2Mav 36

Mũsumbĩ Yeoaasi wa Yuta

(2Asu 23.30-35)

1Andũ ma Yuta nĩmanyuvie Yeoaasi mwana wa Yosia, na mamwĩtĩkĩsya mauta atw'ĩka mũsumbĩ woo ĩtina wa ĩthe wake. 2Yeoaasi atw'ĩkie mũsumbĩ wa Yuta e na ũkũũ wa myaka mĩongo ĩlĩ na ĩtatũ. Asumbĩkie vandũ va ĩvinda ya myei ĩtatũ e Yelũsalemu. 3Mũsumbĩ Neko wa Misili nĩwamũvenie ũsumbĩ, amumya Yelũsalemu na aumĩthya andũ ma Yuta na vinya koti wa kĩlo ngili itatũ na maana ana sya silĩva, na kĩlo mĩongo ĩtatũ na inya sya thaavu. 4#Yel 22.11-12 Nĩvo ĩndĩ Neko watw'ĩkĩthisye Eliakimu mwana-a-ĩthe wa Yeoaasi mũsumbĩ wa Yuta na Yelũsalemu. Neko nĩwaalyũlile ĩsyĩtwa ya Eliakimu amwĩta Yeoiakimu. Ĩndĩ Neko nĩwoosie Yeoaasi mwana-a-ĩthe wa Eliamu amũtwaa nthĩ ya Misili.

Mũsumbĩ Yeoiakimu wa Yuta

(2Asu 23.36—24.7)

5 # Yel 22.18-19; 26.1-6; 35.1-19 Yeoiakimu atw'ĩkie mũsumbĩ e na ũkũũ wa myaka mĩongo ilĩ na ĩtano. Asumbĩkie vandũ va ĩvinda ya myaka ĩkũmi na ũmwe e Yelũsalemu. Nĩweekaa maũndũ ala matamwendeeasya Mwĩai Ngai, Ngai wake. 6#Yel 25.1-38; 36.1-32; 45.1-5; Nda 1.1-2 Mũsumbĩ Nevukatinesa wa nthĩ ya Mbavilonĩ nĩwavithukĩie nthĩ ya Yuta, na akwata Yeoiakimu amwova na nyololo sya mbulonzi amũtwaa Mbavilonĩ. 7O ta ũu Nevukatinesa nĩwakuie mĩio ĩmwe kuma Ĩkalũnĩ ya Mwĩai Ngai, na athi kũmĩia nyũmbanĩ yake ya kĩ-ũsumbĩ kũu Mbavilonĩ. 8Maũndũ ala angĩ onthe Yeoiakimu weekie yĩla wasumbĩkĩte, na maũndũ ala mathũku weekie, na ala angĩ onthe watũlilwe mũtĩ nũndũ wamo, maandĩkĩtwe Ĩvukunĩ ya Asumbĩ ma Ĩsilaeli na Yuta. Yeoiakini mwana wake nĩwe watw'ĩkie mũsumbĩ ĩtina wake.

Mũsumbĩ Yeoiakini wa Yuta

(2Asu 24.8-17)

9Yeoiakini atw'ĩkie mũsumbĩ e na ũkũũ wa myaka nyanya,#36.9 myaka nyanya: Maandĩko amwe ma tene ma Ndeto ya Ngai maĩtye myaka ĩkũmi na nyanya. Sisya 2Asu 24.8. na asumbĩka vandũ va ĩvinda ya myei ĩtatũ na mĩthenya ĩkũmi e Yelũsalemu. Nĩweekie maũndũ ala matamwendeeasya Mwĩai Ngai. 10#Yel 22.24-30; 24.1-10; 29.1-2; 37.1; Esek 17.12,13 Ĩvinda ya nundu ĩyambĩĩa, Mũsumbĩ Nevukatinesa nĩwatũmie andũ makakwate Yeoiakini mamũete Mbavilonĩ na o ta ũu maitava syĩndũ sya thooa mũnene kuma Ĩkalũnĩ ya Mwĩai Ngai maiete Mbavilonĩ. Nevukatinesa nĩwatw'ĩkĩthisye Nzetekia Mwana-a-ĩthe wa Yeoiakini mũsumbĩ wa Yuta na Yelũsalemu.

Mũsumbĩ Nzetekia wa Yuta

(2Asu 24.18-20; Yel 52.1-3)

11 # Yel 27.1-22; 28.1-17 Nzetekia atw'ĩkie mũsumbĩ wa Yuta e na ũkũũ wa myaka mĩongo ĩlĩ na ũmwe. Asumbĩkie vandũ va ĩvinda ya myaka ĩkũmi na ũmwe e Yelũsalemu. 12Nĩweekie maũndũ ala matamwendeeasya Mwĩai Ngai, Ngai wake. Nzetekia ndaaĩnyivĩsya mwathani Yelemia ũla waneenaa ndeto ila syumĩte kwa Mwĩai Ngai.

Kũsindwa kwa Ndũa ya Yelũsalemu

(2Asu 25.1-21; Yel 52.3-11)

13 # Esek 17.15 Nzetekia nĩwang'endeie Mũsumbĩ Nevukatinesa ũla wamũlasimĩthĩtye akamwĩa nĩevĩte ĩsyĩtwanĩ ya Ngai kana akeethĩwa e mwĩwi. Nzetekia nĩweethĩiwe e na ngũlũ na ngoo mbũmũ na alea kũsyokea Mwĩai Ngai, Ngai wa Ĩsilaeli. 14Anene onthe ma athembi na ma andũ o namo nĩmeethĩiwe mate aĩkĩĩku maatĩĩe maũndũ mathũku ala meekawa nĩ andũ ma mbaĩ ingĩ, na kwa kwĩka ũu mavukya Ĩkalũ yĩla Mwĩai Ngai mwene wavathĩte yĩthĩwe ĩtheu kũu Yelũsalemu. 15Mwĩai Ngai, Ngai wa aaũmae moo nĩwaendeeie kũmatũmĩa athani makamakany'e, nũndũ nĩweew'ĩaa andũ make na Ĩkalũ yake tei. 16Ĩndĩ andũ asu nĩmaendeeie kũvũthya athani ma Ngai, kũleana na ndeto syake na kũthekeea athani asu nginya Mwĩai Ngai athata mũno weethĩa vai ũndũ mavonoka kuma ũthatunĩ ũsu wake.

17 # Yel 21.1-10; 34.1-5 Kwoou Mwĩai Ngai nĩwaetie Mũsumbĩ wa Mbavilonĩ#36.17 Mbavilonĩ: Kana Akalitei. amavithũkĩe. Nĩwooaie andũ ma mũika ma Yuta na ũvyũ o na kũvika amoaĩa Ĩkalũnĩ. Mũsumbĩ ũsu ndeew'ĩaa tei mũndũ o na wĩva, o na ethĩwa nĩ mwanake kana mwĩĩtu, mũndũ mũkũũ kana kyonze; onthe Mwĩai Ngai nĩwamanenganie ũtonyinĩ wa mũsumbĩ ũsu. 18O ta ũu mũsumbĩ ũsu nĩwatavie syĩndũ syonthe ila syaĩ Ĩkalũnĩ; ila nini kana nene, kĩnandũ kya Ĩkalũ, kĩnandũ kya Mũsumbĩ na kya atongoi, na atwaa syĩndũ isu syonthe Mbavilonĩ. 19#1Asu 9.8 Nĩwavĩvisye Ĩkalũ, avalũkangya ngũta sya ndũa ya Yelũsalemu, avĩvya nyũmba syayo syonthe sya kĩ-ũsumbĩ na aananga mĩio yonthe ya yo ya thooa mũnene. 20Nĩwakwatie andũ onthe ala mavonokie malea kũawa na ũvyũ amatwaa Mbavilonĩ. Nĩmatw'ĩkie athũkũmi make, na ma ana make nginya ĩvindanĩ yĩla ũsumbĩ wa Velisia weethĩiwe ũtongoetye. 21#Yel 25.11; 29.10 Ũu weekĩkie nĩ kana maũndũ ala Mwĩai Ngai waneenete kwĩsĩla vala ve mwathani Yelemia meanĩw'e, kana nthĩ ĩkekala ĩte nĩme vandũ va myaka mĩongo mũonza nĩ kana ĩvinda ya Savato ya kũthũmũa yĩla yĩtaatanĩwa yĩanĩw'e.

Kulusu Ayĩaa Ayuti Masyoke kwoo

(Esa 1.1-4)

22Mwakanĩ wa mbee wa kũsumbĩka kwa Kulusu mũsumbĩ wa Velisia, Mwĩai Ngai nĩwatumie ũndũ waneenete kwĩsĩla kwa mwathani Yelemia wĩanĩw'a. Mwĩai Ngai nĩwathangaaisye Mũsumbĩ Kulusu aumye mwĩao ũũ na aitũmana ũthi ũkasomwe na wasya mũnene kĩla vandũ ũsumbĩnĩ wake. Mwĩao ũsu waĩtye atĩĩ:

23 # Ĩsa 44.28 “Mũsumbĩ Kulusu wa Velisia easya atĩĩ, ‘Mwĩai Ngai, Ngai wa ĩtu nũnengete mosumbĩ onthe ĩũlũ wa nthĩ, na akanyuva nĩmwakĩe Ĩkalũ Yelũsalemu nthĩ ya Yuta. Mwĩai Ngai, Ngai wenyu nĩethĩwe nenyu inyw'onthe inyw'ĩ andũ make ala mũkũthi Yelũsalemu.’ ”

Currently Selected:

2Mav 36: KAMBA

Highlight

Copy

Compare