Est-Kĩk 3
3
Mũndũ Weetawa Amani Aivanga Kũaa Ayuti
1Ĩtina wa maũndũ asu, mũsumbĩ nĩwamũnenevisye Amani mwana wa Ametatha, nzyawa ya mũndũ weetawa Akaki. Nĩwamũnenevisye mbee wa andũ ala angĩ ma ndaĩa ũsumbĩnĩ wake. 2Athũkũmi onthe ma kwa mũsumbĩ nĩmatulasya ndu na kũkumany'a mũtwe mbee wa Amani, nĩkwĩthĩwa mũsumbĩ eeaĩte kwĩkawe ũu. Ĩndĩ Molitekai nĩwaleile kũtulya ndu kana kũkumany'a mũtwe mbee wa Amani. 3Athũkũmi ala angĩ ma mũsumbĩ nĩmakũlilye Molitekai atĩĩ, “Ũtũlaa mwĩao wa mũsumbĩ nĩkĩ?” 4Nĩmamũkũlilye ũu matukũ maingĩ na alea vyũ kwĩanĩsya mwĩao ũsu. Kwoou athũkũmi asu nĩmaendie matavya Amani nĩ kana masisye kana nũkwĩtĩkĩlana na mwĩkalo ũsu wa Molitekai, nũndũ amatavasya akĩmea we nĩ Mũyuti na ndatonya kũkumany'a mũtwe wake mbee wa Amani. 5Amani nĩwathatie mũno yĩla wamanyie kana Molitekai ndatonya kũtulya ndu na kũkumana mbee wake. 6Yĩla Amani wamanyie kana Molitekai nĩ Mũyuti, nĩwasũanĩie kana ndemwĩka ũndũ o na wĩva e weka. Kwoou nĩwavangie oae Ayuti onthe ala maĩ kĩsionĩ kĩla Aasuelo wasumbĩkĩte.
7Mwakanĩ wa ĩkũmi na ilĩ wa kũsumbĩka kwa Aasuelo, mweinĩ wa mbee ũla wĩtawa Nisani,#3.7 Nisani: Mwei ũũ no w'o wĩtawa Avivu Amani nĩweeaie kũkũnwe kula ila syeetawa Vuli, nĩ kana kũmanyĩke mũthenya na mwei ũla wĩĩanĩsya mũvango ũsu. Ĩtukũ ya ĩkũmi na itatũ ya mwei wa ĩkũmi na ilĩ, ũla nĩw'o wĩtawa Atali nĩyo manyuvie.
8Nĩvo ĩndĩ Amani weeie Mũsumbĩ Aasuelo atĩĩ, “Ve ũko wa andũ manyaĩĩkĩe kĩla vandũ andũnĩ onthe ma isio sya ũsumbĩ waku. Syĩthĩo sya andũ asu syĩ kĩvathũkany'o na sya andũ ala angĩ onthe. O vamwe na ũu, mayĩkaa ũndũ mĩao yaku we mũsumbĩ ĩkwasya, kwa kĩtumi kĩu vai ũtethyo kwaku we mũsumbĩ kũmĩanĩsya namo. 9Kwoou ethĩwa we mũsumbĩ waitũ nũkwona wĩ waĩlu, umya mwĩao nĩ kana andũ asu moawe onthe, nakwa nyie nĩngumya kĩlo ngili maana atatũ na mĩongo ĩna sya silĩva, nĩnenge ala masũvĩaa mbesa sya mũsumbĩ maie kĩnandũnĩ kyake.”
10Mũsumbĩ nĩwaumisye mbete yake ya kwĩkĩa mũulĩ na amĩnenga Amani, ũla mũmaitha wa Ayuti, nake aĩ mwana wa Ametatha ĩla nzyawa ya Akaki. 11Nĩvo ĩndĩ mũsumbĩ wamwĩie Amani atĩĩ, “Ĩkala na mbesa syaku na ũyĩkana na andũ asu ũndũ ũkwenda.”
12Matukũ ĩkũmi na atatũ mwei wa mbee, Amani nĩweetie athũkũmi ma mũsumbĩ ala matethasya wĩa wa kũandĩka. Nĩwamaumĩisye mwĩao maandĩke ũtw'ĩo wake na ithyomo syonthe ila syatũmĩawa isionĩ ila Mũsumbĩ Aasuelo wasumbĩkĩte. Ũtw'ĩo ũsu waandĩkĩiwe atongoi onthe ma isio isu na makavana; waandĩkĩtwe kumana na mwĩao wa mũsumbĩ na ũkatumbwa mũulĩ na mbete yake.
13Andũ amwe nĩmatũmiwe matwae ũtw'ĩo ũsu isionĩ syonthe sya ũsumbĩ wa Aasuelo. Valũa isu syoonanĩtye kana Ayuti onthe; ma mũika na ala akũũ, aka na syana nĩmoawe mathele na syĩndũ syoo syanangwe vyũ mũthenyanĩ o ũmwe, naw'o nĩ matukũ ĩkũmi na atatũ mwei wa ĩkũmi na ilĩ, ũla nĩw'o mwei wa Atali.
Mũsumbĩ Aasuelo Ayumya Mwĩao Ayuti Moawe
13a Valũa ũla waandĩkiwe waĩtye ũũ:
“Kuma vala nĩĩ nyie Aasuelo Mũsumbĩ Mũnene, valũa ũũ ũmũvikĩe inyw'ĩ makavana ma isio sya nthĩ ĩana na mĩongo ĩlĩ na mũonza, ila syumĩte nthĩ ya India kũvika nthĩ ya Ethiovia, vamwe na anini menyu ala me nthĩ isu:
13b “Ĩtina wa kũtw'ĩka mũsumbĩ wa nthĩ mbingĩ na mũtongoi wa nthĩ yonthe, nĩndw'ĩte andũ ma nthĩ yakwa mekalae mũuonĩ kĩla ĩvinda. Nendie kwĩka ũu ti kumana na kwĩkathĩĩa nũndũ nĩ mũnene, ĩndĩ nĩkwĩthĩwa nĩthĩĩtwe ndyĩka maũndũ na ũĩ na kwĩka andũ makwa nesa. Nĩnĩtw'ĩte kũtethya andũ ma ũsumbĩ wakwa mekalae mũuonĩ mavinda onthe nĩ kana nĩthĩwe na ũsumbĩ wĩna mũuo na andũ maendae me ũsũvĩonĩ kuma ngalĩko ĩmwe ya nthĩ kũthi ĩla ĩngĩ. 13cYĩla ngũlilye atai makwa ũndũ ndonya kwĩanĩsya mũvango ũsu wakwa, Amani ũla wĩsĩwe katĩ waitũ ta mũndũ mũĩ mũno na kĩla ĩvinda wĩthĩawa eyumĩtye nĩ kana ũsumbĩ ũendee mbee, na nũndũ wa ũĩkĩĩku wake, nũnenevetw'e akethĩwa mũnini wa mũsumbĩ, 13dnũnatũtavisye kana katĩ wa nthĩ syonthe ve mbaĩ ĩmwe ĩtatwendeaa ũseo, na ĩnyaĩĩkĩe kĩla vandũ ũsumbĩnĩ ũũ. Mbaĩ ĩsu yĩ mĩao yĩ kĩvathũkany'o na ya mbaĩ ila ingĩ syonthe, na kĩla ĩvinda andũ mayo nĩmaleanaa na motw'ĩo ma asumbĩ ũkethĩa mũvango witũ ũla twendaa mũno, wa kwĩthĩwa twĩna mũamba ũsumbĩnĩ witũ ndwĩanĩa.
13e “Nĩtwĩsĩ kana andũ asu me oka mekalaa kĩla ĩvinda maileana na andũ ala angĩ onthe. Me mwĩkalĩle ũtailyĩ wa andũ ala angĩ na mĩao yoo o nayo yĩ kĩvathũkany'o, na mayendeaa ũsumbĩ witũ nesa. Mekaa maũndũ onthe mathũku ala matonya, nĩ kana ũsumbĩ witũ ndũkethĩwe wĩ mũlũmu.
13f “Kwoou nĩtwaumya ũtw'ĩo kana andũ onthe ala maandĩkĩtwe valũanĩ wa Amani, ũla ũũngamĩe mĩvango ya ũsumbĩ na nĩ ta ĩthe wa andũ ũsumbĩnĩ ũũ, nĩmoawe vamwe na iveti syoo na syana syoo. Nĩmaminwe na ũvyũ nĩ amaitha moo na maikamew'ĩe tei kana ĩnee o na vanini. Ũndũ ũsu nĩwĩkwe mũthenyanĩ wa ĩkũmi na inya mwei wa ĩkũmi na ilĩ, ũla nĩ mwei wa Atali, mwakanĩ ũũ. 13gAndũ asu ala vandũ va ĩvinda ĩasa o na kũvika yu matatwendeaa ũseo, nĩmoawe mũthenyanĩ o ũmwe. Meũawa kĩkw'ũ kĩ woo na maithi vala maveva ma ala akw'ũ mekalaa, na ũsumbĩ witũ ũitiwa wĩ ũsũvĩonĩ vyũ na ũtekũthĩnw'a nĩ kĩndũ.”
14Ũtw'ĩo ũsu waĩ ũtavanw'e kwa andũ onthe ma kĩla kĩsio, nĩ kana mekalae meyũmbanĩtye kwondũ wa mũthenya ũsu.
15Kumana na mwĩao wa mũsumbĩ, ũtw'ĩo ũsu nĩwatavaniw'e kwa kĩla mũndũ ndũanĩ nene ya Susa, na ala andũ matũmĩtwe maũtwaa isionĩ syonthe sya ũsumbĩ wa Aasuelo. Nĩvo ĩndĩ mũsumbĩ e na Amani mekalile nthĩ vandũ manyw'e, ĩndĩ nayo ndũa ya Susa ĩvindanĩ yĩu yeethĩwa na kĩthokoo kĩnene.
Currently Selected:
Est-Kĩk 3: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011