Yos 2
2
Yosua Aitũma Andũ Makekuũe Ndũa ya Yeliko kwa Kĩmbithĩ
1 #
Aevl 11.31; Yak 2.25 Yosua mwana wa Nuni nĩwatũmie andũ elĩ kuma Sitimu mathi kwa kĩmbithĩ makekuũe nthĩ ya Kanaani, na mũno mũno ndũa ya Yeliko. Yĩla mavikie ndũanĩ ĩsu nĩmaendie kũkomela nyũmba kwa ĩlwaya yeetawa Laavi. 2Mũsumbĩ wa Yeliko nĩwamanyie kana andũ amwe ma Ĩsilaeli nĩmokie ũtukũ ũsu nĩ kana mamanye ũndũ andũ ma nthĩ ĩsu ya Kanaani matũaa. 3Kwoou mũsumbĩ wa Yeliko nĩwatũmanie kũla kwĩ Laavi ayasya, “Umaalya aũme ala mokie kwaku na malika nyũmbanĩ yaku, nĩkwĩthĩwa mokie kũmanya ũndũ andũ onthe ma nthĩ yaitũ matũaa!”
4Ĩndĩ mũndũ mũka ũsu nĩwoosete aũme asu akamavitha. Nĩwaisye, “Ĩĩ nĩw'o aũme asu nĩmokie kwakwa, ĩndĩ ndyĩsĩ meeumĩte va. 5Aũme asu maendie ĩa mawĩoo, saa ila mĩomo ya ndũa ĩvingawa, na ndyĩsĩ maendie na nzĩa yĩva. Mũkamaatĩĩa na mĩtũkĩ, nĩmũtonya kũmakwata.” 6Ĩndĩ kwa w'o Laavi nĩwatwaĩte aũme asu kĩalanĩ ĩũlũ akamavitha ungu wa mĩtĩ yasyũlaw'a ndii ĩla waiĩte vo. 7Andũ asu mũsumbĩ watũmĩte nĩmaumaalile ndũanĩ ĩsu. Nĩvo ĩndĩ maatĩĩie aũme asu elĩ na mesĩla nzĩa ĩla ĩendete vala andũ maingĩlaa Ũsĩ wa Yolotani. Mamina kumaala oou, mũomo wa ndũa nĩwavingiwe.
8Aũme asu elĩ matũmĩtwe nĩ Yosua matanamba kũkoma, Laavi nĩwambatie kĩalanĩ vala maĩ 9na amea atĩĩ, “Nĩnĩsĩ kana Mwĩai Ngai nũmũnengete nthĩ ĩno. Andũ onthe ala matwĩe nthĩ ĩno nĩmakwatĩtwe nĩ w'ĩa mwingĩ nũndũ wenyu. 10#Kuma 14.21; Mot 21.21-35 Nĩtwĩw'ĩte ũndũ Mwĩai Ngai wang'alĩthisye kĩw'ũ kya Ũkanga Mũtune ũla waĩ mbee wenyu yĩla mwaumĩte nthĩ ya Misili. O ta ũu, nĩtwĩw'ĩte ũndũ mweekanie na Sioni na Oku, asumbĩ elĩ ma Aamoli ala matwĩe ngalĩko ya wumĩlonĩ wa syũa ya Ũsĩ wa Yolotani. 11Nĩtwakwatiwe nĩ w'ĩa mwingĩ mũno yĩla tweewie ĩũlũ wa maũndũ asu; ithyonthe nĩtwaaisye ũkũmbaũ witũ nũndũ wenyu. Mwĩai Ngai, Ngai wenyu nĩwe Ngai ĩũlũ ĩtunĩ, na kũũ nthĩ. 12Yu ĩndĩ ĩvĩtei kũla nĩĩ ĩsyĩtwanĩ ya Mwĩai Ngai kana mũkeeka andũ ma mũsyĩ wakwa nesa, nũndũ nyie nĩnĩmwĩkie nesa. Nengei wonany'o wa w'o 13kwa kũmbatha kana mũkatangĩĩa ĩthe wakwa na inyia wakwa, ana-a-ia na eĩtu-a-ia makwa vamwe na andũ moo onthe; mũikatate kũeka tũawe!”
14Aũme asu nĩmeeie Laavi atĩĩ, “Ngai nĩatume tũkw'a twalea kwĩanĩsya ũndũ tũkwasya! Ethĩwa ndwĩtavya mũndũ o na ũmwe ũndũ twĩthĩĩtwe tũyĩka, nĩtũũkwatha kana Mwĩai Ngai atũnenga nthĩ ĩno, tũkakwĩka nesa.”
15Laavi ekalaa nyũmbanĩ yakĩtwe ĩkwatanĩtw'e na ũkũta wa ndũa ya Yeliko, na kwoou nĩwesĩlilye aũme asu ndĩlĩsyanĩ na amatheesya na ĩkanda. 16Nĩwamatavĩtye akamea, “Endai iĩmanĩ mũkevithe kw'o vandũ va mĩthenya ĩtatũ nĩ kana mũikakwatwe nĩ ala andũ matũmĩtwe nĩ mũsumbĩ.”
17Aũme asu matanaumaala nĩmeeie Laavi atĩĩ, “Tũkeanĩsya wĩvĩto witũ kwaku, 18ethĩwa tũilika nthĩ ya Kanaani ũkeethĩwa wovee ĩkanda yĩĩ ĩtune ndĩlĩsyanĩ ĩla ũũtwĩsĩlya tũthee nthĩ. O ta ũu no nginya wĩĩthĩwa ũetete ĩthe waku, inyia waku, ana-a-inyia maku, na andũ onthe ma mũsyĩ wa ĩthe waku na ũkamombanĩsya nyũmba kwaku. 19Ethĩwa mũndũ o na wĩva akaumaala nyũmba kwaku athi nza, akakw'a nũndũ wa ĩvĩtyo yake mwene, ithyĩ tũikatalĩlwa ĩvĩtyo. Ĩndĩ ethĩwa mũndũ o na wĩva wa ala meĩthĩwa nyũmba kwaku akakwatwa nĩ ũndũ ũthũku, tũkatalĩlwa ĩvĩtyo nũndũ wa kĩkw'ũ kyake. 20Ethĩwa ũkatavya mũndũ o na wĩva maũndũ ala tũendeesye, ithyĩ tũkeethĩwa twĩ athasye kuma wĩvĩtonĩ ũla twĩvĩtie mbee waku.” 21Laavi nĩweetĩkĩlile, na amea mathi. Mamina kũthi, nĩwooveeie yĩla ĩkanda ĩtune ndĩlĩsyanĩ. 22Mauma vau, nĩmaendie iĩmanĩ, na meevitha vo vandũ va mĩthenya ĩtatũ. Ala andũ matũmĩtwe nĩ mũsumbĩ nĩmamanthie kũu nzĩanĩ kw'onthe na malea kũmona masyoka Yeliko. 23Nĩvo ĩndĩ aũme asu elĩ ma Ĩsilaeli matheeie kuma iĩmanĩ, mainga Ũsĩ wa Yolotani na masyoka kũla kwĩ Yosua. Nĩmamũtavisye maũndũ onthe ala meekĩkie 24na o ta ũu mamwĩa atĩĩ, “Nĩtũmanyie nesa vyũ kana Mwĩai Ngai nũtũnengete nthĩ yonthe ya Kanaani. Andũ onthe ma nthĩ ĩsu me na w'ĩa mwingĩ mũno nũndũ witũ.”
Currently Selected:
Yos 2: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011