Est-Kĩk A
A
Ndoto ĩla Molitekai Waotie
1a #
2Asu 24.10-16
Mũthenyanĩ wa mbee wa mwei wa Nisani, ũla nĩw'o mwei wa mbee, mwakanĩ wa kelĩ wa kũsumbĩka kwa Aasuelo, Molitekai mwana wa Yaili, ũla waĩ mwana wa Simei mwana wa Kisi, kuma mbaĩnĩ ya Mbengyameni nĩwaotie ndoto. 1bMolitekai aĩ Mũyuti na ekalaa ndũanĩ nene ya Susa. Aĩ mũndũ wĩ ndaĩa na athũkũmaa nyũmbanĩ ya kĩ-ũsumbĩ ya mũsumbĩ Aasuelo. 1cMolitekai aĩ ũmwe wa andũ ala makwatĩtwe nĩ Nevukatinesa mũsumbĩ wa Mbavilonĩ, akamatwaa me ove kuma Yelũsalemu nginya Mbavilonĩ, me vamwe na Yekonia mũsumbĩ wa Yuta. Ĩno nĩyo ndoto ĩla Molitekai waotie: 1dNĩweewie kĩlonzo, oona kĩthokoo, eew'a kĩtundumo, kĩthingitho kya nthĩ, na oona andũ mavũavũanĩte ĩũlũ wa nthĩ. 1eNĩvo ĩndĩ vaumĩlile mĩkũnga ĩlĩ mĩnene, ĩla yeeyũmbanĩtye kũkita. Mĩkũnga ĩsu nĩyaumisye wasya wa kũtelemya. 1fMĩkũnga ĩsu yaumya wasya ũsu, mbaĩ syonthe nĩsyeeyũmbanisye kũkita mbaĩ ya andũ alũngalu. 1gŨsu waĩ mũthenya waĩ kĩvindu na woo, thĩna, kyeva, ũnyamao, na andũ kũvũavũana kĩla vandũ ĩũlũ wa nthĩ. 1hMbaĩ ĩsu yonthe ya andũ alũngalu nĩyakwatiwe nĩ kĩũũyũ. Nĩyakĩaa mothũku ala meeteelete kũmĩkwata, na kwoou andũ meeyũmbanĩsya kũawa. 1iNĩvo ĩndĩ mamwĩkaĩlile Ngai, na nũndũ wa kĩĩo kĩu kyoo nĩvaumĩlile kalũsĩ kanini na katw'ĩka ũsĩ mũnene waĩ na kĩw'ũ kingĩ. 1kNĩkwakyee, syũa yauma, na ala mataĩ na vinya makwata vinya, na mamina amaitha moo ala maĩ andũ me ndaĩa. 1lMolitekai nĩwoonie ndotonĩ ĩsu kĩla Ngai wavangĩte kwĩka. Amina kũamũka nĩweesilasya ĩũlũ wayo, na nĩwekalile mũthenya w'onthe aimantha ũalyũlo wayo kwa ũliku.
Molitekai Aitangĩĩa Mũsumbĩ
1m Yĩla Molitekai wathũmũĩte kĩwanzanĩ kya nyũmba ya kĩ-ũsumbĩ, vala athũkũmi elĩ avakũe Ngavatha na Thala masungaa, 1nnĩweewie ũndũ maneenaa, na eethukĩĩsya nesa amanya kana mendaa kũaa mũsumbĩ. Kwoou Molitekai nĩwaendie kũtavya mũsumbĩ Aasuelo ĩũlũ wa mũvango ũsu woo mũthũku. 1oMũsumbĩ nĩwaumisye mwĩao makũlw'e, na yĩla meetĩkĩlile kana maĩ na mũvango mũthũku, nĩmaumaalilw'e nza na mooawa. 1pMũsumbĩ nĩweeaie ũlilikany'o ĩũlũ wa ũndũ ũsu ũandĩkwe ĩvukunĩ ya maũndũ ma ũlilikany'o ya mũsumbĩ. Molitekai o nake nĩwaandĩkie ũvoo ũsu. 1qNĩvo ĩndĩ mũsumbĩ wanengie Molitekai wĩa kĩwanzanĩ kya nyũmba ya kĩ-ũsumbĩ, na amũnenga mĩthĩnzĩo mingĩ nũndũ wa ũndũ ũsu weekie. 1rĨndĩ Amani mwana wa Amendatha ũla waĩ Mũmbongeani, na wanengetwe ndaĩa nĩ mũsumbĩ, nĩwavangie kwĩka Molitekai na mbaĩ yake ya Ayuti naĩ, nũndũ Molitekai nĩwe watumie athũkũmi asu elĩ avakũe moawa.
Vasiti Mũka wa Mũsumbĩ Aivũthya Mũsumbĩ Aasuelo
1 #
Esa 4.6
Maũndũ aa nĩmo meekĩkie ĩvindanĩ ya Aasuelo. Mũsumbĩ Aasuelo asumbĩkĩte isio mbee wa ĩana na mĩongo ĩlĩ na mũonza, kuma India kũvika Ethiovia. 2Ĩvindanĩ yĩu, mũsumbĩ ũsu asumbĩkaa e nyũmbanĩ yake ya kĩ-ũsumbĩ, ĩla yaĩ Susa ndũanĩ nene ya nthĩ ya Velisia.
3Mwakanĩ wa katatũ wa kũsumbĩka kwake, Mũsumbĩ Aasuelo nĩwamaseũvĩisye atongoi na anene ala angĩ onthe ma ũsumbĩ wake mboka nene. Anene ma asikalĩ ma kaũ ma nthĩ ya Velisia na Metia maĩ vo, vamwe na andũ me ndaĩa na makavana ala maũngamĩe isio sya ũsumbĩ wake. 4Vandũ va ĩvinda ya myei thanthatũ, mũsumbĩ ũsu nĩwoonanasya mothwii maingĩ ma ũsumbĩ wake na kĩla kĩtumaa ũsumbĩ ũsu ũnengwa ndaĩa. 5Ĩtina wa maũndũ asu mũsumbĩ nĩwaseũvĩisye andũ onthe me nguma na mate nguma, ala maĩ ndũanĩ ĩsu ya Susa mboka. Mboka ĩsu yaseũvĩw'e nza wa nyũmba yake nene ya kĩ-ũsumbĩ, na yakuie mĩthenya mũonza. 6Vandũ vau vaanakavĩtw'e na itambaa nzaũ na sya mbuluu syoveewe ngomenĩ syaseũvĩtw'e na silĩva na ikoveewa ndiinĩ nzeo ndũmu sya langi wa nzambalaũ, ila nasyo syooveewe ituĩnĩ syanakavĩtw'e na mavia ma thooa mũnene. Vaĩ ivĩla ndaasa sya thaavu na silĩva, ivangĩtwe vandũ vaseũvĩtw'e kwa kũmbĩĩwa mavia ma langi mũseo, angĩ ma thooa mũnene, na angĩ ma thooa mũnene mũno. 7Syĩndũ sya kũnyw'a syeekĩĩtwe ikombenĩ sya thaavu, na vai kĩmwe kya ikombe isu kyailyĩ ũndũ ũmwe na kĩla kĩngĩ. Mũsumbĩ nĩwanenganie ndivai ya kĩ-ũsumbĩ ĩla waseũvĩsye andũ kwa ũlau mũnene. 8Kĩla mũndũ nĩwanyusaa ũndũ ũkwenda ate kũthimĩwa; mũsumbĩ nĩwaumĩisye athũkũmi make onthe mwĩao manenge kĩla mũndũ anyw'e kwĩanana na ũndũ ũkwenda. 9Ĩvindanĩ yĩu o nake Vasiti, mũka wa mũsumbĩ, nĩwaendee kũnenga aka ala maĩ nyũmbanĩ ya mũsumbĩ mboka.
10Mũthenyanĩ wa mũonza wa mboka ĩsu, mũsumbĩ aĩ na ũtanu mwingĩ nũndũ wa ndivai ĩla wanyw'ĩte, na kwoou eeta aũme mũonza avakũe ala maĩ athũkũmi ma ndaĩa nyũmbanĩ yake ya kĩ-ũsumbĩ, namo nĩ: Meũmani, Mbisitha, Alivona, Mbingitha, Avangitha, Nzethali na Kalikasi. 11Nĩwameie makamwĩte Vasiti mũka wake oke ekĩĩte ngovia ya kĩ-ũsumbĩ, nĩ kana onany'e wanake wake mbee wa andũ me ndaĩa na andũ ala angĩ onthe, nũndũ Vasiti aĩ mwanake. 12Ĩndĩ Vasiti mũka wa mũsumbĩ nĩwaleile kũka eetwa nĩ mũsumbĩ kwĩsĩla athũkũminĩ asu. Ũndũ ũsu nĩwatumie mũsumbĩ athata na kwĩw'a woo mũno.
13Kwoou mũsumbĩ nĩwakũlilye atai make ũtao ĩũlũ wa mĩao na kumya ũsilĩlo ũla waĩlĩte, o tondũ asumbĩ makothaa kwĩka. 14Atai make maĩ: Kalĩsena, Setha, Andimatha, Talisisi, Melesi, Malisena na Memũkani, ala maĩ andũ mũonza me ndaĩa ma nthĩ ya Velisia na ya Metia. Andũ asu nĩmo mekalaa vakuvĩ na mũsumbĩ ũsumbĩnĩ wake. 15Mũsumbĩ nĩwamakũlilye atĩĩ: “Kwĩanana na mĩao, mwĩona twĩĩkana ata na Vasiti mũka wakwa nyie mũsumbĩ, nũndũ nĩwalea kwĩanĩsya ũtũmani ũla nanenga ala athũkũmi makwa mũonza?”
16Nĩvo ĩndĩ Memũkani wamũsũngĩie mũsumbĩ vamwe na anini make na makavana amea atĩĩ, “Vasiti mũka wa mũsumbĩ ndanavĩtĩsya mũsumbĩ e weka, ĩndĩ o ta ũu nĩwavĩtĩsya andũ onthe ma ndaĩa na ala angĩ onthe ma isio ila Mũsumbĩ Aasuelo ũsumbĩkĩte. 17Nĩkwĩthĩwa ũndũ ũsu mũka wa mũsumbĩ weeka, nũũmanyĩka nĩ iveti syonthe na ũituma syambĩĩa kũvũthya aamũũme. Ikaneenaa iyasya, ‘Mũsumbĩ Aasuelo aumisye mwĩao nĩ kana mũka oke vala ũĩ nake alea.’ 18Ũmũnthĩ iveti sya andũ ma ndaĩa ma Velisia na Metia, ala meew'a ũndũ ũsu weekwa nĩ mũka wa mũsumbĩ, makaũtavanasya kwa andũ asu ma ndaĩa mekalaa vakuvĩ na mũsumbĩ. Ũndũ ũsu wĩtuma iveti kĩla vandũ itamanenga aamũũme ndaĩa, namo aamũũme makekalaa mayĩw'ĩa iveti syoo woo. 19Kwoou ethĩwa mũsumbĩ nũkwona wĩ waĩlu umya mwĩao wa kĩ-ũsumbĩ na ũiandĩkwa ta ũmwe wa mĩao ya Velisia na Metia nĩ kana wĩthĩwe ũtatonya kũalyũlwa. Mwĩao ũsu nĩwasye kana Vasiti ti mũka wa Mũsumbĩ Aasuelo ĩngĩ; mũsumbĩ nĩanengane mwanya ũsu wa Vasiti kwa mũndũ mũka ũngĩ wĩ ndaĩa kwĩ we. 20Mwĩao ũsu watavanw'a kĩla vandũ ũsumbĩnĩ wake, iveti syonthe ikanengae aamũũme ndaĩa, o na ethĩwa nĩ athwii kana nĩ ngya.”
21Woni ũsu nĩwendeeisye mũsumbĩ vamwe na andũ make ma ndaĩa, na kwoou mũsumbĩ eeka kwĩanana na ũndũ Memũkani waisye. 22Mũsumbĩ nĩwatũmie valũa isionĩ syonthe sya ũsumbĩ wake; kĩla kĩsio akĩandĩkĩie na kĩthyomo kĩla andũ makyo maneenaa, na kĩla mbaĩ na kĩthyomo kĩla ĩneenaa. Ũtũmani ũsu waasya kana kĩla mũndũ-ũme wĩ kĩveti nĩ ethĩwe e mũtongoi mũsyĩnĩ ũla wake.
Currently Selected:
Est-Kĩk A: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011