2Mav 31
31
Mũsumbĩ Esekia Aitũngĩĩa Maũndũ ma Ũthaithi
1Yĩla mboka yathelile, andũ onthe ma Ĩsilaeli nĩmaendie ndũanĩ syonthe sya Yuta, na maananga ituĩ sya mavia, matilanga mĩvw'anano ya ngai nga ĩla yĩtawa Asela, na maananga ithembeo na kũndũ kwa kũthaithĩa mĩvw'anano. Nĩmeekie oou kĩla vandũ nthĩ ya Yuta, na isionĩ sya Mbengyameni, Evalaimu na Manase. Nĩvo ĩndĩ andũ ma Ĩsilaeli menũkie ndũanĩ syoo kĩla mũndũ ng'ũndũnĩ yake.
2Mũsumbĩ Esekia nĩwaanisye athembi na Alivai ikundi. Nĩwanengie kĩla ũmwe wĩa wa kũtethya Ĩkalũnĩ ya Mwĩai Ngai. Wĩa ũsu waĩ vamwe na kũthemba nthembo sya kũvĩvw'a na nthembo sya ngwatanĩo, kũtũnga mũvea na kũthaitha.
3 #
Mot 28.1—29.39
Kuma indonĩ syake mwene, mũsumbĩ nĩwanenganie nyamũ kwondũ wa nthembo sya kũvĩvw'a sya kĩla kwakya na wĩoo, na sya kũthemba mũthenyanĩ wa Savato, ĩvindanĩ ya Mboka ya Kũtisa kwa Mwei, na mbokanĩ ila itw'ĩtwe kwĩanana na ũndũ mĩao ya Mwĩai Ngai yaĩtye.
4 #
Mot 18.12-13,21 Esekia nĩweeaĩie andũ ala matũaa Yelũsalemu manengae athembi na Alivai kĩlungu kĩla kĩmaĩlĩte, nĩ kana athembi asu na Alivai meyumye ĩvinda yonthe kwĩanĩsya Mĩao ya Mwĩai Ngai. 5Mwĩao ũsu wamina kũnenganwe oou, andũ ma Ĩsilaeli nĩmanenganie kwa ngoo ya kwenda ũsyao wa mbee wa ngetha ya mbaa mbeke, ndivai, mauta, ũkĩ wa nzũkĩ na ngetha yonthe ya mũũndanĩ. O ta ũu nĩmaetie syĩndũ mbingĩ ila syaĩ kĩlungu kya ĩkũmi kya syĩndũ syonthe. 6Andũ onthe ala matũaa ndũanĩ sya Yuta nĩmaetie ilungu sya ĩkũmi sya ng'ombe syoo na malondu, na o ta ũu maete mĩthĩnzĩo mingĩ, na mavatha syĩndũ isu kwondũ Mwĩai Ngai, Ngai woo. 7Mambĩĩie kũete mĩthĩnzĩo ĩsu mweinĩ wa katatũ, na maendeea kũmyongeleela myeinĩ ĩna ĩla yaatĩĩe. 8Yĩla Mũsumbĩ Esekia na anini make moonie ũndũ syĩndũ ila syanenganiwe syaingĩvĩte, nĩmataĩie Mwĩai Ngai na andũ make Ĩsilaeli. 9Esekia nĩwaneenie na athembi na Alivai ĩũlũ wa mĩthĩnzĩo ĩsu, 10na Asalia Mũthembi Mũnene ũla waĩ nzyawa ya Nzatoki amwĩa atĩĩ, “Nũndũ andũ nĩmambĩĩe kũete mĩthĩnzĩo yoo Ĩkalũnĩ, nĩvethĩĩtwe lĩu mwingĩ wa ũya, na mwingĩ ũkatiala. Twĩ na syĩndũ ii syonthe nũndũ Mwĩai Ngai nũathimĩte andũ make.”
11Mũsumbĩ nĩweeaie nyũmba sya kwia syĩndũ iseũvw'e Ĩkalũnĩ ya Mwĩai Ngai, na ũu weekwa. 12Nĩvo ĩndĩ malikilye nyũmbanĩ isu syĩndũ ila andũ maumĩtye, ilungu sya ĩkũmi, na ila syavathĩtwe kwondũ wa Mwĩai Ngai. Nĩmanengie Mũlivai weetawa Konania wĩa wa kũũngamĩa syĩndũ isu, na Simei mwana-a-inyia wake nĩwe waĩ mũnini wake. 13Mũsumbĩ Esekia na Asalia mũnene wa Ĩkalũ nĩmanyuvie Yeieli, Asasia, Naathi, Asaeli, Yelimothi, Yosavati, Elieli, Isimakia, Maathu na Mbenaia methĩwe asyaĩĩsya ma kũtetheesya Konania na Simei. 14Kole mwana wa Imina ũla waĩ Mũlivai, na waĩ mũsũvĩi wa Mũvĩa wa Ngalĩko ya Wumĩlonĩ wa syũa wa Ĩkalũ, nĩwe waũngamĩe nthembo ila syaumĩaw'a Ngai na ngoo ya kwenda, na kũnengane syĩndũ ila syaetewe Mwĩai Ngai, na mĩthĩnzĩo ĩla mĩvathe. 15Eteni, Miniamini, Yesua, Semaia, Aamalia, na Sekania, nĩmatetheeisye Kole kwa ũĩkĩĩku ndũanĩ ila athembi mekalaa kũnenga ana-a-ĩthe moo Alivai syĩndũ kwĩanana na ikundi syoo; anene na anini. 16O ta ũu, nĩmanengie aũme ala maĩ na ũkũũ wa myaka ĩtatũ#31.16 myaka ĩtatũ: Maandĩko amwe ma Ndeto ya Ngai maĩtye myaka mĩongo ĩtatũ. na mbee, ala masyĩtwa moo matalĩtwe mosyaanĩonĩ; onthe ala maĩ matonya kũlika Ĩkalũnĩ ya Mwĩai Ngai, matethye mawĩa me kĩvathũkany'o ma kĩla mũthenya, kwĩanana na mawĩa moo na ikundi syoo. 17Nĩmanengie athembi ala matalĩtwe nĩ mĩsyĩ yoo syĩndũ kwĩanana na masyĩtwa ma mosyaanĩo moo, na o ta ũu manenga Alivai ala maĩ na ũkũũ wa myaka mĩongo ĩlĩ na mbee kwĩanana na wĩa ũla matethasya, na kwĩanana na ikundi syoo. 18Onthe maandĩkĩtwe vamwe na iveti syoo na syana syoo, nũndũ nĩmatethasya mawĩa moo metheetye ĩvinda yonthe. 19Katĩ wa athembi ala matwĩe ndũanĩ ila syanengetwe nzyawa sya Alũni, kana isesinĩ sya kũĩthya sya ndũa isu, kwaĩ aũme matethasya wĩa wa kũaany'a syĩndũ nesa kwa aũme onthe ma kĩla mũsyĩ wa kĩ-ũthembi, na kwa andũ onthe ala maandĩkĩtwe mosyaanĩonĩ ma Alivai.
20Maũndũ asu nĩmo Mũsumbĩ Esekia weekie kĩla vandũ nthĩ ya Yuta. Nĩweekaa maũndũ ala maĩ maseo na maĩlĩte, na aĩ mũĩkĩĩku kũla kwĩ Mwĩai Ngai, Ngai wake. 21Nĩwaendeeie nesa nũndũ maũndũ onthe ala weekaa kwondũ wa Ĩkalũ, na kwondũ wa kwĩanĩsya mĩao, amekaa eyumĩtye kwa ũĩkĩĩku na enenganĩte kũla kwĩ Ngai wake.
Currently Selected:
2Mav 31: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
