Meko 19

Vaũlo e Ndũanĩ ya Eveso

1Ĩvindanĩ yĩla Avolo waĩ Kolintho, Vaũlo nĩwesĩlile nthĩ ya ngalĩko ya ĩũlũ athi Eveso. Kũu nĩweethĩie amanyĩw'a amwe ma Mwĩai, 2na amakũlya atĩĩ, “Inyw'ĩ, mwaakwata Veva Mũtheu mwatw'ĩka aĩkĩĩi?”

Namo masũngĩa masya, “Aiee! Ithyĩ o na tũyaaĩw'a kana kwĩ veva Mũtheu.”

3Vaũlo amakũlya atĩĩ, “Nayu mwavatisiwe ũvatiso mwaũ?” Namo mamwĩa, “Ũvatiso ũla Yoana watavanasya.”

4 # Mat 3.11; Mk 1.4,7,8; Lk 3.4,16; Yoa 1.26-27 Vaũlo amea atĩĩ, “Ũvatiso wa Yoana waĩ wa andũ melile kwondũ wa naĩ syoo; atavisye andũ nĩmaĩkĩĩe ũla wũkĩte ĩtina wake, nake nĩ Yesũ.”

5Yĩla meewie ũu, onthe nĩmavatisiwe ĩsyĩtwanĩ ya Mwĩai Yesũ. 6Nĩvo ĩndĩ Vaũlo wamailĩĩle moko, na Veva Mũtheu ooka ĩũlũ woo namo mambĩĩa kũneena na ithyomo na kwathana. 7Onthe maĩ andũ ĩkũmi na elĩ.

8Vaũlo nĩwaendie nyũmbanĩ ya Ayuti ya kũthaithĩa na kũmbanĩa, na vandũ va myei ĩtatũ aneenany'a na andũ na ũkũmbaũ, na kũmathing'ĩĩsya metĩkĩle maũndũ ma ũsumbĩ wa Ngai. 9Ĩndĩ amwe moo nĩmeethĩiwe na ngoo mbũmũ na malea kwĩtĩkĩla, na maneenea ĩla Nzĩa Mwĩai woonanisye ndeto nthũku mbee wa andũ. Kwoou Vaũlo nĩwamatiie na athi e na aĩkĩĩi, na ambĩĩa kũmamanyĩsya maineenany'a na andũ kĩla mũthenya#19.9 kĩla mũthenya: Ĩtina wa ndeto ii, Maandĩko amwe ma tene ma Ndeto ya Ngai nĩmongelete kuma saa itano sya kwakya kũvika saa kũmi sya mũthenya nyũmbanĩ nene ya kũmanyĩĩsya andũ ya Tilanũsi. 10Aendeeie kwĩka ũu vandũ va myaka ĩlĩ kũvikĩa andũ onthe ala matwĩe Asia, Ayuti na Andũ-ma-mbaĩ-ingĩ, meethĩwa na ũthei wa kwĩw'a ndeto ya Ngai.

Ana ma Sikeva Maitata Kũlũngya Maimũ

11Ngai nĩweekie syama nene mũno kwĩsĩla vala ve Vaũlo, 12o na andũ mambĩĩa kũkua itambaa na ngũa ingĩ syake sya ũthũkũmi ila weekĩaa maitwaĩa awau. Awau asu nĩmavoaa na ala malikĩtwe nĩ maveva mathũku mayumwa nĩ maveva asu.

13Nĩvo ĩndĩ Ayuti amwe mangangaa kũu mailũngya maveva mathũku, matatie kũmalũngya kuma andũnĩ malikĩtwe nĩmo maitũmĩa ĩsyĩtwa ya Mwĩai Yesũ kwa kwasya atĩĩ, “Nĩngũmwĩaĩa ĩsyĩtwanĩ ya Yesũ ũla ũtavanaw'a nĩ Vaũlo, umai mũndũnĩ ũũ.” 14Ana mũonza ma Mũyuti ũmwe waĩ Mũthembi Mũnene weetawa Sikeva nĩmeekaa ũu, 15ĩndĩ veva mũthũku wamea atĩĩ, “Yesũ nĩnĩmwĩsĩ, na Vaũlo o nake nĩnĩmwĩsĩ, ĩndĩ inyw'ĩ ninyw'ĩ aaũ?” 16Nĩvo ĩndĩ mũndũ ũsu walikĩtwe nĩ veva ũsu mũthũku wamathaanyũkĩie e na kaũ mwingĩ amakĩlya vinya onthe. Amavũie onthe maumaala nyũmba ĩsu masembete me athei na me na itau. 17Ũvoo ũsu nĩwamanyĩkie nĩ andũ onthe ala matwĩe Eveso; Ayuti na Akiliki. Nĩvo ĩndĩ onthe makwatiwe nĩ w'ĩa mwingĩ, na ĩsyĩtwa ya Mwĩai Yesũ yanengwa ndaĩa mũno. 18Andũ aingĩ ala matw'ĩkie aĩkĩĩi, nĩmaumĩlile maumbũla mbee wa andũ mothũku ala meekaa. 19O na andũ aingĩ meekaa syama nĩmaetie mavuku moo mamombany'a na mamavĩvya andũ onthe mene. Thooa wa mavuku asu me onthe waĩ mbesa sya silĩva ngili mĩongo ĩtano. 20Ũu nĩw'o ndeto ya Mwĩai yeanie na kwĩthĩwa na vinya mwingĩ.

Andũ Mayũkĩlya Ithokoo Ndũanĩ ya Eveso

21Ĩtina wa maũndũ asu onthe, Vaũlo nĩwasũanĩie kwĩsĩla Masendonia na Akaia na akĩthi Yelũsalemu. Nĩwaneenete na ngoo akasya, “Navika kũu no nginya nĩthi Loma o ta ũu.” 22Nĩwatũmie elĩ ma ala mamũtetheasya wĩa maendae Masendonia, namo nĩ Timotheo na Elasitasi, nake amba kũtiĩlangwa vandũ na ĩvinda ĩkuvĩ kũu Asia.

23Ĩvindanĩ o yĩu nĩkwookĩlile kĩthokoo kĩnene Eveso nũndũ wa ĩla Nzĩa Mwĩai woonanisye. 24Mũndũ ũmwe mũtwii wa syũma sya silĩva weetawa Ndemetelio, nĩweekĩĩte wĩa wa kũseũvasya tũkalũ twa silĩva kwondũ wa ngai nga yeetawa Alitemi. Mũndũ ũsu nĩwatumaa andũ ala masaa mavisa methĩwa na ũtandĩthyo mũseo. 25Nĩwoombanisye andũ asu onthe na andũ angĩ ala maĩ na ũthũkũmi wa mũthemba ũsu na amea atĩĩ, “Inyw'ĩ nĩmwĩsĩ kana twĩthĩawa na ũkwati mũseo nũndũ wa ũthũkũmi ũũ twĩ naw'o. 26Yu nĩmũkwona na nĩmũkwĩw'a o na eka vaa Eveso, vakuvĩ nthĩ yonthe ya Asia mũndũ ũũ ũkwĩtwa Vaũlo ũndũ ũmanyĩĩtye na kĩthing'ĩĩsyo kĩnene, na kũalyũla andũ kwa kũmea ngai sya kwasũvya ti ngai. 27Kwoou ve na mũisyo wa wĩa ũũ witũ kwasya nguma, na o na eka ũu, o nayo yĩla ĩkalũ ya ĩla ngai nga nene yĩtawa Alitemi nĩyĩkwasya nguma, na ngai ĩsu o nayo ĩyasya ndaĩa nene ĩla ĩtumaa ĩthaithwa kĩla vandũ Asia na ĩũlũ wa nthĩ yonthe.”

28Yĩla andũ asu meewie ndeto isu, nĩmathatie mũno na malonzany'a na wasya mũnene mayasya atĩĩ, “Alitemi ngai ya Aeveso nĩyo nene.” 29Kwoou ndũa yonthe nĩyausũie kĩthokoo, na andũ onthe masemba vamwe malika nyũmbanĩ ya mathaũ, makusĩtye Kaio na Alisitaliko, andũ maĩ ma kuma Masendonia na maendanĩtye na Vaũlo kyalonĩ kyake. 30Vaũlo nĩwendaa kũthi kũneena na ĩkomano yĩu, ĩndĩ aĩkĩĩi mamũvata. 31O na atongoi amwe ma Asia maĩ anyanyae, nĩmatũmanie kwake mamwĩsũvĩte ndakatate kũthi kũlika nyũmbanĩ ĩsu ya mathaũ. 32Vau vaĩ kĩthokoo kingĩ; andũ amwe maneenaa kĩĩ, angĩ makaneena kĩya, na ala aingĩ mayeesĩ meũmbanĩaa vau kĩ. 33Ayuti amwe nĩmamũluutile Alekisanda athi mbee wa andũ, na andũ amwe ĩkomanonĩ mambĩĩa kũmũtavĩĩsya kĩla ũkũneena. Nĩvo ĩndĩ Alekisanda wamakilĩthisye na kw'oko asũngĩe andũ. 34Ĩndĩ yĩla mamanyie kana we nĩ Mũyuti, onthe nĩmalonzanilye vandũ va masaa ta elĩ mayasya atĩĩ, “Alitemi ngai ya Aeveso nĩyo nene!”

35Yĩla kalanĩ wa ndũa ĩsu wesie kũvindĩthya ĩkomano yĩu nĩwayĩie atĩĩ, “Mbaitũ, andũ ma Eveso! Nũũ ũla ũtesĩ kana ndũa ya Eveso nĩyo ĩsũvĩaa ĩkalũ ya Alitemi, ngai nene, na o ta ũu nĩyo ĩsũvĩaa yĩla ĩvia ĩtheu yavalũkile kuma ĩtunĩ? 36Kwoou nũndũ vai mũndũ ũtonya kũleana na ũndũ ũsu, nĩmwaĩlĩte kũusya na mũikeke ũndũ wa kũsembethya. 37Mũetie andũ aa vaa na mayũyĩte mĩio mĩtheu ya ĩkalũ kana makauma ĩla ngai nga yaitũ. 38Ĩndĩ ethĩwa Ndemetelio na andũ aa masũvasya mavisa wĩ namo me na ũndũ na mũndũ, koti yĩ vo, na asili ma makoani mekw'o; nĩmoke masikatane. 39Na ethĩwa mwĩ na ũndũ ũngĩ wĩ mbeange wa vau, ũsu ũkekalĩlwa nthĩ nzamanĩ ĩla yaĩle. 40Oyu nĩtũtonya kũsikatĩwa ithokoo kumana na ituu ii syĩkw'o ũmũnthĩ, na nũndũ nĩ sya mana vai kĩtumi kĩseo tũtonya kũnengane.” 41Amina kũneena ũu, nĩwoombũũkisye ĩkomano yĩu.

Currently Selected:

Meko 19: KAMBA

Highlight

Copy

Compare