2Asu 24

1 # Yel 25.1-38; Nda 1.1-2 Ĩvindanĩ ya kũsumbĩka kwa Yeoiakimu, Nevukatinesa mũsumbĩ wa Mbavilonĩ nĩwavithũkĩie nthĩ ya Yuta. Yeoiakimu nĩwatw'ĩkie mũthũkũmi wake vandũ va myaka ĩtatũ, ĩndĩ nĩwaalyũlile mosũanĩo make na ang'endea Nevukatinesa. 2Mwĩai Ngai nĩwatũmie ikundi sya asikalĩ kuma Mbavilonĩ, Silia, sya Amoavi na sya Aamimoni, moke kũkita Yeoiakimu na mayananga nthĩ ya Yuta, kwĩanana na ũndũ waneenete aitũmĩa athũkũmi make athani. 3Maũndũ asu meekĩkie kwĩanana na mwĩao wa Mwĩai Ngai, nĩ kana avetange andũ ma Yuta mbee wake, nũndũ wa naĩ syonthe ila Manase weekĩte, 4na mũno mũno nũndũ wa andũ mate ĩvĩtyo ala wooaie. Mwĩai Ngai ndaaĩtĩkĩla kũekea Manase nũndũ wa maũndũ asu.

5Maũndũ ala angĩ Yeoiakimu weekie yĩla wasumbĩkĩte, maandĩkĩtwe Ĩvukunĩ ya Maũndũ ma Mavinda ma Asumbĩ ma Yuta. 6Yeoiakimu nĩwakwie, na mwana wake Yeoiakini atw'ĩka mũsumbĩ ĩtina wake.

7Mũsumbĩ wa Misili ndaaumaala ĩngĩ akokite, nũndũ mũsumbĩ wa Mbavilonĩ nĩwoosete isio syake syonthe, kuma Ũsĩnĩ wa Euvalati kũthi kũvika mũvakanĩ wa Misili wa ngalĩko ya ĩũlũ.

Yeoiakini Mũsumbĩ wa Yuta

(2Mav 36.9-10)

8Yeoiakini atw'ĩkie mũsumbĩ wa Yuta e na ũkũũ wa myaka ĩkũmi na nyanya. Asumbĩkie myei ĩtatũ e Yelũsalemu. Inyia wake eetawa Neusita mwĩĩtu wa Elinathani wa ndũa ya Yelũsalemu. 9Yeoiakini nĩwavĩtĩisye Mwĩai Ngai o tondũ ĩthe wake weekie.

10Ĩvindanĩ yĩu asikalĩ ma Nevukatinesa mũsumbĩ wa Mbavilonĩ, nĩmavithũkĩie ndũa ya Yelũsalemu na mamĩlingĩla. 11Nevukatinesa mwene nĩwookie Yelũsalemu, ĩvindanĩ yĩu asikalĩ make mamĩlingĩlĩte. 12#Yel 22.24-30; 24.1-10; 29.1-2 Yeoiakini mũsumbĩ wa Yuta, inyia wake, athũkũmi make, anini make, na anene ma nyũmba yake ya kĩ-ũsumbĩ, nĩmeenenganie kũla kwĩ Nevukatinesa. Mwakanĩ wa nyanya wa kũsumbĩka kwa Nevukatinesa, Yeoiakini nĩwakwatiwe nĩ Nevukatinesa amũtwaa e mwove. 13Nĩwakuie ũthwii w'onthe wa Ĩkalũ na wa nyũmba ya kĩ-ũsumbĩ aũtwaa Mbavilonĩ, kwĩanana na ũndũ Mwĩai Ngai waneenete. O ta ũu nĩwakuie syĩndũ sya thaavu syonthe, ila Solomoni mũsumbĩ wa Ĩsilaeli waseũvĩtye itũmĩawe Ĩkalũnĩ. 14Nevukatinesa nĩwatwaie andũ onthe ma Yelũsalemu me ove: Anene onthe ma ũsumbĩ wa Yuta, aũme onthe ala maĩ ngũmbaũ, andũ onthe ala maĩ na ũĩ wa kũseũvya syĩndũ na atwii ma syũma. Ũtalo woo onthe waĩ andũ ngili ĩkũmi. Vai mũndũ waatiwa ate o andũ ala ngya ma nthĩ ya Yuta.

15 # Esek 17.12 Nevukatinesa nĩwatwaie Yeoiakini Mbavilonĩ e mwove, vamwe na inyia wake, iveti syake, anini make, na atongoi onthe ma Yuta. 16Nevukatinesa nĩwatwaie Mbavilonĩ aũme ngili mũonza ala maĩ ngũmbaũ, na andũ angĩ ngili ĩmwe ala maĩ na ũĩ wa kũseũvya syĩndũ, vamwe na atwii ma syũma. Andũ asu onthe maĩ na vinya wa kũkita.

17 # Yel 37.1; Esek 17.13 Nevukatinesa nĩwatw'ĩkĩthisye Matania, ũla waĩ mwendw'a-ĩthe wa Yeoiakini mũsumbĩ ĩtina wake, na aalyũla ĩsyĩtwa yake amwĩta Nzetekia.

Nzetekia Mũsumbĩ wa Yuta

(2Mav 36.11-12; Yel 52.1-3)

18 # Yel 27.1-22; 28.1-17 Nzetekia atw'ĩkie mũsumbĩ wa Yuta e na ũkũũ wa myaka mĩongo ĩlĩ na ũmwe. Asumbĩkie myaka ĩkũmi na ũmwe e Yelũsalemu. Inyia wake eetawa Amutali mwĩĩtu wa Yelemia ũla watwĩe ndũanĩ ya Livina. 19Nzetekia nĩwavĩtĩisye Mwĩai Ngai, o tondũ Yeoiakimu weekie. 20#Esek 17.15 Mwĩai Ngai nĩwathatiw'e mũno nĩ andũ ma Yelũsalemu na ma Yuta, nginya amalũngya maume mbee wake.

Currently Selected:

2Asu 24: KAMBA

Highlight

Copy

Compare