Meko 14

Vaũlo na Valanava me Ĩkoniamu

1Vaũlo na Valanava me kũu Ĩkoniamu nĩmaendie nyũmbanĩ ya Ayuti ya kũthaithĩa na kũmbanĩa o tondũ makothaa kwĩka, na matavany'a nesa mũno kũvika nguthu nene ya Ayuti na Akiliki matw'ĩka aĩkĩĩi. 2Ĩndĩ Ayuti ala maleile kũĩkĩĩa nĩmeekĩie ndeto nthũku ilĩkonĩ sya Andũ-ma-mbaĩ-ingĩ, na mamaingĩanĩsya na aĩkĩĩi. 3Kwoou Vaũlo na Valanava nĩmaendeeie kwĩkala kũu vandũ va ĩvinda ĩasa, makĩtavany'a na ũkũmbaũ ũvoo wa Mwĩai, nake Mwĩai aĩkĩĩthya kana ndeto ila maneenaa ĩũlũ wa mumo wake nĩ sya w'o, kwa kũmatonyethya kwĩka syama na maũndũ ma kũseng'ya. 4Ĩndĩ andũ ma ndũa ĩsu nĩmaanĩkie; amwe meethĩwa ngalĩko ya Ayuti, na ala angĩ ngalĩko ya atũmwa.

5Nĩvo ĩndĩ mũvango waseũviw'e nĩ amwe ma Andũ-ma-mbaĩ-ingĩ na Ayuti, vamwe na atongoi moo mathĩny'e atũmwa asu na maimakimanga na mavia. 6Atũmwa asu nĩmamanyie ũvoo ũsu na makĩa mathi ndũanĩ ya Lisitela na ya Ndelive, nasyo nĩ ndũa syĩ kĩsionĩ kya Likonia, na o ta ũu mathi isionĩ ila syĩ vakuvĩ na kĩsio kĩu. 7Kũu nĩmaendeeie na kũtavany'a Ũvoo Mũseo.

Vaũlo na Valanava me Lisitela na Ndelive

8Lisitela kwaĩ mũndũ ũmwe wailyĩ nthĩ waĩ kyonze kuma kũsyawa, ũtaĩ aathi na maũũ. 9Mũndũ ũsu nĩwamwĩthukĩĩisye Vaũlo aendee na kũtavany'a. Vaũlo nĩwamũketeeie oona e na mũĩkĩĩo ũtuma avow'a, 10na amwĩa na wasya mũnene atĩĩ, “Ũkĩla ũũngame vyũ na maũũ maku!” Nĩwookĩlile na athi ekinyĩtye. 11Yĩla ĩkomano yoonie ũndũ Vaũlo weeka, nĩyauanĩisye ngemi yasya na kĩthyomo kya Kĩlikaonia atĩĩ, “Ngai nĩsyatheea kũũ tũĩ syĩ na mũvw'ano wa mũndũ!” 12Valanava mamwĩtie Nzeũsi, nake Vaũlo mamwĩta Emesi nũndũ nĩwe waneenaa. 13Mũthembi wa ngai ĩla yĩtawa Nzeũsi, ĩla ĩkalũ ya yo yaĩ o vau mumĩlo wa ndũa ĩsu, nĩwaendie aete ng'ombe na syove sya malaa vau mũvĩanĩ ayenda we vamwe na andũ mathembee atũmwa asu.

14Yĩla Valanava na Vaũlo meewie ũu, nĩmatembũie ngũa syoo na masemba mathi vala ve ĩkomano maneenete na wasya mũnene mayasya atĩĩ, 15#Kuma 20.11; Sav 146.6 “Inyw'ĩ andũ aa, mwĩĩka ũu nĩkĩ? Ithyĩ twĩ andũ, tũilyĩ o tenyu na tũmũeteete Ũvoo Mũseo nĩ kana mũtiane na maũndũ aa ma mana, na mũimwelekela Ngai ũla wĩ thayũ, ũla woombie ĩtu na nthĩ na ũkanga na syĩndũ syonthe ila syĩ nthĩnĩ wasyo. 16Ĩvinda yĩ na vu ĩtina, Ngai nĩwaekete mbaĩ syonthe syĩke o ũndũ ikwenda. 17Ĩndĩ o vamwe na ũu, ndaaeka kwĩyonany'a nĩwe ũũ kwĩsĩla maũndũnĩ maseo ala wĩkaa: Nũmuĩasya mbua kuma ĩtunĩ, akamũnenga mavinda ma kũketha; nũmũnengae lĩu mwingĩ na kusũsya ngoo syenyu na ũtanu.” 18Ĩndĩ o na maneenete ndeto isu, waĩ ũndũ wĩ vinya kũsiĩĩa andũ asu maikamathembee.

19Ĩndĩ Ayuti amwe nĩmookie Lisitela kuma Andiokia na Ĩkoniamu, na maingĩanĩsya andũ kũla kwĩ Vaũlo. Nĩmamũkimangie na mavia, na mamũkusũlany'a mamũtwaa nza wa ndũa mayona ta mũkw'ũ. 20Ĩndĩ yĩla aĩkĩĩi mookie moombanĩa vala ũĩ mamũthyũlũlũkĩte, nĩwookĩlile na asyoka ĩngĩ vau ndũanĩ. Ũnĩ ũsu nĩwaumie kũu e na Valanava mathi Ndelive.

Vaũlo na Valanava Maisyoka Andiokia, Nthĩ ya Silia

21Ĩtina wa Vaũlo na Valanava kũtavany'a Ũvoo Mũseo Ndelive na kũkwata amanyĩw'a aingĩ, nĩmasyokeile Lisitela, Ĩkoniamu, na Andiokia ĩla yĩ Visindia 22mathuthĩtye aĩkĩĩi na kũmathangaasya maendee na kũlũma mũĩkĩĩonĩ. Nĩmameie atĩĩ, “Tũilea kũvĩtĩla mathĩnanĩ maingĩ tũilika ũsumbĩnĩ wa Ngai.” 23Vaũlo na Valanava nĩmamanyuvĩie atumĩa nthĩnĩ wa kĩla ĩkanisa, na kwa kũvoya na kũtĩĩa kũya mamanengane kwa Mwĩai ũla maiĩte mũĩkĩĩo woo nthĩnĩ wake.

24Nĩvo ĩndĩ atũmwa asu mesĩlile Visindia mathi Vambilia. 25Mamina kũtavany'a ndeto ya Ngai Velika, nĩmatheeie mathi Atalia. 26Kuma vau nĩmalikile melinĩ mathi Andiokia, vala manenganĩtwe ũsũvĩonĩ wa mumo wa Ngai kwondũ wa ũthũkũmi ũla maĩ maneanĩsya.

27Mavika Andiokia nĩmoombanisye andũ onthe ma ĩkanisa, na mamatavya maũndũ onthe ala Ngai wamatonyethetye kwĩka, na ũndũ Ngai ũnavingũĩe Andũ-ma-mbaĩ-ingĩ mũomo malike mũĩkĩĩonĩ. 28Atũmwa asu nĩmaendeeie na kwĩkala na aĩkĩĩi kũu vandũ va ĩvinda ĩasa.

Currently Selected:

Meko 14: KAMBA

Highlight

Copy

Compare