Yos 7
7
Naĩ ya Akani
1Andũ ma Ĩsilaeli nĩmaleile kwĩanĩsya Mwĩao ũla Mwĩai Ngai waumĩtye kana mayaĩlĩte kwosa kĩndũ o na kĩmwe katĩ wa ila syaaĩlĩte kwanangwa ndũanĩ ya Yeliko. Mũndũ ũmwe weetawa Akani mwana wa Kalimi, mwĩsũkũũe wa Nzaveti, na nzyawa ya Nzela wa mbaĩ ya Yuta nĩwatũlile mwĩao ũsu. Kwoou Mwĩai Ngai nĩwathatiw'e nĩ andũ ma Ĩsilaeli mũno.
2Yosua nĩwatũmie aũme amwe kuma Yeliko mathi ndũanĩ yĩtawa Ai ĩla yĩ ngalĩko ya wumĩlonĩ wa syũa wa Mbethi-eli vakuvĩ na Mbethi-aveni na amea atĩĩ, “Ambatai mwĩvithĩte mũkekuũe ũndũ andũ ma ndũa ya Ai matũaa.” Aũme asu nĩmambatie na meeka ũndũ Yosua wameaĩe. 3Nĩmasyokie kũla kwĩ Yosua na mamwĩa atĩĩ, “Vai vata wa asikalĩ onthe kũthi kũkita andũ ma ndũa ya Ai. Tũma asikalĩ ta ngili ilĩ kana itatũ makavithũkĩe ndũa ya Ai. Ndũkatũme asikalĩ onthe mathi makokite andũ ma ndũa ĩsu, nũndũ andũ mayo ti aingĩ.” 4Kwoou asikalĩ ta ngili itatũ nĩmaendie kũkita andũ ma ndũa ĩsu, ĩndĩ masindwa na masemba makĩĩte andũ ma Ai. 5Aũme ma ndũa ya Ai nĩmamalũngilye kuma mũvĩanĩ wa ndũa ĩsu matheea mathi kũmatiĩla kũndũ kwenzawa mavia na mooaĩa asikalĩ ta mĩongo ĩtatũ na thanthatũ ma Ĩsilaeli vau kĩtheeonĩ. Andũ ma Ĩsilaeli nĩmakwie ngoo na makwatwa nĩ w'ĩa mwingĩ mũno.
6Yosua na atongoi ma andũ ma Ĩsilaeli nĩmatembũangie ngũa syoo nĩ woo na meevalũkya nthĩ mbee wa Ĩsandũkũ ya Ũtianĩo ya Mwĩai Ngai. Nĩmekalile mavalũkĩte vau nginya ĩa mawĩoo meyũmbĩte kĩtoo mũtwe monany'e woo ũla maĩ naw'o. 7Yosua nĩwaisye atĩĩ, “Ĩiaa! Ame Mwĩai Ngai Mũsumbĩ, watũingisye Ũsĩ wa Yolotani nĩkĩ? Watũnenganae ũtonyinĩ wa Aamoli tũawe nĩkĩ? Wendaa ũtwananga? Nenda kethĩwa twaendeeie kwĩkala mũingo ũya ũngĩ wa Ũsĩ wa Yolotani! 8Ame Mwĩai ndyĩsĩ nĩasya ata nũndũ asikalĩ ma Ĩsilaeli nĩmasemba masyoka makĩĩte amaitha moo. 9Andũ ma Kanaani na ala angĩ matwĩe nthĩ ĩno meew'a ũvoo ũsu nĩmekũka na kũtũaa ithyonthe! We yu naku ũkeeka ata nĩ kana ĩsyĩtwa yaku yĩ ndaĩa yĩikavũthw'e?”
10Mwĩai Ngai nĩweeie Yosua atĩĩ, “Ũkĩla we! Ũkometw'e vau nĩ kyaũ? 11Andũ ma Ĩsilaeli nĩmekie naĩ. Nĩmavĩtĩtye kwa kũlea kwĩanĩsya wĩw'ano wakwa namo ũla nameaĩie meanĩsye. Nĩmosete imwe sya syĩndũ ila ĩvathĩtwe syanangwe. Nĩmoyĩte syĩndũ isu, makakengana ĩũlũ wasyo na makaivitha mĩionĩ yoo. 12Kĩu nĩkyo kĩũtuma andũ ma Ĩsilaeli matasinda amaitha moo. Masemba makĩa amaitha moo nũndũ nĩmatw'ĩĩwe kũminwa! Mwalea kwananga syĩndũ ila namwĩaĩie mũikose, ndiendeea kwĩkalany'a nenyu. 13Ũkĩla ũthi ũkathesye andũ na ũimea atĩĩ, ‘Ĩthesyei ene mwĩyũmbanĩsye ũnĩ, nũndũ Mwĩai Ngai, Ngai wa Ĩsilaeli easya kana ve syĩndũ imwe katĩ wa ila namwĩaĩie mwanange syĩ katĩ wenyu. Kwoou mũitonya kũsinda amaitha menyu nginya yĩla mũkaivetanga katĩ wenyu.’ 14Matavye kana ũnĩ kwakya makooka maũngame mbee wakwa kĩla mbaĩ yĩ yoka. Andũ ma mbaĩ ĩla nanyuva makookaa mbee wakwa kĩla mũsyĩ wĩ w'oka. Naw'o mũsyĩ ũla nanyuva ũyũka mbee wakwa, kĩla mũndũ na andũ make. Mũndũ ũla nanyuva na andũ make makookaa mbee wakwa kĩla mũndũ e weka. 15Mũndũ ũla wĩkwatwa e na syĩndũ isu ivathĩtwe syanangwe akavĩvanĩw'a vamwe na andũ make na syĩndũ syake syonthe. Mũndũ ũsu nũleete kwĩanĩsya ũtianĩo wa Mwĩai Ngai na nũetete nthoni mbingĩ katĩ wa andũ ma Ĩsilaeli!”
16Ũnĩ ũsu kwakya tene Yosua nĩwaetie andũ ma Ĩsilaeli mbee wa Mwĩai Ngai kĩla mbaĩ yĩ yoka. Nĩwanyuvie mbaĩ ya Yuta, 17na amaete mbee wa Mwĩai Ngai kĩla mũsyĩ wĩ w'oka. Nĩwanyuvie mũsyĩ wa Nzela na aũete mbee wa Mwĩai Ngai, kĩla mũndũ e na andũ make. Nĩwanyuvie Nzaveti na andũ make, 18na amaete mbee wa Mwĩai Ngai kĩla mũndũ e weka. Akani Mwana wa Kalimi mwĩsũkũũe wa Nzaveti wa mbaĩ ya Yuta, nĩwanyuviwe. 19Yosua nĩwamwĩie atĩĩ, “Mwana wakwa! Neena ũla w'o mbee wa Mwĩai Ngai, Ngai wa Ĩsilaeli, na ũyumbũla. Ndavye yu nĩ ũndũ mwaũ wĩkĩte na ndũkatate kũmbitha.” 20Akani nĩwasũngĩie Yosua amwĩa, “Nĩw'o! Nĩnĩmũvĩtĩsye Mwĩai Ngai, Ngai wa Ĩsilaeli. Nĩkĩte ũndũ ũũ: 21Yĩla ũnaanangaa syĩndũ sya ndũa ya Yeliko, nĩnĩnoonie ngũa ndaasa mbanake kuma Sinali,#7.21 Sinali: Kana Mbavilonĩ kĩlo ilĩ sya silĩva, kĩlungu kya thaavu kĩna ũito wa mbee wa nyusu kĩlo na nasyĩw'ĩa ĩtomo nginya nasyosa. Syĩndũ isu nivithĩte ĩeemanĩ kwakwa na ngaia silĩva ungu wasyo.”
22Yosua nĩweetie andũ na amatũma ĩeemanĩ yĩu namo mathi masembete. Nĩmeethĩie syĩndũ isu ivithĩtwe vo, silĩva wĩ ungu wasyo. 23Nĩmoosie syĩndũ isu kuma ĩeemanĩ na maitwaa vala ve Yosua na andũ onthe ma Ĩsilaeli. Nĩmaiie syĩndũ isu mbee wa Mwĩai Ngai. 24Yosua na andũ onthe ma Ĩsilaeli nĩmakwatie Akani Mwana wa Nzela na moosa silĩva ũsu, kĩlungu kĩu kya thaavu, ngũa ĩsu ndaasa, ana na eĩtu make, ng'ombe, mang'oi, malondu make, ĩeema yake na syĩndũ syake syonthe. Nĩmatwaie syĩndũ isu syonthe nginya Mwandanĩ wa Mathĩna. 25Yosua nĩwakũlilye Akani atĩĩ, “Ũtũeteie thĩna wĩana ũu nĩkĩ? Mwĩai Ngai nũkũkũetee thĩna ũmũnthĩ!” Andũ ma Ĩsilaeli onthe nĩmakimangie Akani na mavia nginya akw'a. O ta ũu nĩmakimangie andũ ma mũsyĩ wake na mamavĩvya vamwe na syĩndũ syake syonthe. 26Nĩmoombĩĩie Akani mbumbu nene ya mavia. Mbumbu ĩsu yĩ o vo o na ũmũnthĩ. Kĩu nĩkyo kĩtumaa vandũ vau vetwa Mwanda wa Mathĩna.
Nĩvo ĩndĩ ũthatu mũnene wa Mwĩai Ngai wathelile.
BIBLE SOCIETY OF KENYA © 2011