1Ako Ũelesyo wa Ĩvuku Yĩĩ
Ũelesyo wa Ĩvuku Yĩĩ
Valũa wa mbee wa Vaũlo kwa Akolintho waandĩkiwe ũtetheesye kũmina mathĩna ĩũlũ wa mwĩkalo wa Aklĩsto, na ĩũlũ wa mũĩkĩĩo. Mathĩna asu mookĩlĩte ĩkanisanĩ yĩla Vaũlo waĩ anambĩĩa Kolintho. Ĩvindanĩ yĩu Kolintho yaĩ nguma mũno nthĩnĩ wa nthĩ ya Ũkiliki, na nĩyo yaĩ mũsyĩ mũnene wa kĩsio kya ũsumbĩ wa Loma kya Akaia. Nĩyeesĩkĩwe mũno maũndũnĩ ma ũtandĩthya, syĩthĩo, mwĩkalo mũthũku wa andũ, na mothaithi ma mĩthemba mingĩ.
Mũtũmwa Vaũlo mũno mũno eneena ĩũlũ wa mathĩna ma ũtilĩkangano na mwĩkalo mũthũku wa andũ ĩkanisanĩ, na o ta ũu ĩũlũ wa maũndũ ma kũmanyana kĩ-mwĩĩ, mũtwaano, maũndũ ma wasya wa ngoo, mwĩkalo wa andũ ĩkanisanĩ, mĩthĩnzĩo ya Veva Mũtheu na ĩũlũ wa ũthayũũkyo wa akw'ũ. Nĩwonanĩtye kwa ũliku ũndũ Ũvoo Mũseo ũneenete ĩũlũ wa maũndũ asu.
Kĩlungu kya ĩkũmi na itatũ, kĩla kĩeleetye wendo kwĩthĩwa ne w'o mũthĩnzĩo ũla mũseo vyũ wa Ngai kwa andũ make, nĩkĩtonya kwĩwa kana nĩkyo kĩlungu kĩla kĩsĩkĩwe mũno nthĩnĩ wa ĩvuku yĩĩ.
Maũndũ ala me Ĩvukunĩ Yĩĩ
Ndeto sya mbee 1.1-9
Motilĩkangano nthĩnĩ wa ĩkanisa 1.10—4.21
Mwĩkalo wa kũmanyana kĩ-mwĩĩ na mwĩkalo wa mũsyĩ 5.1—7.40
Mwĩkalo wa Aklĩsto na ala mate Aklĩsto 8.1—11.1
Mwĩkalĩle wa ĩkanisa na maũndũ ma ũthaithi 11.2—14.40
Kũthayũũkw'a kwa Klĩsto na kwa Aĩkĩĩi 15.1-58
Mũvothi kwondũ wa Aklĩsto ma Yutia 16.1-4
Maũndũ ma Vaũlo mwene na mũminũkĩlyo 16.5-24
Currently Selected:
1Ako Ũelesyo wa Ĩvuku Yĩĩ: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011