Mat 19

Yesũ Aimanyĩsya ĩũlũ wa Kũtaanĩsya kwa Andũ Matwaanĩte

(Mk 10.1-12)

1Yesũ amina kũneena maũndũ asu onthe, nĩwaumie Kalilii athi nthĩ ya Yutia, ngalĩko ĩla ĩngĩ ya Ũsĩ wa Yolotani. 2Andũ aingĩ nĩmamũatĩĩie, nake amavoesya kũu ala maĩ awau katĩ woo.

3Avalisi amwe nĩmookie vala ũĩ mayenda kũmũtata na kwoou mamũkũlya atĩĩ, “Nĩ waĩlu mũndũ kũlũngya mũka kwondũ wa ũndũ o na wĩva?”

4 # Mwa 1.27; 5.2 Yesũ amasũngĩa amea atĩĩ, “Inyw'ĩ no mwaasoma Maandĩkonĩ Matheu kana mwambĩlĩĩlyonĩ Ngai ayũmba andũ, oombie mũndũ-ũme na mũndũ mũka? 5#Mwa 2.24 Ngai nĩwaisye atĩĩ, ‘Kĩu nĩkyo kĩtumaa mũndũ-ũme auma kwa ĩthe na nyinyia, na kũlũmany'a na mũka wake, na elĩ makĩtw'ĩka kĩndũ kĩmwe.’ 6Kwa kĩtumi kĩu, ti andũ elĩ ĩngĩ, ĩndĩ nĩ kĩndũ kĩmwe. Kwoou mũndũ o na wĩva ndakaataany'e ala Ngai ũkwatanĩtye.”

7 # Kũt 24.1-4; Mat 5.31 Avalisi asu mamũkũlya Yesũ atĩĩ, “Na nĩkĩ Mwose waandĩkie mwĩao ũkwasya kana, mũndũ-ũme nũtonya kũandĩkĩa mũka valũa wa kũmũlea na akĩmũlũngya athi vyũ?”

8Yesũ amasũngĩa atĩĩ, “Mwose amũnengie mwanya wa kũlũngya aka menyu nũndũ wa wũmũ wa ngoo syenyu. Ĩndĩ ũu ti w'o Ngai wavangĩte ĩvinda yĩla woombie mũndũ-ũme na mũndũ mũka. 9#Mat 5.32; 1Ako 7.10-11 Nakwa ĩndĩ ekai nĩmũtavye, mũndũ ũla ũlũngasya mũka kwa kĩtumi kĩngĩ, eka kwondũ wa kũmanyana kĩ-mwĩĩ na aũme angĩ, na aitwaa mũndũ mũka ũngĩ, ethĩawa akĩlaalaa.”

10Amanyĩw'a make mamwĩa atĩĩ, “Ethĩwa ũu nĩw'o kũilyĩ katĩ wa mũndũ na mũka, vai vata wa kũtwaana.” 11Yesũ amasũngĩa atĩĩ, “Ti andũ onthe matonya kũatĩĩa ũmanyĩsyo ũũ, ĩndĩ no ala Ngai ũmatonyethetye kũwũatĩĩa. 12Ve itumi syĩ kĩvathũkany'o ila ituma aũme amwe matatwaana. Amwe nũndũ masyaiwe me avakũĩku; angĩ nĩmavakũiwe nĩ andũ na kwoou maitonya kũtwaana. Aũme angĩ nĩmeyumĩtye maikatwaane nĩ kana matonye kũmũthũkũma Ngai nesa. Mũndũ ũla ũtonya kũatĩĩa ũmanyĩsyo ũũ, nawũatĩĩe.”

Yesũ Aiathima Syana Nini

(Mk 10.13-16; Lk 18.15-17)

13Andũ amwe nĩmaeteie Yesũ syana nini asilĩĩle moko na kũivoyea, ĩndĩ amanyĩw'a make mamasiĩĩa kwĩka ũu. 14Yesũ nĩweeie amanyĩw'a make atĩĩ, “Ekanai na syana nini syũke vala nĩĩ, mũikaisiĩĩe, nũndũ ũsumbĩ wa ĩtu nĩ wa ala mailyĩ tasyo.”

15Nĩvo ĩndĩ Yesũ wasilĩĩile moko na auma vau athi.

Mwanake Mũthwii Ayenda Thayũ Ũtathela

(Mk 10.17-31; Lk 18.18-30)

16Ĩvinda yĩmwe mwanake ũmwe nĩwaendie vala ve Yesũ amũkũlya atĩĩ, “Mũmanyĩsya, nĩ ũndũ wĩva mũseo naĩlĩte kwĩka nĩ kana nĩkwate thayũ ũtathela?”

17Yesũ amũkũlya, “Ũtonya ata kũngũlya ĩũlũ wa ũndũ ũla mũseo? No Ngai e weka mũseo. Ethĩwa nũkwenda kũkwata thayũ ũtathela, kwata Mĩao ya Ngai.”

18 # Kuma 20.13-16; Kũt 5.17-20 Mwanake ũsu amũkũlya atĩĩ, “Mĩao yĩva ya Ngai?” Yesũ amũsũngĩa, “Ndũkoae mũndũ; ndũkalaalae; ndũkoye; ndũkanengane ũkũsĩ wa ũvũngũ ĩũlũ wa mũndũ ũngĩ; 19#Kuma 20.12; Kũt 5.16; Ali 19.18 nenga ĩthe waku na inyia waku ndaĩa, na mwende mũtũi waku o ũndũ we mwene wĩyendete.”

20Mwanake ũsu amwĩa atĩĩ, “Mĩao ĩsu yonthe nĩnĩmĩkwataa; ve ũndũ ũngĩ naĩlĩte kwĩka?” 21Yesũ amũsũngĩa amwĩa atĩĩ, “Ethĩwa nũkwenda wĩthĩwe wĩ mwĩanĩu, enda ũkathoosye syĩndũ syonthe ila wĩ nasyo na ũinenga ngya mbesa ila ũũkwata, naku ũkeethĩwa na ũthwii ĩtunĩ. Wamina kwĩka ũu, ũka ũngatĩĩe.”

22Yĩla mwanake ũsu weewie ndeto isu, nĩwaendie ew'ĩte woo mwingĩ nũndũ aĩ mũthwii mũno.

23Nĩvo ĩndĩ Yesũ weeie amanyĩw'a make atĩĩ, “Nĩmũtavya w'o, ũkeethĩwa wĩ ũndũ wĩ vinya mũno kwa mũndũ mũthwii kũlika ũsumbĩnĩ wa ĩtu. 24O ĩngĩ ekai nĩmũtavye, ũkeethĩwa wĩ ũndũ laisi kwa ngamĩle kũlikĩla kalimanĩ ka singano, kũte mũndũ mũthwii kũlika ũsumbĩnĩ wa Ngai.”

25Yĩla amanyĩw'a meewie ũu, nĩmaseng'ie mũno na makũlya atĩĩ, “Nayu nũũ ũla ũtonya kũkwata thayũ ũtathela?” 26Yesũ nĩwamasyaisye na amea atĩĩ, “Kwa andũ ũndũ ũsu ndũtonyeka, ĩndĩ kwa Ngai vai ũndũ ũtatonyeka.”

27Nĩvo ĩndĩ Vetelo weeie Yesũ atĩĩ, “Kau ithyĩ nĩtũtiĩte syĩndũ syonthe tũkakũatĩĩa, tũkakwata ĩtuvi yaũ nũndũ wa ũu?”

28 # Mat 25.31; Lk 22.30 Yesũ amea atĩĩ, “Nĩmũtavya w'o, yĩla Mwana wa Mũndũ eĩkalĩla kĩvĩla kyake kya kĩ-ũsumbĩ nthĩnĩ wa nthĩ nzaũ ĩla yũkĩte, inyw'ĩ ala mwangatĩĩie, mũkekalĩla ivĩla ĩkũmi na ilĩ sya kĩ-ũsumbĩ, mũsumbĩke mbaĩ sya Ĩsilaeli syĩ ĩkũmi na ilĩ. 29O ta ũu mũndũ o na wĩva ũla ũtiĩte mũsyĩ, kana ana-a-inyia, kana eĩtu-a-inyia, kana ĩthe, kana nyinyia, kana syana syake, kana ng'ũndũ yake kwondũ wakwa, akakwata kũndũ ĩana kwa kĩu ũtiĩte na aikwata thayũ ũtathela. 30#Mat 20.16; Lk 13.30 Ĩndĩ aingĩ ala yu matongoetye makatongoew'a na aingĩ ala yu matongoew'e makatongosya.”

Currently Selected:

Mat 19: KAMBA

Highlight

Copy