2Sam 2
2
Ndeviti Aitw'ĩkĩthw'a Mũsumbĩ wa Yuta
1Ĩtina wa maũndũ asu, Ndeviti nĩwakũlilye Mwĩai Ngai atĩĩ, “Nĩndonya kũthi ndũanĩ ĩmwe katĩ wa ndũa sya Yuta?”
Nake Mwĩai Ngai amũsũngĩa, “Ĩĩ, enda.”
Ndeviti amũkũlya, “Nĩthi ndũanĩ yĩva.”
Mwĩai Ngai amũsũngĩa amwĩa, “Enda ndũanĩ ya Eviloni.” 2#1Sam 25.42-43 Kwoou Ndeviti nĩwaendie Eviloni e na iveti syake syelĩ: Ainoamu, ũla waumĩte ndũanĩ ya Yesileeli, na Avikaili ũla waĩ kĩveti kya Navali, ũla waumĩte ndũanĩ ya Kalimeli. 3O ta ũu nĩwaendanisye na aũme ala weethĩawa namo, me na andũ ma mĩsyĩ yoo, na matũa ndũanĩ ila syĩlingĩlĩte Eviloni. 4#1Sam 31.11-13 Nĩvo ĩndĩ andũ ma Yuta mookie Eviloni na matw'ĩkĩthya Ndeviti mũsumbĩ wa Yuta.
Yĩla Ndeviti wataviw'e kana andũ ma Yavesi-ngileati nĩmo manathikie Saũlo, 5nĩwatũmie andũ amwe mathi kũu makamee atĩĩ, “Mwĩai Ngai nĩamũathime kwondũ wa kwĩka Saũlo mũnene wenyu nesa kwa kũmũthika. 6Mwĩai Ngai nĩamwĩke nesa na kwĩthĩwa e mũĩkĩĩku kwenyu. O ta ũu o nakwa nĩngũmwĩka nesa nũndũ wa ũseo ũla mũmbĩkĩte. 7Yu ĩndĩ, ĩthĩwai na vinya na ũkũmbaũ, nĩkwĩthĩwa Saũlo mũnene wenyu nĩ mũkw'ũ, na andũ ma Yuta nĩmanyuvĩte nĩtw'ĩke mũsumbĩ woo.”
Isivosethi Aitw'ĩkĩthw'a Mũsumbĩ wa Ĩsilaeli
8Avineli mwana wa Neli, mũnene wa nguthu ya asikalĩ ya Saũlo, nĩwoosete Isivosethi mwana wa Saũlo, na akamũtwaa Maanaimu mũingo wa Ũsĩ wa Yolotani. 9Me vau Avineli nĩwatw'ĩkĩthisye Isivosethi mũsumbĩ wa isio sya Ngileati, Asuli, Yesileeli, Evalaimu na Mbengyameni, na wa nthĩ ya Ĩsilaeli yonthe. 10Isivosethi aĩ na ũkũũ wa myaka mĩongo ĩna yĩla watw'ĩkĩthiw'e mũsumbĩ. Nĩwasumbĩkie vandũ va myaka ĩlĩ.
Ĩndĩ andũ ma mbaĩ ya Yuta nĩmaatĩĩie Ndeviti, 11nake nĩwamasumbĩkie e Eviloni vandũ va myaka mũonza na nyusu.
Andũ ma Ĩsilaeli Mayũkita na ma Yuta
12Avineli na anini ma Isivosethi nĩmaumie Maanaimu mathi ndũanĩ ya Ngiveoni. 13Yoavu ũla inyia wake weetawa Nzeluia, na anini ma Ndeviti nĩmakomanĩie namo vakuvĩ na ndia ya Ngiveoni. Nĩmekalile nthĩ vau kĩkundi kĩmwe kĩ ngalĩko ĩmwe ya ndia ĩsu na kĩkundi kĩla kĩngĩ kĩ ngalĩko ĩla ĩngĩ. 14Nĩvo ĩndĩ Avineli weeie Yoavu atĩĩ, “Nĩtwose anake kuma kĩla ngalĩko mokite tũsyaĩĩsye.”
Nake Yoavu asya, “Mokĩle meke ũu.” 15Kwoou aũme ĩkũmi na elĩ kuma ngalĩko ya Isivosethi ma mbaĩ ya Mbengyameni nĩmokitie na aũme ĩkũmi na elĩ kuma ngalĩko ya Ndeviti. 16Kwoou kĩla ũmwe woo nĩwakwatie mũndũ ũngĩ wa ngalĩko ĩla ĩngĩ mũtwe na matonyanĩla mbaunĩ. Nĩmavalũkile nthĩ makw'a, na kĩu nĩkyo kyatumie vandũ vau vala ve Ngiveoni vetwa Elikathi-asulimu.#2.16 Elikathi-asulimu: Ũalyũlo wa ndeto ĩno nĩ kĩsesi kya mbyũ mbũĩ ngalĩko syelĩ.
17Nĩvo ĩndĩ kaũ mũnene wambĩĩe, na Avineli na andũ ma Ĩsilaeli masindwa nĩ andũ ala maĩ ngalĩko ya Ndeviti. 18Ana atatũ ma Nzeluia maĩ vau: Yoavu, Avisai na Asaeli. Asaeli aĩ maũũ mũno na aĩ atonya kũsemba ta nthwaia. 19Nĩwasembanisye Avineli ateũsisya ngalĩko ya kw'oko kwa aka kana ya kw'oko kwa aũme. 20Avineli nĩwavĩndũkie asisya ĩtina na akũlya atĩĩ, “Ũsu nĩ Asaeli?”
Nake Asaeli asũngĩa asya, “Ĩĩ ninyie.”
21Avineli amwĩa, “Vĩndũka ngalĩko ya kw'oko kwa aũme kana ya kw'oko kwa aka, ũkwate mũsikalĩ ũmwe na ũyosa syĩndũ ila wĩ nasyo.” Ĩndĩ Asaeli nĩwaendeeie kũmũsembany'a. 22Avineli nĩweeie Asaeli ĩngĩ, “Eka kũnzembany'a! Wĩenda ngũae nĩkĩ! Ngeea mwana-a-inyia waku Yoavu ata?” 23Asaeli ndaaeka kũmũsembany'a; kwoou Avineli nĩwamũtonyie ĩvu na ngalĩko ya ĩtina ya ĩtumo yake nginya ĩtumo yĩu yaumĩlĩĩla mũongo. Asaeli nĩwavalũkile vau waĩ, na akw'a. Andũ onthe mavika vau wavalũkĩte e mũkw'ũ nĩmaũngamie.
24Ĩndĩ Yoavu na Avisai nĩmaendeeie kũatĩĩa Avineli, na syũa yĩithũa mavika Kĩĩmanĩ kya Ama, kĩla kĩ ngalĩko ya wumĩlonĩ wa syũa ya Ngia, nzĩanĩ ĩla ĩendete weũnĩ wa Ngiveoni. 25Aũme kuma mbaĩnĩ ya Mbengyameni nĩmoombanie ĩngĩ matongoew'e nĩ Avineli, na maũngama kĩĩmanĩ mũthya. 26Avineli nĩweetie Yoavu amũkũlya atĩĩ, “Kĩla ĩvinda tũkatindĩaa kũkita? We no ũkũmanya kana mũminũkĩlyonĩ vai ũndũ ũngĩ ũkethĩwa ate o woo? Ithyĩ twĩ andũ ma nthĩ yenyu. Wĩĩkala ĩvinda yĩana ata ũyĩsa kwĩyĩaĩa aũme menyu maeke kũtũsembany'a?”
27Nake Yoavu asũngĩa asya atĩĩ, “Nĩngwĩvĩta ĩsyĩtwanĩ ya Ngai ũla wĩ thayũ, kana kethĩwa ndũnaneena, aũme makwa maendeea kũmũsembany'a nginya ũnĩ kwakya.” 28Nĩvo ĩndĩ Yoavu wavuvie soo ta wonany'o kũla kwĩ aũme make nĩ kana maeke kũsembany'a andũ ma Ĩsilaeli; kwoou kaũ nĩwathelile.
29Ũtukũ ũsu w'onthe Avineli na aũme make nĩmavĩtĩle Mwandanĩ wa Yolotani. Nĩmaingie Ũsĩ wa Yolotani, na maendeea na kyalo kwĩsĩla nthĩ ya Vithiloni yonthe, kũthi kũvika Maanaimu.
30Nĩvo ĩndĩ Yoavu wasyokie aeka kũsembany'a Avineli, na oombany'a aũme make onthe. Eka Asaeli, aũme angĩ ĩkũmi na kenda ma Ndeviti nĩmeethĩiwe matevo. 31Ĩndĩ aũme ma Ndeviti nĩmooaĩte andũ maana atatũ na mĩongo thanthatũ ma Mbengyameni, ala maĩ vamwe na Avineli. 32Nĩmoosie Asaeli na mamũthika mbũanĩ ya ĩthe wake ĩla yaĩ Mbetheleemu. Ĩtina wa ũu Yoavu na aũme make nĩmaendie ũtukũ ũsu w'onthe nginya mavika Eviloni ũnĩ ũsu ũngĩ kwakya tene.
Currently Selected:
2Sam 2: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011