1Mav 22

1Nĩvo ĩndĩ Ndeviti waneenie asya atĩĩ, “Vaa nĩvo Ĩkalũ ya Mwĩai Ngai yĩĩthĩwa, na novo veĩthĩwa kĩthembeo kĩla andũ ma Ĩsilaeli methembeaa nthembo sya kũvĩvw'a.”

Kwĩyũmbanĩsya Kwaka Ĩkalũ

2Ndeviti nĩweeaie aeni ala matwĩe Ĩsilaeli mombane vamwe, na kuma katĩ woo anyuva andũ ma kwasa mavia, nĩ kana mase mavia ma kwaka Ĩkalũ. 3Nĩwanenganie syũma mbingĩ sya kũseũvya mĩsumaa kwondũ wa mĩomo ya mĩvĩa, na sya kũseũvya syĩndũ sya kũkwatany'a mĩomo. O ta ũu nĩwanenganie mbulonzi mbingĩ ĩtathimĩka. 4Nĩwanenganie iting'ĩ mbingĩ sya mĩkũũ itatonya kũtalĩka, nĩkwĩthĩwa Asitoni na andũ kuma Tile nĩmamũeteie iting'ĩ mbingĩ. 5Ndeviti nĩwaisye atĩĩ, “Solomoni mwana wakwa nĩ mũnini, na nde na ũmanyi mwingĩ, na nyũmba ĩla yaĩlĩte kwakĩwa Mwĩai Ngai yaĩlĩte kwĩthĩwa yĩ nene mũno na yĩ nguma, na ya kwendeesya andũ onthe. Kwoou nĩngũmbany'a syĩndũ sya kũmyaka.” Ndeviti nĩwoombanisye syĩndũ mbingĩ mũno kwondũ wa kwaka Ĩkalũ atanamba kũkw'a.

6Nĩvo ĩndĩ Ndeviti watũmanie Solomoni mwana wake, na amwĩaĩa amwĩa nĩakĩe Mwĩai Ngai, Ngai wa Ĩsilaeli Ĩkalũ. 7#2Sam 7.1-16; 1Mav 17.1-14 Ndeviti nĩwamwĩie atĩĩ, “Mwana wakwa, nĩnĩnendaa kwaka Ĩkalũ kwondũ wa kũnenga Mwĩai Ngai, Ngai wakwa ndaĩa. 8Ĩndĩ Mwĩai Ngai anambĩie nĩnũaĩte andũ aingĩ, na ngokita makaũ maingĩ. Kwoou nũndũ wa kwĩtĩkya nthakame, ndaneeĩtĩkĩla nĩmwakĩe Ĩkalũ. 9Ĩndĩ ũu wĩ o vo, Mwĩai Ngai nĩwathanie asya atĩĩ, ‘Ũkeethĩwa na mwana, ũla ũkasumbĩka na mũuo, nũndũ ngamũnenga mũuo kuma kwa amaitha make onthe. Ĩsyĩtwa yake akeetwa Solomoni#22.9 Solomoni: Ĩsyĩtwa yĩĩ yumanĩte na ndeto ya Kĩevelania ĩla ũalyũlo wayo nĩ mũuo na ũsũvĩo. nũndũ ĩvindanĩ ya kũsumbĩka kwake, nganenga andũ ma Ĩsilaeli mũuo na kũmasũvĩa. 10Ũsu nĩwe ũkambakĩa Ĩkalũ. Akeethĩwa mwana wakwa, nakwa ngeethĩwa ĩthe wake. Ngalũlũmĩĩlya kĩvĩla kyake kya ũsumbĩ andũnĩ ma Ĩsilaeli tene na tene.’ ”

11Ndeviti nĩwaendeeie kũneena na Solomoni amwĩa atĩĩ, “Yu mwana wakwa, Mwĩai Ngai, Ngai waku nĩethĩwe vamwe naku. Nĩeanĩsye watho wake nĩ kana atume ũendeea nesa wĩanĩ wa kũmwakĩa Ĩkalũ. 12O ta ũu nĩakũnenge ũĩ na ũmanyi, nĩ kana ũsumbĩke Ĩsilaeli kwĩanana na mĩao yake. 13#Yos 1.6-9 Weanĩsya motw'ĩo na myamũlo ĩla Mwĩai Ngai wanengie Mwose kwondũ wa Ĩsilaeli, ũkaendeea nesa. Ĩthĩwa na vinya na ũkũmbaũ. Ndũkakĩe kana kũkw'a ngoo. 14Nĩnũmbanĩtye na thĩna mwingĩ syĩndũ sya kwaka Ĩkalũ ya Mwĩai Ngai: Mbee wa kĩlo milioni itatũ na ngili maana ana sya thaavu, mbee wa kĩlo milioni mĩongo ĩtatũ na inya sya silĩva, nĩ kana itũmĩwe wĩanĩ ũsu. Ũu wĩ o vo, ve mbulonzi mbingĩ na kyũma, na nĩ na mĩtĩ na mavia. Ĩndĩ no nginya wũmbany'e syĩndũ ingĩ wongeleele. 15Wĩna athũkũmi aingĩ: Andũ ma kwasa mavia, mavundi ma kwaka, na ma mbwaũ. O ta ũu wĩ na andũ me na ũmanyi wa kũtethya wĩa wa kĩla mũthemba. 16Nĩmatonya kũthũkũma na thaavu, silĩva, mbulonzi na kyũma. Wĩ na athũkũmi aingĩ mbee wa ũndũ ũtonya kwenda. Yu ambĩĩa wĩa, na Mwĩai Ngai nĩethĩwe vamwe naku.”

17Ndeviti nĩweeaĩie atongoi onthe ma Ĩsilaeli amea matetheesye Solomoni. 18Nĩwameie atĩĩ, “Mwĩai Ngai, Ngai wenyu nĩwĩthĩĩtwe vamwe nenyu na akamũnenga mũuo kuma amaithanĩ menyu onthe. Nĩwatumie nĩsinda andũ onthe ala matwĩe nthĩ ĩno, nayu andũ asu me ungu wa ũtonyi wa Mwĩai Ngai na andũ make. 19Thũkũmai Mwĩai Ngai, Ngai wenyu na ngoo, na thayũ wenyu w'onthe. Ambĩĩai kwaka Ĩkalũ, nĩ kana mwie Ĩsandũkũ ya Ũtianĩo ya Mwĩai Ngai vo, na syĩndũ ila ingĩ syonthe ntheu ĩtũmĩawa ũthaithinĩ wake.”

Currently Selected:

1Mav 22: KAMBA

Highlight

Copy

Compare