1Mav 20
20
Ndeviti Aikwata Ndũa ya Lava
(2Sam 12.26-31)
1 #
2Sam 11.1
Mwaka ũyambĩĩa, ĩvinda yĩla asumbĩ maendaa kaũnĩ, Yoavu nĩwatongoesye asikalĩ mathi kũkita nthĩ ya Amimoni, ĩndĩ Mũsumbĩ Ndeviti nĩwatiiwe Yelũsalemu. Nĩmathyũlũlũkile ndũa ya Lava, mamyũkita na mamyananga. 2Ngai ya mũvw'anano ya Aamimoni ĩla yeetawa Moleki#20.2 Ngai ya mũvw'anano ya Aamimoni ĩla yeetawa Moleki: Maandĩko amwe maĩtye Mũsumbĩ wa Aamimoni. yaĩ na ngovia ya kĩ-ũsumbĩ ya thaavu yaĩ na ũito wa ta kĩlo mĩongo ĩtatũ na inya. Ngovianĩ ĩsu vaĩ ĩvia ya thooa mũnene, yĩla Ndeviti woosie na eekĩa ngovianĩ yake ya kĩ-ũsumbĩ. O ta ũu nĩwakuie syĩndũ mbingĩ ila watavie ndũanĩ ĩsu. 3Nĩwakwatie andũ ala maĩ ndũanĩ ĩsu na amanenga wĩa wa kũthũkũma na mĩsumeno, maembe ma kyũma na mathoka. Nĩweekanie na andũ ma ndũa ila ingĩ sya Aamimoni o ũu, na ĩndĩ asyoka Yelũsalemu e na asikalĩ make.
Andũ ma Ĩsilaeli Mayũkita na Avilisiti
(2Sam 21.15-22)
4Ĩtina wa maũndũ asu, andũ ma Ĩsilaeli nĩmokitĩie na Avilisiti ndũanĩ ya Ngeseli. Yĩĩ nĩ ĩvinda yĩla Sivekai ũla waumĩte ndũanĩ ya Usathi wooaie mũndũ mũnene mũasa weetawa Sivai, na Avilisiti masindwa.
5 #
1Sam 17.4-7
Andũ ma Ĩsilaeli nĩmokitie ĩngĩ na Avilisiti, na Elianani mwana wa Yaili ooaa Lami, mwana-a-ĩthe wa Ngoliathi kuma ndũanĩ ya Ngathi, ũla mũtĩ wa ĩtumo yake wathanthaĩte ta mũamba ũla ũtũmĩawa nĩ mũndũ ũla ũtumaa ngũa.
6O ta ũu andũ ma Ĩsilaeli nĩmokitĩie na Avilisiti ndũanĩ ya Ngathi, vala vaĩ mũndũ ũngĩ mũnene mũasa waĩ na syaa thanthatũ kĩla kw'oko, na syaa thanthatũ kĩla kũũ. Mũndũ ũsu aĩ nzyawa ya andũ ma tene maĩ anene na aasa.
7Nĩwavũthisye andũ ma Ĩsilaeli, na Yonathani mwana wa Simea, mwana-a-ĩthe wa Ndeviti amũaa.
8Andũ asu atatũ ala mooaiwe nĩ Ndeviti na asikalĩ make maĩ nzyawa sya andũ anene na aasa ma Ngathi.
Currently Selected:
1Mav 20: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
