Mat 1
1
Aaũmae ma Yesũ
(Lk 3.23-38)
1Ũũ nĩw'o ũatĩanĩo wa masyĩtwa ma aaũmae ma Yesũ Klĩsto, nzyawa ya Ndeviti, ũla nake waĩ nzyawa ya Avalaamu:
2Avalaamu asyaie Isaka, na Isaka asyaa Yakovo, na Yakovo asyaa Yuta na ana-a-ĩthe. 3Yuta asyaie Velesi na Nzela, namo inyia woo aĩ Tamalĩ. Velesi nake asyaie Esiloni, na Esiloni asyaa Lama. 4Lama asyaie Aminatavu, na Aminatavu asyaa Nasoni, na Nasoni asyaa Salimoni. 5Salimoni asyaie Mboasi ũla nyinyia aĩ Laavi, Mboasi nake asyaa Oveti ũla nyinyia aĩ Lũthi. Oveti asyaie Yese, 6Yese nake asyaa Mũsumbĩ Ndeviti.
Ndeviti asyaie Solomoni ũla nyinyia aĩ mũka wa Ulia. 7Solomoni nake asyaie Leovoamu, nake Leovoamu asyaa Aviya. Aviya asyaie Asa, 8nake Asa asyaa Yeosavati. Yeosavati asyaie Yeolamu, nake Yeolamu asyaa Usia. 9Usia asyaie Yothamu, Yothamu asyaa Aasu, na Aasu asyaa Esekia. 10Esekia asyaie Manase, nake Manase asyaa Amoni, na Amoni asyaa Yosia. 11#2Asu 24.14-15; 2Mav 36.10; Yel 27.20 Yosia asyaie Yekonia na ana-a-inyia. Ĩvindanĩ yĩu Ayuti nĩmataviwe matwawa nthĩ ya Mbavilonĩ.
12Ĩtina wa Ayuti kũtavwa na kũtwawa Mbavilonĩ, Yekonia nĩwasyaie Sealitieli, nake Sealitieli asyaa Nzelũvaveli. 13Nzelũvaveli asyaie Aviũti, nake Aviũti asyaa Eliakimu, na Eliakimu asyaa Asoli. 14Asoli asyaie Nzatoki, nake Nzatoki asyaa Akimu, na Akimu asyaa Eliũti. 15Eliũti asyaie Eleasali, nake Eleasali asyaa Mathani, na Mathani asyaa Yakovo. 16Yakovo asyaie Yosevu ũla nĩ mũũme wa Meli, inyia wa Yesũ ũla wĩtawa Klĩsto.#1.16 Klĩsto: Klĩsto nĩ ĩsyĩtwa ya ũla wanyuvĩtwe nĩ Ngai ethĩwe Mwovosya wa andũ. Kwa Kĩevelania nĩ Masia
17Kwoou ve nzyawa ĩkũmi na inya kuma Avalaamu kũvika Ndeviti, na ingĩ ĩkũmi na inya kuma Ndeviti kũvika ĩvinda yĩla Ayuti mataviwe matwawa Mbavilonĩ. O ta ũu ve nzyawa ĩkũmi na inya kuma Ayuti matavwa na kũtwawa Mbavilonĩ, kũka kũvika kũsyawa kwa Klĩsto.
Kũsyawa Kwa Yesũ Klĩsto
(Lk 2.1-7)
18 #
Lk 1.27
Kũsyawa kwa Yesũ Klĩsto kwailyĩ ta ũũ: Mwĩĩtu weetawa Meli nĩweevaĩtw'e nĩ mũndũ weetawa Yosevu, ĩndĩ matanamba kũtwaana, eethĩa nĩ mũito kwa vinya wa Veva Mũtheu. 19Ĩndĩ nĩkwĩthĩwa Yosevu aĩ mũndũ mũlũngalu, ndaaenda kwĩkĩĩthya Meli nthoni mbee wa andũ, na kwoou avanga kũmũeka avindĩtye. 20Aendee na kũsũanĩa ũu, mũlaĩka wa Mwĩai nĩwamumĩlĩĩle ndotonĩ amwĩa atĩĩ, “Yosevu, nzyawa ya Ndeviti, ndũkakĩe kũmwosa Meli atw'ĩke mũka waku. Ĩvu yĩla wĩ nayo yumanĩte na ũtonyi wa Veva Mũtheu. 21Akasyaa kavĩsĩ, na ũkaketa Yesũ, nũndũ nĩwe ũkatangĩĩa andũ kuma naĩnĩ syoo.”
22Ũu w'onthe weekĩkie nĩ kana wĩanĩsye kĩla kyaneeniwe nĩ Mwĩai kwĩsĩla kwa Mwathani ayasya atĩĩ, 23#Ĩsa 7.14 “Kwa sisyai, mwĩĩtu ũtaamanyana kĩ-mwĩĩ na mũndũ-ũme akaitava na aisyaa kavĩsĩ, na kakeetwa Ĩmanueli,” ũalyũlo wayo nĩ, “Ngai e vamwe naitũ.”
24Yĩla Yosevu waamũkie nĩwamũtwaie Meli o ũndũ mũlaĩka wamwĩaĩĩte eke. 25#Lk 2.21 Ĩndĩ Yosevu ndaamanyana kĩ-mwĩĩ na Meli mbee wa kũsyaa kavĩsĩ, nake Yosevu aketa Yesũ.
Currently Selected:
Mat 1: KAMBA
Highlight
Share
Copy
Want to have your highlights saved across all your devices? Sign up or sign in
BIBLE SOCIETY OF KENYA © 2011