Mwa 1
KAMBA

Mwa 1

1
Kũmbwa kwa Syĩndũ Syonthe
1Mwambĩlĩĩlyonĩ yĩla Ngai woombie ĩtu na nthĩ, 2nthĩ ndyaĩ na wũmbo na yaĩ nthei. Kwaĩ kĩw'ũ kingĩ kyavw'ĩkĩte syĩndũ syonthe, nakyo kĩkavw'ĩkwa nĩ kĩvindu kya ngokomi. Veva wa Ngai aĩ ĩũlũ wa kĩw'ũ kĩu kingĩ. 3#2Ako 4.6 Na Ngai asya atĩĩ, “Nĩkwĩthĩwe kyeni,” na kweethĩwa kyeni. 4Ngai nĩwoonie kyeni kĩu kĩ kĩseo. Nĩvo ĩndĩ wavathanisye kyeni kĩu na kĩvindu kĩu. 5Ngai nĩweetie kyeni kĩu, “Mũthenya,” nakyo kĩvindu akĩta, “Ũtukũ.” Nĩkwatukie na kwakya; ũsu waĩ mũthenya wa mbee.
6 # 2Vet 3.5 Na Ngai asya atĩĩ, “Nĩkwĩthĩwe yayaya yĩaany'e kĩw'ũ kũndũ kwĩlĩ.” 7Kwoou Ngai nĩwoombie yayaya na aany'a kĩw'ũ kĩu; kĩmwe kyeethĩwa ngalĩko ya ĩũlũ na kĩla kĩngĩ ngalĩko ya ĩtheo. 8Ngai nĩweetie yayaya ĩtu. Nĩkwatukie na kwakya; ũsu waĩ mũthenya wa kelĩ.
9Na Ngai asya atĩĩ, “Kĩw'ũ kĩla kĩ ĩtheo wa ĩtu kĩsyokeanĩe vandũ vamwe na nthĩ nyũmũ yumĩle,” na ũu weethĩwa. 10Ngai nĩweetie mũthanga mũmũ, “Nthĩ,” na kĩw'ũ kĩla kyasyokeanĩie vandũ vamwe akĩta, “Ũkanga.” Ngai nĩwasyaisye wĩa ũsu wake na endeew'a nĩw'o. 11Nĩvo ĩndĩ Ngai waisye atĩĩ, “Nĩkwĩthĩwe na mĩthemba yonthe ya mĩmea ĩũlũ wa nthĩ, mĩmea ĩla ĩsyaa mĩthemba yĩ kĩvathũkany'o ya mbeke, na mĩtĩ ĩsyaa matunda me ngii syĩ kĩvathũkany'o,” na ũu weethĩwa. 12Nthĩ nĩyeethĩiwe na mĩmea; mĩmea ĩsyaa mbeke syĩ kĩvathũkany'o, na mĩtĩ ĩsyaa matunda me ngii syĩ kĩvathũkany'o. Ngai nĩwasyaisye wĩa ũsu wake na endeew'a nĩw'o. 13Nĩkwatukie na kwakya; ũsu waĩ mũthenya wa katatũ.
14Na Ngai asya atĩĩ, “Nĩkwĩthĩwe kyeni yayayanĩ, kĩvathany'e mũthenya na ũtukũ na kwonanasya mĩthenya, myaka na mavinda me kĩvathũkany'o. 15Kyeni kĩu kĩ yayayanĩ nĩkĩmulĩkae nthĩ,” na ũu weethĩwa. 16Kwoou Ngai nĩwaseũvisye syeni ilĩ nene, syũa yĩmulĩkae mũthenya na mwei ũimulĩkaa ũtukũ; o ta ũu nĩwaseũvisye ndata. 17Ngai nĩwaiie syĩndũ isu yayayanĩ, nĩ kana imulĩkae ĩũlũ wa nthĩ; 18imulĩkae ũtukũ na mũthenya na kũvathany'a kyeni na kĩvindu. Ngai nĩwasyaisye wĩa ũsu wake na endeew'a nĩw'o. 19Nĩkwatukie na kwakya; ũsu waĩ mũthenya wa kana.
20Na Ngai asya atĩĩ, “Kĩw'ũ kyusũwe nĩ syũmbe syĩ thayũ na yayaya yusũwe nĩ nyũnyi.” 21Kwoou Ngai nĩwoombie nyamũ ila nene sya ũkanganĩ, na syũmbe sya mĩthemba yonthe ila syĩkalaa kĩw'ũnĩ, na nyũnyi sya mĩthemba yonthe. Ngai nĩwasyaisye wĩa ũsu wake na endeew'a nĩw'o. 22Ngai nĩwaiathimie na asya atĩĩ, “Syaanai mwingĩve musũe kĩw'ũnĩ kĩla kĩ ũkanganĩ na nyũnyi nĩsingĩve ĩũlũ wa nthĩ.” 23Nĩkwatukie na kwakya; ũsu waĩ mũthenya wa katano.
24Na Ngai asya atĩĩ, “Nthĩ nĩyumĩlye syũmbe sya kĩla mũthemba: Nyamũ sya mũsyĩ na sya kĩthekanĩ, na tũsamũ tũnini,” na ũu weethĩwa. 25Kwoou Ngai nĩwoombie syũmbe sya mĩthemba yonthe: Nyamũ sya mũsyĩ na sya kĩthekanĩ, na tũsamũ tũnini. Ngai nĩwasyaisye wĩa ũsu wake na endeew'a nĩw'o.
26 # 1Ako 11.7 Nĩvo ĩndĩ Ngai waisye atĩĩ, “Nĩtũmbe andũ me na mũvw'ano witũ na kĩtutya kitũ. Makeethĩwa na ũkũmũ ĩũlũ wa makũyũ, nyũnyi, nyamũ syonthe sya mũsyĩ na sya kĩthekanĩ, na tũsamũ tw'onthe tũla tũnini.” 27#Mat 19.4; Mk 10.6 #Mwa 5.1-2 Kwoou Ngai nĩwoombie andũ mailyĩ take; amomba mailyĩ take. Nĩwoombie mũndũ-ũme na mũndũ mũka. 28Ngai nĩwamaathimie na asya atĩĩ, “Syaanai mwingĩve musũe ĩũlũ wa nthĩ, na mũyĩthĩwa na ũtonyi ĩũlũ wayo. Ĩthĩwai na ũkũmũ ĩũlũ wa makũyũ, nyũnyi na nyamũ ila ingĩ syonthe syĩ ĩũlũ wa nthĩ.” 29Na Ngai asyoka asya atĩĩ, “Nĩngũmũnenga mĩmea yonthe ĩla ĩsyaa mbeke na mĩtĩ yonthe ĩla ĩsyaa matunda yĩthĩwe lĩu wenyu. 30Nĩnĩnenganĩte nyeki na matũ syĩthĩwe lĩu wa nyamũ na nyũnyi syonthe, na tũsamũ tw'onthe tũla twĩ ĩũlũ wa nthĩ,” na ũu weethĩwa. 31Ngai nĩwasyaisye wĩa ũsu wake na kwa w'o nĩwamwendeeisye mũno. Nĩkwatukie na kwakya; ũsu waĩ mũthenya wa thanthatũ.

BIBLE SOCIETY OF KENYA © 2011

Learn More About MBIVILIA ŨVOO MŨSEO