Osea 4
4
Mwĩai Ngai Aitũla Andũ ma Ĩsilaeli Mũtĩ
1Inyw'ĩ andũ ma Ĩsilaeli ĩthukĩĩsyei ndeto sya Mwĩai Ngai:
Mwĩai Ngai e na ĩteta na andũ ma nthĩ ĩno;
nthĩ ĩno ndĩ na ũĩkĩĩku kana wendo kana kũmũmanya Ngai.
2Vai ũndũ ũngĩ ate o kwĩvĩta mana na ĩsyĩtwa ya Ngai, kũkengana, kũaana, kũya na kũlaalaa.
Maũndũ mathũku nĩmongelekaa,
wũaani ũatĩanĩaa kĩla ĩvinda.
3Nũndũ wa ũu nthĩ ĩkeethĩwa na kĩĩo,
na onthe ala matũaa ĩũlũ wa nthĩ maithela vamwe na nyamũ sya kĩtheka,
nyũnyi sya yayaya, o na makũyũ ma ũkanganĩ nĩmeũkw'a.
Mwĩai Ngai Aitũla Athembi Mũtĩ
4Ĩndĩ vaikatate kwĩthĩwa mũndũ ũsikatwa,
kana ũtũlwa mũtĩ,
nũndũ nue ngũsikata we mũthembi wakwa.
5Ũkaluluutĩkaa mũthenya,
na ũkaluluutĩkaa wĩ na mwathani ũtukũ,
na ngamina inyia waku.
6Andũ makwa nĩmanangawa nũndũ mai na ũmanyi;
nũndũ nũleete ũmanyi,
nakwa nĩngũũlea ndũkethĩwe mũthembi wakwa.
Nũndũ nĩwũlĩtwe nĩ Mwĩao wa Ngai waku,
o nakwa ngoolwa nĩ syana syaku.
7O ũndũ athembi maendeeie kwongeleka,
now'o maendeeie kũmbĩtĩsya;
ngatw'ĩkĩthya nguma syoo nthoni.
8Makwataa ũthwii kumana na naĩ sya andũ makwa,
na kwoou meenda andũ maendee kwĩka naĩ.
9Na kũkeethĩwa kana o ũndũ andũ mailyĩ, now'o athembi mailyĩ,
nakwa ngamakany'a nũndũ wa mĩendele yoo,
na ngĩmaĩvanĩsya nũndũ wa meko moo.
10Makaya, na maikavũna;
makeekaa ũmalwaya, na maikongeleka,
nũndũ nĩmandekete nyie Mwĩai Ngai,
nĩ kana matanĩe kwĩka ũmalwaya.
11Ndivai na ndivai nzaũ,
itumaa mũndũ asya ũmanyi.
Ngai Ailea Ũthaithi wa Mĩvw'anano.
12Andũ makwa makũlasya ũtao kuma kwa ngai ya mũvw'anano ya mũtĩ,
na ndata ĩla me nayo nĩmavuanĩasya.
Veva wa ũmalwaya nũtumĩte maa,
na nĩmaekete Ngai woo meke ũmalwaya.
13Mathembeaa iĩmanĩ ĩũlũ,
na kumĩsya nthembo tũlĩmanĩ,
ungu wa mĩtĩ ya myalonĩ na mĩlivina,
na mĩtĩ ya mĩelo nũndũ muunyĩ wayo nĩ mũseo.
Kwoou eĩtu menyu nĩmatw'ĩkaa malwaya,
na iveti sya ana menyu kũtw'ĩka ilaalai.
14Ndikakany'a eĩtu menyu meeka ũmalwaya,
kana iveti sya ana menyu syatw'ĩka ilaalai,
nũndũ aũme nĩmosaa aka malwaya,
na kũthemba me vamwe na malwaya ma kĩ-ũthaithi.
Andũ matekũsũanĩa makaanangwa.
15O na vala we Ĩsilaeli nĩwĩkaa ũlaalai,
ndũkatume Yuta avĩtya.
Ndũkalike Ngilikali, kana ũthi Mbethi-aveni,
na ndũkatate kwĩvĩta wasye, “O tondũ Mwĩai Ngai wĩ thayũ.”
16Andũ ma Ĩsilaeli nĩ ang'endu ta moi ng'endu,
yu ĩndĩ Mwĩai Ngai atonya ata kũmaĩthya ta malondu kĩsesinĩ kĩthanthau?
17Ĩsilaeli#4.17 Ĩsilaeli: Maandĩko Matheu kĩthyomonĩ kya Kĩevelania maĩtye Evalaimu nũndũ nĩyo yaĩ mbaĩ nene ya ũsumbĩ wa ngalĩko ya ĩũlũ wa Ĩsilaeli nũlikanĩte na ngai sya mĩvw'anano,
ekana nake e weka.
18Mamina kũnyw'a,
mekaa ũmalwaya ĩvinda yonthe,
mendete maũndũ me nthoni kwĩ kũnengwa ndaĩa.
19Makakuwa nĩ kĩlingi,
na makasonokw'a nĩ nthembo syoo.
Currently Selected:
Osea 4: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011