Meko 28

Vaũlo e Kĩthamanĩ Kĩtawa Melita

1Twamina kũvika ũtee wa ũkanga, nĩtwamanyie kana kĩthama kĩu kyeetawa Melita. 2Andũ ma kĩthama kĩu nĩmatwonisye wendo mwingĩ mũno. Nĩmavuvie mwaki na matũthokya ithyonthe, nũndũ kwaĩ kũnambĩĩa kua na kwaĩ mbevo. 3Vaũlo nĩwakolanilye mũio wa ngũ na asyĩkĩa mwakinĩ, na nũndũ wa muutĩa wa mwaki, vauma nzoka nthũku mũno ngũnĩ isu yamũũma kw'oko na yalũma vo. 4Yĩla andũ ma kũu moonie nzoka ĩsu ĩsũĩte kw'okonĩ kwa Vaũlo nĩmeeanie atĩĩ, “Mũndũ ũũ no nginya ethĩwe nĩ mũaani; o na kau nĩwavĩtĩa ũkanganĩ, ngai ĩla yumasya sila wa katĩ ndĩmũeka ekale thayũ.” 5Ĩndĩ nake Vaũlo avuunzĩĩa nzoka ĩsu mwakinĩ na alea kwĩka ũndũ. 6Andũ asu nĩmeeteelile mone Vaũlo ayimba kw'oko kana aivalũka akw'e. Ĩndĩ yĩla meteelile vandũ va ĩvinda ĩasa matekwona ayĩka ũndũ, masũanĩa ũndũ ũngĩ masya we nĩ ngai!

7Vakuvĩ na vau twaĩ vaĩ itheka sya mũndũ ũla waũngamĩe kĩthama kĩu weetawa Vavilio. Mũndũ ũsu nĩwatwosie atũthokya na ũtanu mũsyĩ kwake vandũ va mĩthenya ĩtatũ. 8Ĩthe wake nĩwaĩ akomete kĩtandanĩ e na ndetema na kwĩtũũa. Vaũlo nĩwaendie kũmũsisya na ĩtina wa kũmũvoyea amwilĩĩla moko amũvosya. 9Yĩla ũndũ ũsu weekĩkie, andũ ma kĩthama kĩu ala maĩ awau o namo nĩmookie na mavow'a. 10Andũ asu nĩmatũnengie mĩthĩnzĩo mingĩ mũno, na yĩla twaĩ vakuvĩ kũthi, nĩmatwĩkĩĩie melinĩ syĩndũ ila twaĩ na vata nasyo.

Kyalo kya kuma Melita kũthi Loma

11Ĩtina wa myei ĩtatũ, nĩtwambĩĩie kyalo ĩngĩ twĩ melinĩ yaĩ ya kuma Alekisandĩlĩa yeetawa Ngai sya Mavatha. Meli ĩsu yekalĩte kĩthamanĩ kĩu myeinĩ ĩsu yonthe ya mbevo. 12Nĩtwavikie Silakuse na twekala vo vandũ va mĩthenya ĩtatũ. 13Kuma vau nĩtwakomokie twathi twavika Lengiũmu. Ĩtina wa mũthenya ũmwe nĩkwookie kĩseve kuma ngalĩko ya ĩtheo, na mũthenya wa kelĩ twathi twavika Vuteoli. 14Vau nĩtweethĩie aĩkĩĩi amwe, na matũthokya twĩkale namo kyumwa kĩmwe. Ũu nĩw'o twavikie Loma. 15Yĩla aĩkĩĩi ma kũu Loma meewie ũvoo witũ, nĩmookie kũtũthaũa ndũnyũ yĩtawa Aviũsi na angĩ vandũ veetawa Mĩkaawa Ĩtatũ. Yĩla Vaũlo wamonie, nĩwatũngĩie Ngai mũvea mũno na eew'a akwata vinya.

Vaũlo e Loma

16Yĩla twavikie Loma, Vaũlo nĩwanengiwe mwanya wa kwĩkalaa vandũ vake e weka, e na mũsikalĩ wa kũmũsunga.

17Ĩtina wa mĩthenya ĩtatũ, Vaũlo nĩweetie atongoi ma kũu ma Ayuti mombane. Mamina kũmbana nĩwameie atĩĩ, “O na kau ndyaaĩka ũndũ mũthũku kwa andũ ma mbaitũ kana ũndũ ũtosana na syĩthĩo sya aaũmae maitũ, nĩnakwatĩiwe Yelũsalemu na nanenganwe kwa Alomi. 18Ĩtina wa kũngũlya makũlyo, nĩmendie kũnthasya nũndũ mayaaona kĩndũ kĩtuma nĩtw'ĩĩwa kũawa. 19#Meko 25.11 Ĩndĩ yĩla Ayuti maleanile na ũtw'ĩo ũsu, weethĩa yu no nginya nĩkũlye ĩkoani yakwa yĩkethukĩĩw'e nĩ mũsumbĩ wa Loma, o na kau nyie ndyaĩ na kĩndũ kya kũka kũsikatĩa andũ ma mbaĩ yaitũ. 20Nĩ kwa kĩtumi kĩu ĩndĩ nĩkũlilye nĩmwone nĩneene nenyu, nĩkwĩthĩwa ũmũnthĩ novanĩtw'e na nyololo nũndũ wa ũla wĩkwatyo witũ ithyĩ andũ ma Ĩsilaeli.”

21Andũ asu namo mamwĩa atĩĩ, “Ithyĩ tũyaakwata valũa o na ũmwe kuma Yutia ũwetete ĩũlũ waku, na vai ũmwe wa ana-a-asa kũu waaũka kũũ akatũetee ũvoo waku kana akaneena ndeto nthũku ĩũlũ waku. 22Ĩndĩ nĩtũkwenda kwĩw'a kuma vala ũĩ ũndũ ũkwasya ĩũlũ wa kĩkundi kĩĩ ũlikĩte, nũndũ nĩtũmanyĩte kana kĩla vandũ nĩkĩũneenewa naĩ.”

23Nĩmavangie mũthenya ũla mekomana na Vaũlo, na mũthenya ũsu mooka kwa wingĩ nyũmbanĩ ĩla Vaũlo wekalaa. Vaũlo nĩwamaeleisye kuma kwakya kũvika wĩoo, aimatavya ũvoo ĩũlũ wa ũsumbĩ wa Ngai, na aitata kũmaĩkĩĩthya ũvoo wa Yesũ kuma Mĩaonĩ ya Mwose na momanyĩsyonĩ ma athani. 24Amwe moo nĩmeetĩkĩlile ndeto syake, ĩndĩ angĩ malea kũĩkĩĩa. 25Kwoou nĩmeethĩiwe na kũlea kũeleanwa na mambĩĩa kũthi, ĩtina wa Vaũlo kũmea atĩĩ, “Veva Mũtheu atavisye aaũmae menyu w'o, yĩla waneenie kwĩsĩla kwa mwathani Ĩsaia, 26#Ĩsa 6.9-10 asya atĩĩ,

‘Enda kwa andũ aa ũkamee:

Mũkatindĩaa kwĩthukĩĩsya, ĩndĩ mũikaelewa;

mũkatindĩaa kũketeea, ĩndĩ mũikona.

27Nũndũ ilĩko sya andũ aa nĩ ngomu,

na matũ moo mayĩw'a kĩndũ,

na nĩmavingĩte metho moo.

Kethĩwa ti ũu no mone na metho moo,

na makew'a na matũ moo,

na makaelewa ilĩkonĩ syoo,

na no manzyokee nyie Mwĩai Ngai nakwa ngĩmavosya.’ ”

28Vaũlo nĩwaminũkĩlĩĩlye kwa kũmea atĩĩ, “Manyai yu kana ũvoo wa ũtangĩĩo wa Ngai nũtwaĩtwe kwa Andũ-ma-mbaĩ-ingĩ; asu makeethukĩĩsya!” [ 29Vaũlo amina kũneena ndeto isu, Ayuti nĩmaendie makananĩĩte mũno mo ene kwa ene.]#28.29 Maandĩko amwe ma tene ma Ndeto ya Ngai nĩmatiĩte mũsoa ũũ

30Vaũlo nĩwekalile kũu vandũ va myaka ĩlĩ mĩima, nyũmbanĩ wakomboete we mwene, na nĩwathokasya onthe ala mookaa kũmwona. 31Nĩwatavanisye ũvoo ĩũlũ wa ũsumbĩ wa Ngai, na amanyĩsya ĩũlũ wa Mwĩai Yesũ Klĩsto e na ũkũmbaũ vate kĩndũ kĩũmũsiĩĩa.

Currently Selected:

Meko 28: KAMBA

Highlight

Copy

Compare