1Mav 27

Wĩa ũla Watethaw'a nĩ Asikalĩ

1Aa nĩmo masyĩtwa ma atongoi ma Ĩsilaeli; atongoi ma mĩsyĩ, anene ma asikalĩ ngili, anene ma asikalĩ ĩana, na anene moo ala matethasya wĩa kwa mũsumbĩ. Kĩla mweinĩ wa mwaka, kĩkundi kya asikalĩ ngili mĩongo ĩlĩ na inya kĩ kĩvathũkany'o, nĩkyatethasya wĩa kĩũngamĩwe nĩ mũtongoi wa mwei ũsu.

2Yasoveamu mwana wa Nzavutieli nĩwe waũngamĩe kĩkundi kya mbee kya asikalĩ ngili mĩongo ĩlĩ na inya, kĩla kyatethasya wĩa mweinĩ wa mbee. 3Yasoveamu aĩ nzyawa ya Velesi, na nĩwe waũngamĩaa anene onthe ma asikalĩ ma kaũ mweinĩ wa mbee.

4Ndotai nzyawa ya Aoo nĩwe waũngamĩe kĩkundi kya kelĩ kya asikalĩ ngili mĩongo ĩlĩ na inya, kĩla kyatethasya wĩa mweinĩ wa kelĩ. Ũla wamũatĩĩe ũtongoinĩ aĩ Mikilothi.

5Mbenaia mwana wa mũthembi Yeoiata nĩwe waũngamĩe kĩkundi kya katatũ kya asikalĩ ngili mĩongo ĩlĩ na inya, kĩla kyatethasya wĩa mweinĩ wa katatũ. 6Ũsu nĩ Mbenaia ũla waĩ ngũmbaũ katĩ wa “Ala Mĩongo Ĩtatũ” na nĩwe wamaũngamĩe. Amisavati mwana wake nĩwe wamũatĩĩe ũtongoinĩ.

7Asaeli mwana-a-inyia wa Yoavu nĩwe waũngamĩe kĩkundi kya kana kya asikalĩ ngili mĩongo ĩlĩ na inya, kĩla kyatethasya wĩa mweinĩ wa kana. Nzevatia mwana wake nĩwe watw'ĩkie mũtongoi wa kĩkundi kĩu ĩtina wake.

8Samuthi ũla waĩ wa mũsyĩ wa Isali, nĩwe waũngamĩe kĩkundi kya katano kya asikalĩ ngili mĩongo ĩlĩ na inya, kĩla kyatethasya wĩa mweinĩ wa katano.

9Ila mwana wa Ikesi wa kuma Tekoa, nĩwe waũngamĩe kĩkundi kya thanthatũ kya asikalĩ ngili mĩongo ĩlĩ na inya, kĩla kyatethasya wĩa mweinĩ wa thanthatũ.

10Elesi kuma Veloni, ũla waĩ wa mbaĩ ya Evalaimu, nĩwe waũngamĩe kĩkundi kya mũonza kya asikalĩ ngili mĩongo ĩlĩ na inya, kĩla kyatethasya wĩa mweinĩ wa mũonza.

11Sivekai kuma Usathi, ũla waĩ wa mũsyĩ wa Nzela, nĩwe waũngamĩe kĩkundi kya nyanya kya asikalĩ ngili mĩongo ĩlĩ na inya, kĩla kyatethasya wĩa mweinĩ wa nyanya.

12Avieseli kuma Anathothi, ũla waĩ wa mbaĩ ya Mbengyameni, nĩwe waũngamĩe kĩkundi kya kenda kya asikalĩ ngili mĩongo ĩlĩ na inya, kĩla kyatethasya wĩa mweinĩ wa kenda.

13Maalai kuma Netova, ũla waĩ wa mũsyĩ wa Nzela, nĩwe waũngamĩe kĩkundi kya ĩkũmi kya asikalĩ ngili mĩongo ĩlĩ na inya, kĩla kyatethasya wĩa mweinĩ wa ĩkũmi.

14Mbenaia kuma Vilathoni, ũla waĩ wa mbaĩ ya Evalaimu, nĩwe waũngamĩe kĩkundi kya ĩkũmi na kĩmwe kya asikalĩ ngili mĩongo ĩlĩ na inya, kĩla kyatethasya wĩa mweinĩ wa ĩkũmi na ũmwe.

15Elitai kuma Netova, ũla waĩ wa mũsyĩ wa Othinieli, nĩwe waũngamĩe kĩkundi kya ĩkũmi na ilĩ kya asikalĩ ngili mĩongo ĩlĩ na inya, kĩla kyatethasya wĩa mweinĩ wa ĩkũmi na ĩlĩ.

Atongoi ma Mbaĩ Sya Ĩsilaeli

16Aa nĩmo masyĩtwa ma atongoi ala maũngamĩe mbaĩ sya Ĩsilaeli:

Mbaĩ ya Lũveni yaũngamĩwe nĩ Elieseli mwana wa Nzikili;

mbaĩ ya Simioni yaũngamĩwe nĩ Sevatia mwana wa Maaka;

17mbaĩ ya Livai yaũngamĩwe nĩ Asavia mwana wa Kemũeli;

mbaĩ ya Alũni yaũngamĩwe nĩ Nzatoki;

18mbaĩ ya Yuta yaũngamĩwe nĩ Eliu mwana-a-inyia wa Ndeviti;

mbaĩ ya Isakali yaũngamĩwe nĩ Omili mwana wa Mikaeli;

19mbaĩ ya Nzevuluni yaũngamĩwe nĩ Isimaia mwana wa Ovatia;

mbaĩ ya Navutalĩ yaũngamĩwe nĩ Yelimothi mwana wa Asilieli;

20Mbaĩ ya Evalaimu yaũngamĩwe nĩ Osea mwana wa Asaia;

nyusu ĩmwe ya mbaĩ ya Manase yaũngamĩwe nĩ Yoeli mwana wa Vetaia;

21nyusu ĩla ĩngĩ ya mbaĩ ya Manase ĩla yatwĩe Ngileati yaũngamĩwe nĩ Ito mwana wa Nzekalia;

mbaĩ ya Mbengyameni yaũngamĩwe nĩ Yaasieli mwana wa Avineli;

22mbaĩ ya Ndani yaũngamĩwe nĩ Asaleli mwana wa Yeloamu.

Asu nĩmo atongoi ala maũngamĩe mbaĩ sya Ĩsilaeli.

23 # Mwa 15.5; 22.17; 26.4 Mũsumbĩ Ndeviti ndaatala andũ ala me na ũkũũ wĩ ĩtheo wa myaka mĩongo ĩlĩ, nũndũ Mwĩai Ngai nĩwathanĩte kana akatuma andũ ma Ĩsilaeli methĩwa me aingĩ ta ndata sya yayaya. 24#2Sam 24.1-15; 1Mav 21.1-14 Yoavu, ũla inyia wake weetawa Nzeluia, nĩwambĩĩie kũtala andũ, ĩndĩ ndaamina kũtala. Ngai nĩwakanisye Ĩsilaeli nũndũ wa kũtalwa kũu, kwoou ũtalo w'onthe ndwaandĩkwa mavukunĩ ma kũandĩka maũndũ ma mavinda ma Mũsumbĩ Ndeviti.

Andũ ala Maũngamĩe Syĩndũ sya Kĩ-ũsumbĩ

25Aa nĩmo masyĩtwa ma andũ ala maũngamĩe syĩndũ sya kĩ-ũsumbĩ:

Asimavethi mwana wa Atieli, nĩwe waũngamĩe nyũmba sya kĩ-ũsumbĩ sya kwia syĩndũ.

Yonathani mwana wa Usia, nĩwe waũngamĩe nyũmba sya kwia syĩndũ: Nyũmba ila syaĩ mĩũndanĩ, ndũanĩ, motũinĩ na syĩndũ ila syaĩ myakonĩ mĩtũlu ya kũsunga.

26Esili mwana wa Keluvu, nĩwe waũngamĩe athũkũmi ala matethasya wĩa wa kũĩma mĩũndanĩ.

27Simei kuma Lama, nĩwe waũngamĩe mĩũnda ya mĩsavivũ.

Saveti kuma Sivimi nĩwe waungamĩe ũsyao wa mĩũnda ya mĩsavivũ na syĩndũ ila syeekĩawa ndivai.

28Mbaali-aanani kuma Ngeteli, nĩwe waũngamĩe mĩthata na mĩkũyũ, ĩla yaĩ nguumo wa iĩma ila syĩ ũthũĩlonĩ wa syũa.

Yoasi nĩwe waũngamĩe kũla kwaiawa mauta.

29Sitilai kuma Saloni, nĩwe waũngamie ndĩthya sya ng'ombe ila syaĩ Ũiĩnĩ wa Saloni.

Savati mwana wa Atilai nĩwe waũngamĩe ndĩthya sya ng'ombe ila syaĩ myandanĩ.

30Ovili wa mbaĩ ya Ĩsumaeli nĩwe waũngamĩe ndĩthya sya ngamĩle.

Yeteia kuma Melonothi nĩwe waũngamĩe ndĩthya sya mang'oi.

31Yasisi mũakali nĩwe waũngamĩe ndĩthya sya mbũi na malondu.

Andũ asu onthe nĩmo maũngamĩe syĩndũ sya Mũsumbĩ Ndeviti.

Atai ma Mũsumbĩ Ndeviti

32Yonathani, mwendw'a-ĩthe wa Ndeviti aĩ mũtai, mũndũ weesĩ maũndũ na mũandĩki. We e na Yeieli mwana wa Akimoni, nĩmo maũngamĩe wĩa wa kũsomethya ana ma mũsumbĩ. 33Aithoveli aĩ mũtai wa mũsumbĩ, na Usiai Mũaliki aĩ mũnyanyae wa mũsumbĩ. 34Ĩtina wa kĩkw'ũ kya Aithoveli, Aviathali na Yeoiata mwana wa Mbenaia, nĩmo matw'ĩkie atai. Yoavu nĩwe waĩ mũnene wa asikalĩ ma kaũ ma kĩ-ũsumbĩ.

Currently Selected:

1Mav 27: KAMBA

Highlight

Copy

Compare