavalũka. Ĩndĩ alyũla mĩvango yoo ĩmaetee ũthũku nemo, na ũituma ũla waĩ wa mbee kũtũseũvĩsya mũvango mũthũku aminwa nĩ kana ethĩwe ngelekany'o kwoo. 17rAme Mwĩai tũlilikane, ĩyonany'e kwitũ ĩvindanĩ yĩĩ ya thĩna, na ũinenga nyie ũkũmbaũ, we Mũsumbĩ wa ngai syonthe na Mũnene wa mosumbĩ onthe. 17sNenge ndeto nzeo sya kũneena na mũsumbĩ, na ũialyũla ngoo yake amene mũndũ ũla ũkũkita naitũ, nĩ kana aminwe vamwe na ala me mũamba nake. 17tĨndĩ tũtangĩĩe na ũtonyi waku, na ũindethya nyie ũla nĩ nyioka, na ndi na mũndũ wa kũndethya ateo we Mwĩai. 17uWe nĩwĩsĩ maũndũ onthe, na nĩwĩsĩ kana nĩnĩmenete ndaĩa ĩla nĩnengawe nĩ andũ ala matakwĩsĩ, na kana nĩnĩmenete kũmanyana kĩ-mwĩĩ na andũ aa mate ma mbaĩ yaitũ na mate aĩke. 17wNĩwĩsĩ kana nyie ndi ũndũ ũngĩ ndonya kwĩka. Nĩnĩmenete ngovia ya kĩ-ũsumbĩ ĩla nĩthĩawa naĩlĩte kwĩkĩa ta mũka wa mũsumbĩ ĩvinda yĩla kwĩ syathĩ sya mwanya sya kĩ-ũsumbĩ. Nĩmĩmenete ta kĩtani kĩthokoanu, na ndimĩkĩaa ĩvinda yĩla kũte syathĩ isu. 17x#Yund 9.13 Nyie mũthũkũmi waku ndyaaĩsanĩa na Amani, kana kũtaĩa mboka sya mũsumbĩ, o na ndyaanyw'a ndivai ila ĩthembewe ngai syake. 17yNyie mũthũkũmi waku ndyaaĩthĩwa na ũtanu kuma mũthenya ũla naetiwe vaa nginya ũmũnthĩ, ateo nthĩnĩ waku we Mwĩai Ngai wa Avalaamu. 17z#Nda 1.8; Yund 12.2 Ame Ngai, we ũla wĩna ũtonyi ĩũlũ wa andũ onthe, ĩw'a mboya sya ala me kũkw'a ngoo, na ũitũtangĩĩa kuma ũtonyinĩ wa andũ athũku, na ũimbetangĩa w'ĩa ũla nĩ naw'o.”
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011