Meko 17
17
Andũ Mayũkĩlya Ithokoo Thesalonika nũndũ wa Vaũlo
1Vaũlo na Sila nĩmavĩtĩle ndũanĩ yĩtawa Ambivolisi na ĩngĩ yĩtawa Avolonia mavika Thesalonika, navo vaĩ nyũmba ya Ayuti ya kũthaithĩa na kũmbanĩa. 2Vaũlo nĩwaendie avulana namo o tondũ wakothaa kwĩka, na mĩthenyanĩ ĩtatũ ya Savato ekala akĩneenany'a namo maũndũ kuma Maandĩkonĩ Matheu. 3Nĩwamaeleasya na kũmony'a kwa w'o kana vaĩ vata wa Klĩsto kũthĩna na kũthayũũka kuma kwa akw'ũ. Nĩwameie atĩĩ, “Yesũ ũũ ngũmũtavya ũvoo wake nĩwe Klĩsto.” 4Amwe moo nĩmeetĩkĩlile ndeto isu na makwatana na Vaũlo na Sila, o vamwe na nguthu nene ya Akiliki maĩ na kĩkĩo kya Ngai, na aka aingĩ maĩ nguma ndũanĩ ĩsu.
5Ĩndĩ Ayuti amwe nĩmakwatiwe nĩ kĩwĩu na moosa ing'endilĩ kuma nguthunĩ ya andũ athũku ndũanĩ ĩsu, maseũvya kĩkundi kyookĩlya ithokoo ndũanĩ yonthe. Nĩmavithũkĩie nyũmba ya Yasoni maimantha Vaũlo na Sila mamaumaalye andũnĩ. 6Yĩla maleile kũmethĩa vau, nĩmakusũlanilye Yasoni na aĩkĩĩi angĩ mamatwaa mbee wa anene ma ndũa na malonzany'a mayasya atĩĩ, “Andũ aa maetete ithokoo kĩla vandũ ĩũlũ wa nthĩ nĩmokie kũũ kwitũ, 7na Yasoni amekalĩtye mũsyĩ kwake. Onthe maendee na kũtũla mwĩao wa Mũsumbĩ wa Loma kwa kwasya kana ve mũsumbĩ ũngĩ wĩtawa Yesũ.” 8Andũ onthe vamwe na anene ma ndũa ĩsu, nĩmakwatiwe nĩ kĩũũyũ meew'a ndeto isu. 9Nĩvo ĩndĩ anene asu maumĩthisye Yasoni na ala angĩ waĩ namo mbesa nĩ kana mamalekye, na mamaeka mathi.
Vaũlo na Sila me Mbelea
10Kwamina kũtuka oou, aĩkĩĩi nĩmeeie Vaũlo na Sila nĩmathi Mbelea. Mavika kũu nĩmaendie nyũmbanĩ ya Ayuti ya kũthaithĩa na kũmbanĩa. 11Andũ ma kũu maĩ ngoo nzeo kwĩ andũ ma Thesalonika, nũndũ nĩmeetĩkĩlile ndeto ya Ngai na ngoo nthalĩku, na nĩmasomaa Maandĩko Matheu kĩla mũthenya, masisye kana maũndũ ala Vaũlo waneenaa mailyĩ oou. 12Ayuti aingĩ nĩmeetĩkĩlile, o vamwe na nguthu nene ya aka Akiliki me nguma na aũme aingĩ o ta ũu.
13Yĩla Ayuti ma Thesalonika mamanyie kana Vaũlo aendee na kũtavany'a ndeto ya Ngai, nĩmaendie kũu o nakw'o mathokoany'a andũ na kũmekĩa kĩũũyũ. 14Nĩvo ĩndĩ o vau kwa vau aĩkĩĩi mamumaaisye Vaũlo athi ũtee wa ũkanga, ĩndĩ Sila na Timotheo matiwa kũu Mbelea. 15Andũ ala mamumaaisye Vaũlo mamũvikisye Athene, na ĩndĩ masyoka na ũtũmani kuma kwa Vaũlo makatavye Timotheo na Sila mamũatĩĩe mĩtũkĩ ũndũ vatonyeka.
Ũtavany'a wa Vaũlo Athene
16Vaũlo aendee na kweteela Timotheo na Sila kũu Athene, nĩwathĩnĩkie mũno vevanĩ oona ũndũ ndũa ĩsu yonthe yusũĩte mavisa ma ngai sya mĩvw'anano. 17Kwoou e nyũmbanĩ ya Ayuti ya kũthaithĩa na kũmbanĩa nĩwaneenanisye na Ayuti na Andũ ma-mbaĩ-ingĩ maĩ na kĩkĩo kya Ngai. O ta ũu kĩla mũthenya nĩwaneenanasya na andũ kũu ndũnyũ ala weethĩa kw'o. 18Andũ amwe ma Evikũleo na ma Sitoiko maĩ na kĩsomo kya ũĩ o namo nĩmambĩĩie kũkananĩa nake. Amwe makũlasya atĩĩ, “Mũndũ ũũ wa kwĩka kũvũũkwa nĩ ndeto eweta kyaũ?” Namo angĩ mayasya atĩĩ, “Mũndũ ũũ eoneka nĩ mũtavany'a wa ngai ngeni!” Andũ asu maasya ũu nũndũ Vaũlo atavanasya ũvoo ĩũlũ wa Yesũ, na ĩũlũ wa kũthayũũka kwa andũ kuma kwa akw'ũ. 19Nĩvo ĩndĩ moosie Vaũlo na mamũtwaa nzamanĩ yĩtawa Aleovako na masya atĩĩ, “Twĩenda kũmanya ũmanyĩsyo ũũ mweũ ũũneena ĩũlũ wa w'o nĩ mwaũ! 20Nĩtwĩw'ĩte ũineena syĩndũ ngeni matũnĩ maitũ na twĩenda kũmanya syĩweta ĩũlũ wa kyaũ.” 21Andũ ma Athene onthe o vamwe na aeni ala mekalaa kw'o, matũmĩaa masaa moo maineena na kwĩthukĩĩsya maũndũ ala mooka meũ.
22Kwoou Vaũlo nĩwaũngamie katĩ wa nzama ĩsu ya Aleovako na asya atĩĩ, “Andũ ma Athene! Nĩngwona kwa nzĩa syonthe inyw'ĩ mwĩ athaithi mũno. 23Nũndũ yĩla nĩĩsĩlĩte ndũanĩ yenyu na kwĩloela syĩndũ ila mũthaithaa, nĩnonie kĩthembeo kĩmwe kĩandĩkĩtwe, ‘Kwa Ngai ũtesĩkĩwe.’ Kwoou ũsu mũthaithaa mũtamwĩsĩ nĩwe ngũmũtavany'a kwenyu. 24#1Asu 8.27; Ĩsa 42.5; Meko 7.48 Ngai ũla woombie nthĩ na syĩndũ syonthe ila syĩ vo, nĩwe Mwĩai wa ĩtu na nthĩ, na kwoou ndekalaa kũndũ kũseũvĩtw'e nĩ andũ. 25O na ndathũkũmawa nĩ andũ na moko ta wĩ na vata wa kĩndũ. We nĩwe ũnengae andũ onthe thayũ na kũmatonyethya kũveva, o vamwe na kũmanenga syĩndũ ila ingĩ syonthe. 26Kuma mũndũnĩ ũmwe, Ngai nĩwoombie mbaĩ syonthe sya andũ matũae kĩla vandũ ĩũlũ wa nthĩ, na aĩ ambĩte kũtw'a ĩvinda yĩla makethĩwa, na vala makatũa. 27Ngai eekie ũu nĩ kana mbaĩ isu syonthe imũmanthe, na vatonyeka imũvavate kũvikĩa imwone. Ĩndĩ o vamwe na ũu, Ngai nde vaasa na mũndũ o na wĩva, 28nũndũ nĩwe ũtũtonyethasya kwĩthĩwa thayũ, na akĩtũtonyethya kũthi.
‘Nĩ kwa ũtonyi wake ithyĩ twĩ thayũ, tũendaa na twĩ vo.’
Na o tondũ amwe menyu ala matilaa mbathi maĩtye,
‘Ithyĩ twĩ syana syake.’
29Kwoou ĩndĩ, kwa kwĩthĩwa twĩ syana sya Ngai, tũyaĩlwe nĩ kũsũanĩa Ũ-Ngai nĩkũvw'ananw'a na kĩndũ ta thaavu, silĩva, kana ĩvia, kĩndũ kya kwasũvw'a kumana na ũĩ wa mũndũ. 30Ĩvinda yĩla andũ matamanyaa kĩla maĩlĩte kwĩka, Ngai ndaamakũlya ũndũ, ĩndĩ yu emeaĩa andũ onthe kĩla vandũ melile kwondũ wa naĩ syoo, 31nĩkwĩthĩwa nũminĩte kũvanga mũthenya ũla wĩsilĩla andũ onthe na ũw'o, kwĩsĩla mũndũnĩ ũmwe wĩtawa Yesũ ũla we ũnyuvĩte. Ngai nũĩkĩĩthĩtye andũ onthe ũndũ ũsu kwa kũmũthayũũkya ũsu ũnyuvĩte kuma kwa akw'ũ.”
32Yĩla andũ asu meewie Vaũlo aneena ĩũlũ wa ũthayũũkyo wa akw'ũ, amwe moo nĩmamũthekeeie, na angĩ mamwĩa atĩĩ, “Tũkakwĩthukĩĩsya ĩngĩ ũvoonĩ ũsu.” 33Kwoou Vaũlo nĩwaumie vala maĩ athi. 34Ĩndĩ ve andũ amwe maendanisye na Vaũlo na matw'ĩka aĩkĩĩi. Katĩ wa andũ asu vaĩ Ndionisio, nake aĩ wa nzama ya Aleovako, na o ta ũu vaĩ mũndũ mũka weetawa Ndamalisi na andũ angĩ maĩ namo.
Currently Selected:
Meko 17: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
Meko 17
17
Andũ Mayũkĩlya Ithokoo Thesalonika nũndũ wa Vaũlo
1Vaũlo na Sila nĩmavĩtĩle ndũanĩ yĩtawa Ambivolisi na ĩngĩ yĩtawa Avolonia mavika Thesalonika, navo vaĩ nyũmba ya Ayuti ya kũthaithĩa na kũmbanĩa. 2Vaũlo nĩwaendie avulana namo o tondũ wakothaa kwĩka, na mĩthenyanĩ ĩtatũ ya Savato ekala akĩneenany'a namo maũndũ kuma Maandĩkonĩ Matheu. 3Nĩwamaeleasya na kũmony'a kwa w'o kana vaĩ vata wa Klĩsto kũthĩna na kũthayũũka kuma kwa akw'ũ. Nĩwameie atĩĩ, “Yesũ ũũ ngũmũtavya ũvoo wake nĩwe Klĩsto.” 4Amwe moo nĩmeetĩkĩlile ndeto isu na makwatana na Vaũlo na Sila, o vamwe na nguthu nene ya Akiliki maĩ na kĩkĩo kya Ngai, na aka aingĩ maĩ nguma ndũanĩ ĩsu.
5Ĩndĩ Ayuti amwe nĩmakwatiwe nĩ kĩwĩu na moosa ing'endilĩ kuma nguthunĩ ya andũ athũku ndũanĩ ĩsu, maseũvya kĩkundi kyookĩlya ithokoo ndũanĩ yonthe. Nĩmavithũkĩie nyũmba ya Yasoni maimantha Vaũlo na Sila mamaumaalye andũnĩ. 6Yĩla maleile kũmethĩa vau, nĩmakusũlanilye Yasoni na aĩkĩĩi angĩ mamatwaa mbee wa anene ma ndũa na malonzany'a mayasya atĩĩ, “Andũ aa maetete ithokoo kĩla vandũ ĩũlũ wa nthĩ nĩmokie kũũ kwitũ, 7na Yasoni amekalĩtye mũsyĩ kwake. Onthe maendee na kũtũla mwĩao wa Mũsumbĩ wa Loma kwa kwasya kana ve mũsumbĩ ũngĩ wĩtawa Yesũ.” 8Andũ onthe vamwe na anene ma ndũa ĩsu, nĩmakwatiwe nĩ kĩũũyũ meew'a ndeto isu. 9Nĩvo ĩndĩ anene asu maumĩthisye Yasoni na ala angĩ waĩ namo mbesa nĩ kana mamalekye, na mamaeka mathi.
Vaũlo na Sila me Mbelea
10Kwamina kũtuka oou, aĩkĩĩi nĩmeeie Vaũlo na Sila nĩmathi Mbelea. Mavika kũu nĩmaendie nyũmbanĩ ya Ayuti ya kũthaithĩa na kũmbanĩa. 11Andũ ma kũu maĩ ngoo nzeo kwĩ andũ ma Thesalonika, nũndũ nĩmeetĩkĩlile ndeto ya Ngai na ngoo nthalĩku, na nĩmasomaa Maandĩko Matheu kĩla mũthenya, masisye kana maũndũ ala Vaũlo waneenaa mailyĩ oou. 12Ayuti aingĩ nĩmeetĩkĩlile, o vamwe na nguthu nene ya aka Akiliki me nguma na aũme aingĩ o ta ũu.
13Yĩla Ayuti ma Thesalonika mamanyie kana Vaũlo aendee na kũtavany'a ndeto ya Ngai, nĩmaendie kũu o nakw'o mathokoany'a andũ na kũmekĩa kĩũũyũ. 14Nĩvo ĩndĩ o vau kwa vau aĩkĩĩi mamumaaisye Vaũlo athi ũtee wa ũkanga, ĩndĩ Sila na Timotheo matiwa kũu Mbelea. 15Andũ ala mamumaaisye Vaũlo mamũvikisye Athene, na ĩndĩ masyoka na ũtũmani kuma kwa Vaũlo makatavye Timotheo na Sila mamũatĩĩe mĩtũkĩ ũndũ vatonyeka.
Ũtavany'a wa Vaũlo Athene
16Vaũlo aendee na kweteela Timotheo na Sila kũu Athene, nĩwathĩnĩkie mũno vevanĩ oona ũndũ ndũa ĩsu yonthe yusũĩte mavisa ma ngai sya mĩvw'anano. 17Kwoou e nyũmbanĩ ya Ayuti ya kũthaithĩa na kũmbanĩa nĩwaneenanisye na Ayuti na Andũ ma-mbaĩ-ingĩ maĩ na kĩkĩo kya Ngai. O ta ũu kĩla mũthenya nĩwaneenanasya na andũ kũu ndũnyũ ala weethĩa kw'o. 18Andũ amwe ma Evikũleo na ma Sitoiko maĩ na kĩsomo kya ũĩ o namo nĩmambĩĩie kũkananĩa nake. Amwe makũlasya atĩĩ, “Mũndũ ũũ wa kwĩka kũvũũkwa nĩ ndeto eweta kyaũ?” Namo angĩ mayasya atĩĩ, “Mũndũ ũũ eoneka nĩ mũtavany'a wa ngai ngeni!” Andũ asu maasya ũu nũndũ Vaũlo atavanasya ũvoo ĩũlũ wa Yesũ, na ĩũlũ wa kũthayũũka kwa andũ kuma kwa akw'ũ. 19Nĩvo ĩndĩ moosie Vaũlo na mamũtwaa nzamanĩ yĩtawa Aleovako na masya atĩĩ, “Twĩenda kũmanya ũmanyĩsyo ũũ mweũ ũũneena ĩũlũ wa w'o nĩ mwaũ! 20Nĩtwĩw'ĩte ũineena syĩndũ ngeni matũnĩ maitũ na twĩenda kũmanya syĩweta ĩũlũ wa kyaũ.” 21Andũ ma Athene onthe o vamwe na aeni ala mekalaa kw'o, matũmĩaa masaa moo maineena na kwĩthukĩĩsya maũndũ ala mooka meũ.
22Kwoou Vaũlo nĩwaũngamie katĩ wa nzama ĩsu ya Aleovako na asya atĩĩ, “Andũ ma Athene! Nĩngwona kwa nzĩa syonthe inyw'ĩ mwĩ athaithi mũno. 23Nũndũ yĩla nĩĩsĩlĩte ndũanĩ yenyu na kwĩloela syĩndũ ila mũthaithaa, nĩnonie kĩthembeo kĩmwe kĩandĩkĩtwe, ‘Kwa Ngai ũtesĩkĩwe.’ Kwoou ũsu mũthaithaa mũtamwĩsĩ nĩwe ngũmũtavany'a kwenyu. 24#1Asu 8.27; Ĩsa 42.5; Meko 7.48 Ngai ũla woombie nthĩ na syĩndũ syonthe ila syĩ vo, nĩwe Mwĩai wa ĩtu na nthĩ, na kwoou ndekalaa kũndũ kũseũvĩtw'e nĩ andũ. 25O na ndathũkũmawa nĩ andũ na moko ta wĩ na vata wa kĩndũ. We nĩwe ũnengae andũ onthe thayũ na kũmatonyethya kũveva, o vamwe na kũmanenga syĩndũ ila ingĩ syonthe. 26Kuma mũndũnĩ ũmwe, Ngai nĩwoombie mbaĩ syonthe sya andũ matũae kĩla vandũ ĩũlũ wa nthĩ, na aĩ ambĩte kũtw'a ĩvinda yĩla makethĩwa, na vala makatũa. 27Ngai eekie ũu nĩ kana mbaĩ isu syonthe imũmanthe, na vatonyeka imũvavate kũvikĩa imwone. Ĩndĩ o vamwe na ũu, Ngai nde vaasa na mũndũ o na wĩva, 28nũndũ nĩwe ũtũtonyethasya kwĩthĩwa thayũ, na akĩtũtonyethya kũthi.
‘Nĩ kwa ũtonyi wake ithyĩ twĩ thayũ, tũendaa na twĩ vo.’
Na o tondũ amwe menyu ala matilaa mbathi maĩtye,
‘Ithyĩ twĩ syana syake.’
29Kwoou ĩndĩ, kwa kwĩthĩwa twĩ syana sya Ngai, tũyaĩlwe nĩ kũsũanĩa Ũ-Ngai nĩkũvw'ananw'a na kĩndũ ta thaavu, silĩva, kana ĩvia, kĩndũ kya kwasũvw'a kumana na ũĩ wa mũndũ. 30Ĩvinda yĩla andũ matamanyaa kĩla maĩlĩte kwĩka, Ngai ndaamakũlya ũndũ, ĩndĩ yu emeaĩa andũ onthe kĩla vandũ melile kwondũ wa naĩ syoo, 31nĩkwĩthĩwa nũminĩte kũvanga mũthenya ũla wĩsilĩla andũ onthe na ũw'o, kwĩsĩla mũndũnĩ ũmwe wĩtawa Yesũ ũla we ũnyuvĩte. Ngai nũĩkĩĩthĩtye andũ onthe ũndũ ũsu kwa kũmũthayũũkya ũsu ũnyuvĩte kuma kwa akw'ũ.”
32Yĩla andũ asu meewie Vaũlo aneena ĩũlũ wa ũthayũũkyo wa akw'ũ, amwe moo nĩmamũthekeeie, na angĩ mamwĩa atĩĩ, “Tũkakwĩthukĩĩsya ĩngĩ ũvoonĩ ũsu.” 33Kwoou Vaũlo nĩwaumie vala maĩ athi. 34Ĩndĩ ve andũ amwe maendanisye na Vaũlo na matw'ĩka aĩkĩĩi. Katĩ wa andũ asu vaĩ Ndionisio, nake aĩ wa nzama ya Aleovako, na o ta ũu vaĩ mũndũ mũka weetawa Ndamalisi na andũ angĩ maĩ namo.
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011