Meko 9

Saũlo Aitw'ĩka Mũatĩĩi wa Mwĩai

(Meko 22.6-16; 26.12-18)

1Ĩvindanĩ yĩu, Saũlo nowaendee na kwasya kana nũkũaa aĩkĩĩi ma Mwĩai. O na nĩwaendie kwa Mũthembi ũla Mũnene, 2amwĩtya mavalũa ma kũmũmanyĩthany'a kwa atongoi ma nyũmba sya Ayuti sya kũthaithĩa na kũmbanĩa ila syaĩ Ndamasikũ, nĩ kana eethĩa andũ ala maatĩĩa ĩla Nzĩa Mwĩai woonanisye,#9.2 ĩla Nzĩa Mwĩai woonanisye: ĩvukunĩ yĩĩ ndeto ii itũmĩĩtwe kũelesya ĩũlũ wa aatĩĩi ma Yesũ Klĩsto o na ethĩwa nĩ aũme kana aka, amakwate amaete Yelũsalemu.

3Saũlo e kyalonĩ akilĩlye kũvika Ndamasikũ, kyeni kuma ĩtunĩ nĩkyamũmulĩkile kwa kĩthũlũmũko kĩmũthyũlũlũkĩte ngalĩko syonthe. 4Nĩwavalũkile nthĩ na eew'a wasya ũũmwĩa atĩĩ, “Saũlo! Saũlo! Nĩkĩ ũũnthĩny'a?”

5Nake akũlya atĩĩ, “Nue ũũ Mwĩai?”

Ũla wasya wasũngĩa, “Ninyie Yesũ ũla we ũũthĩny'a. 6Ĩndĩ yu ũkĩla ũlike ndũanĩ, na kũu nũũtavw'a kĩla waĩlĩte kwĩka.”

7Andũ ala maendanĩtye na Saũlo nĩmaũngamie vau na mavindya ki; nĩmeew'aa wasya ũsu ĩndĩ mayoonaa mũndũ. 8Saũlo nĩwookĩlile vala wavalũkĩte, ĩndĩ yĩla wasalukilye eethĩa ndatonya kwona nthĩ. Nĩvo ĩndĩ andũ asu mamũtongoeisye mamũkwete kw'oko mamũtwaa Ndamasikũ. 9Ekalile mĩthenya ĩtatũ ate kwona nthĩ, na ndaĩsaa kana kũnyw'a kĩndũ.

10Kũu Ndamasikũ kwaĩ mũĩkĩĩi ũmwe weetawa Anania. Mwĩai nĩwamwĩtie woninĩ, “Anania!”

Nake eetĩka, “Ĩĩ ninyioo Mwĩai.”

11Mwĩai nĩwamwĩie atĩĩ, “Ũkĩla ũthi ĩla nzĩanĩ yĩtawa ‘Nzĩa Ndũngalu,’ ũkakũlye nyũmbanĩ kwa Yutasi kuma Taliso mũndũ wĩtawa Saũlo. Oyu tũĩ akwetye kũvoya, 12na nĩwoona woninĩ mũndũ wĩtawa Anania ooka vala ũĩ amwilĩĩla moko, nĩ kana atonye kwona nthĩ ĩngĩ.” 13Ĩndĩ Anania amũsũngĩa, “Mwĩai, nĩnĩw'ĩte kuma andũnĩ aingĩ ngewa ya mũndũ ũsu, ũndũ wĩkĩte aĩkĩĩi maku kũya Yelũsalemu maũndũ mathũkĩte. 14O nayu okĩte kũũ anengetwe ũkũmũ nĩ athembi anene, akwate andũ onthe ala mavoyaa ĩsyĩtwanĩ yaku.”

15Ĩndĩ Mwĩai amwĩa atĩĩ, “Enda we nũndũ nĩnĩmũnyuvĩte anthũkũme; atavye Andũ-ma-mbaĩ-ingĩ na asumbĩ na andũ ma Ĩsilaeli ũvoo wakwa. 16Nyie ngamwony'a ũndũ ũkathĩna mũno wĩana kwondũ wakwa.”

17Anania nĩwaendie na alika nyũmba vala Saũlo waĩ. Nĩwamwilĩĩle moko amwĩa atĩĩ, “Mwana-a-asa Saũlo, Mwĩai Yesũ mwene ũla ũnakumĩlĩĩle wĩ nzĩanĩ ĩla ũnookĩte nayo, nĩwandũma nũke nĩ kana ũtonye kwona nthĩ ĩngĩ na ũyusũwa nĩ Veva Mũtheu.” 18Vau kwa vau syĩndũ ivw'ana makwaũ nĩsyavalũkile kuma methonĩ make, na ambĩĩa kwona nthĩ. Nĩvo ĩndĩ wookĩlile na avatiswa, 19na ĩtina wa kũya lĩu akwata vinya.

Saũlo Aitavany'a Ndamasikũ

Saũlo nĩwekalile na aĩkĩĩi kũu Ndamasikũ vandũ va mĩthenya yĩana ũndũ mũna. 20O mĩtũkĩ nĩwambĩĩie kũtavany'a nyũmbanĩ sya Ayuti sya kũthaithĩa na kũmbanĩa, kana Yesũ nĩ Mwana wa Ngai. 21Andũ onthe ala mamwĩwie aitavany'a nĩmaseng'ie na makũlany'a, “Ũũ tyo we ũnooaa andũ kũya Yelũsalemu ala manavoyaa ĩsyĩtwanĩ ya Yesũ? O na okĩte kũũ na kĩeleelo kya kũkwata andũ asu amatwae mbee wa athembi anene.” 22Ĩndĩ nake Saũlo aendeea kwĩthĩwa na ũkũmbaũ mwingĩ, na avindĩthya Ayuti ala mekalaa Ndamasikũ kwa kwonany'a kwa w'o kana Yesũ nĩwe Klĩsto.

23 # 2Ako 11.32-33 Ĩtina wa mĩthenya mingĩ, Ayuti amwe nĩmamũsamĩie Saũlo mamũae, 24ĩndĩ nake Saũlo amanya ĩũlũ wa mũvango ũsu. Nĩmamwoveeisye mĩvĩanĩ yonthe ya ndũa ĩsu ũtukũ na mũthenya nĩ kana mamũae, 25ĩndĩ amanyĩw'a make mamũkua ũtukũ ũmwe mamũng'okelya ũkũtanĩ mamũtheesya e kĩkavĩnĩ athi ũkinya nthĩ.

Saũlo Aisyoka Yelũsalemu

26Saũlo nĩwaendie avika Yelũsalemu, na atata kũvulana na amanyĩw'a ala maĩ kũu. Ĩndĩ nĩmamũkĩaa nũndũ mayaĩkĩĩaa kana kwa w'o aĩ mũĩkĩĩi. 27Nĩvo ĩndĩ Valanava wamwosie amũtwaa kwa atũmwa, na amaelesya ũndũ Saũlo e nzĩanĩ aendete Ndamasikũ wamwonie Mwĩai, na Mwĩai aneena nake. O ta ũu nĩwamatavisye ũndũ Saũlo ũnatavanĩtye ĩsyĩtwanĩ ya Yesũ e na ũkũmbaũ kũu Ndamasikũ. 28Kwoou Saũlo nĩwavulanile namo, na athi kĩla vandũ Yelũsalemu akĩtavany'a ĩsyĩtwanĩ ya Mwĩai na ũkũmbaũ. 29Nĩwaneenaa na kũkananĩa na Ayuti ala maneenaa Kĩkiliki, namo mavanga kũmũaa. 30Yĩla aĩkĩĩi ala angĩ mamanyie ũu, nĩmamumaaisye mamũtwaa Kaisalea, na mamwĩa nĩathi Taliso.

31Ĩvindanĩ yĩu ĩkanisa nĩyeethĩiwe na mũuo kĩla vandũ nthĩ ya Yutia, ya Kalilii na ya Samalia, na yeethĩwa yĩ ĩlũmu mũno. Nĩyekalile yĩ na kĩkĩo kya Mwĩai o vamwe na kũthangaaw'a nĩ Veva Mũtheu, na kwoou nĩyaendeeie kwingĩvya aĩkĩĩi.

Kũvow'a kwa Aeniasi

32Vetelo aendee na kũthoka kũndũ na kũndũ, nĩwaendie kwa aĩkĩĩi ala matwĩe Linda. 33Kũu nĩweethĩie mũndũ ũmwe weetawa Aeniasi watwĩe atekuma kĩtandanĩ vandũ va myaka nyanya e na mamutha monzu. 34Vetelo nĩwamwĩie atĩĩ, “Aeniasi, Yesũ Klĩsto nũkũũvosya! Ũkĩla na ũyalany'a kĩtanda kyaku.” Na o vau kwa vau Aeniasi ookĩla. 35Andũ onthe ala matwĩe Linda na Saloni, nĩmamwonie Aeniasi na mamũĩkĩĩa Mwĩai.

Kũvow'a kwa Ndolokasi

36Kwaĩ mũĩkĩĩi ũmwe mũndũ mũka ndũanĩ ya Yova weetawa Tavitha, nayo ĩsyĩtwa yĩu kwa Kĩkiliki nĩ Ndolokasi na ũalyũlo wayo nĩ, “Nthia.” Mũndũ mũka ũsu nĩweekaa maũndũ maseo kĩla ĩvinda na kũtethya ngya. 37Ĩvindanĩ yĩu nĩwawaie na akw'a. Mwĩĩ wake nĩwathambiw'e na waiwa nyũmbanĩ ĩmwe ya ĩũlũ ngolovanĩ. 38Nũndũ wa kwĩthĩwa Yova ndyaĩ vaasa na Linda, aĩkĩĩi nĩmeewie kana Vetelo e Linda, na mamũtũmĩa andũ elĩ mathi makamwĩsũve maimwĩa, “Ũka kwitũ mĩtũkĩ ũndũ vatonyeka.” 39Kwoou Vetelo nĩwookĩlile aendany'a namo. Avika nĩwatwaiwe nyũmba yĩ ĩũlũ ngolovanĩ. Ndiwa mbingĩ sya aka nĩsyamũmbanĩlĩĩle iyĩĩa, na kũmwony'a makoti na ngũa ingĩ ila Ndolokasi ũnatumaa yĩla ũnaĩ thayũ. 40Ĩndĩ Vetelo amea nĩmaumaale onthe na atulya ndu avoya. Nĩvo ĩndĩ wathyũũkie asisya ũla mwĩĩ na asya, “Tavitha, ũkĩla!” Tavitha nĩwasalukilye, na yĩla wamwonie Vetelo ookĩla ekala nthĩ. 41Vetelo nĩwamũkwatie kw'oko amũkĩlya aũngama. Vetelo amina kwĩka ũu, nĩweetie ala aka ndiwa o vamwe na aĩkĩĩi ala angĩ na amanenga Tavitha e thayũ. 42Ũndũ ũsu nĩwamanyĩkie kĩla vandũ kũu Yova, na andũ aingĩ mamũĩkĩĩa Mwĩai. 43Vetelo nĩwaendeeie kwĩkala kũu Yova vandũ va mĩthenya mingĩ, ayĩkala na mũndũ ũmwe mũseũvya wa ithuma weetawa Simioni.

Currently Selected:

Meko 9: KAMBA

Highlight

Copy

Compare