Mũta 9

Kĩkw'ũ Kyũkaa kwa Onthe

1Nĩnasũanĩie mũno ĩũlũ wa maũndũ asu onthe, na noona kana Ngai e na ũtonyi ĩũlũ wa andũ ala oĩ na ala alũngalu, na ĩũlũ wa kwendana na kũmenana kwoo. Vai ũmwe wĩsĩ kĩla kĩmweteelete. 2Onthe methĩawa na mũminũkĩlyo wa mũthemba ũmwe; me alũngalu kana me na ũvuku wa ngoo; me aseo kana me athũku; me na ũtheu wa ngoo kana mate atheu ngoo; ala maumasya nthembo na ala mataumasya. O ũndũ kwĩthĩawa kũilyĩ kwa mũndũ ũla mũseo, now'o kwĩthĩawa kwa ũla wĩkaa naĩ; o ta ũu o ũndũ kwĩthĩawa kũilyĩ kwa ala mevĩtaa, now'o kwĩthĩawa kwa ala maleaa kwĩvĩta. 3Ũũ nĩ ũndũ mũthũku katĩ wa maũndũ onthe ala mekĩkaa ĩũlũ wa nthĩ, kana mũminũkĩlyo wa mũthemba ũmwe ũmakwataa andũ onthe. O ta ũu nĩ ũndũ mũthũku ngoo sya andũ onthe kwĩthĩwa syusũĩte mothũku, na mate na mosũanĩo maseo yĩla me thayũ, na ĩtina wa ũu maikw'a. 4Mũndũ ũla wĩ thayũ e na wĩkwatyo; ngitĩ yĩ thayũ yĩ kavaa kũte mũnyambũ mũkw'ũ, 5nũndũ ala me thayũ nĩmesĩ kana makakw'a, ĩndĩ ala akw'ũ maimanya kĩndũ. Mai ĩtuvi mongeleelwa; makw'a nĩmolaa vyũ. 6Wendo woo, kĩmena na kĩwĩu kyoo nĩsyathelile, na vai ũndũ makethĩwa matonya kwĩka ĩngĩ ĩũlũ wa nthĩ.

7Enda ũkaye lĩu waku na kũnyw'a ndivai na ũtanu, nũndũ Ngai nũkũnengete mwanya wa kwĩka ũu. 8Ĩkĩaa ngũa nesa na kwĩkalaa wĩ mũtanu. 9Ĩkalaa na ũtanu wĩ na kĩveti kyaku kĩla wendete, mĩthenya yonthe ya thayũ waku wa mana ũla Ngai ũkũnengete ĩũlũ wa nthĩ, nĩkwĩthĩwa ũsu nĩ ũndũ ũkwaĩlĩte yĩla wĩ thayũ, ũendee kũtethya wĩa waku ĩũlũ wa nthĩ. 10Tethasya wĩa waku ũla waĩlĩte kũtethya na vinya waku w'onthe, nĩkwĩthĩwa vaikethĩwa kũtethya wĩa, kũsũanĩa, kũmanya kana ũĩ, vala maveva ma akw'ũ maendaa, navo nĩvo ũendete.

11Nĩnoonie ũndũ ũngĩ ĩũlũ wa nthĩ: Ti ala masembaa mũno masindaa kĩla ĩvinda, kana ngũmbaũ ĩkasinda kaũnĩ kĩla ĩvinda. Ala oĩ maĩkwataa kyaũya kĩla ĩvinda, kana ala me na ũmanyi kwĩthĩwa na ũthwii, kana ala asomu kwĩthĩwa maikwata ivĩla sya ĩũlũ. Ĩndĩ kĩla ũmwe nĩwĩthĩawa na myanya na ĩvinda. 12Vai mũndũ wĩthĩawa esĩ ĩvinda yake nĩ ĩndĩĩ. O tondũ makũyũ makwataw'a nĩ kĩtei na nyũnyi ikakwatw'a nĩ ĩkenge, now'o naitũ o ta ũu tũlikaa ũthũkunĩ na mĩtũkĩ ĩvindanĩ yĩla tũteũtalĩthya.

Momanyĩsyo Ĩũlũ wa Ũĩ na Ũtumanu

13O ĩngĩ nĩnonete ngelekany'o nzeo ĩũlũ wa nthĩ, ya ũndũ kwĩthĩwa na ũĩ kũilyĩ. 14Ĩvinda yĩmwe vaĩ ndũa nini yekalaa andũ avũthũ. Nĩvo ĩndĩ mũsumbĩ ũmwe wĩ ũtonyi wamĩvithũkĩie, amĩthyũlũlũkya asikalĩ ma kaũ, na eeyũmbany'a kwananga ndũa ĩsu. 15Ĩndĩ nthĩnĩ wayo vaĩ mũndũ ũmwe ngya waĩ mũĩ, na atangĩĩa ndũa ĩsu na ũĩ wake. Ĩndĩ ũu wĩ o vo, vai mũndũ waaona ũseo wa mũndũ ũsu ngya ta kĩndũ. 16Nyie nĩasya kavaa mũndũ kwĩthĩwa na ũĩ kũte kwĩthĩwa na vinya, o na kau ũĩ wa mũndũ ũla ngya nũvũthĩĩaw'a, na ndeto syake kũlea kwĩthukĩĩw'a. 17Nĩ kavaa kwĩthukĩĩsya ndeto syĩ na ũuu sya mũndũ mũĩ, kũte kwĩthukĩĩsya ndeto sya wasya mũtũlu wa mũtongoi nzamanĩ ya andũ atumanu. 18Ũĩ nĩ mũseo kũte mĩio ya kaũ, ĩndĩ mũndũ ũla wĩkaa naĩ nĩwanangaa maũndũ maingĩ maseo.

Currently Selected:

Mũta 9: KAMBA

Highlight

Copy

Compare