1Ako 2
2
Ũvoo ĩũlũ wa Klĩsto ũla Wambiwe
1Mbaitũ, yĩla nyie nookie kwenyu, ndyaaũka kũmũtavya kĩmbithĩ kya Ngai ngĩtũmĩa ũneeni wa ĩũlũ mũno kana ũĩ mwingĩ. 2Nũndũ vai kĩndũ kĩngĩ nendaa kũmanya yĩla naĩ katĩ wenyu eka Yesũ Klĩsto, na mũno mũno kĩkw'ũ kyake ngelany'onĩ. 3#Meko 18.9 Yĩla naĩ nenyu naĩ mwonzu, naĩ na w'ĩa mwingĩ na nĩnathĩlĩaa. 4Kũneena kwakwa na kũtavany'a kwakwa kũyaĩ na ndeto sya ũĩ sya kũĩkĩĩthya andũ, ĩndĩ kwaĩ na kwonany'a vinya wa Veva wa Ngai. 5Kwoou mũĩkĩĩo wenyu ti kwondũ wa ũĩ wa andũ, ĩndĩ nĩ kwondũ wa vinya wa Ngai.
Ũĩ wa Ngai
6Ĩndĩ o vamwe na ũu, tũtavanasya ũĩ kwa ala aima kĩ-veva, na ti ũĩ wa nthĩ ĩno kana wa asumbĩ ma nthĩ ma ĩvinda yĩĩ, ala maendete makathele. 7Ĩndĩ tũtavanasya ũĩ wa Ngai mũvithe, ũvithĩtwe andũ, na ũla Ngai wanyuvie kwondũ wa ũkumyo witũ mbee wa kũmbwa kwa nthĩ. 8Vai ũmwe wa asumbĩ ma nthĩ ĩno waamanya ũĩ ũsu; kethĩwa nĩmaũmanyie, mayĩthĩwa maamwamba Mwĩai wa ũkumyo. 9#Ĩsa 64.4 Ĩndĩ o tondũ Maandĩko Matheu maĩtye:
“Kĩndũ kĩla vate mũndũ waakyona kana waakĩw'a,
o na vate mũndũ waasũanĩa ĩũlũ wakyo,
nĩkyo Ngai ũmaseũvĩsye ala mamwendete.”
10Ngai nũtũvuanĩsye kwĩsĩla kwa Veva wake, nĩkwĩthĩwa Veva nũetae ũtheinĩ maũndũ onthe, o na maũndũ maliku ma Ngai. 11Nĩkũlya, ve mũndũ ũtonya kũmanya mosũanĩo ma mũndũ ũngĩ eka o veva wa mũndũ ũsu? Kwoou o ta ũu, vai mũndũ ũtonya kũmanya mosũanĩo ma Ngai eka Veva wa Ngai. 12Veva ũla ithyĩ tũkwatĩte ti wa maũndũ ma nthĩ ĩno, ĩndĩ nĩ Veva ũla wumaa kwa Ngai, nĩ kana tũtonye kũmanya mĩthĩnzĩo ĩla Ngai ũtũnengete.
13Kwoou tũineenaa ndeto tũmanyĩĩtw'e kumana na ũĩ wa mũndũ, ĩndĩ tũneenaa ndeto ila tũmanyĩĩtw'e nĩ Veva wa Ngai, yĩla tũkũelesya maũndũ ma kĩ-veva kwa ala me na Veva ũsu.#2.13 kwa ala me na Veva ũsu: Kana tũitũmĩa ndeto tũnengetwe nĩ Veva ũsu 14Mũndũ wa mwĩkalĩle wa kĩ-mũndũ ndatonya kũkwata mĩthĩnzĩo ya Veva wa Ngai, nũndũ kwake mĩthĩnzĩo ĩsu nĩ ũtumanu, na ndatonya kũmĩelewa nũndũ yĩkuũawa kwa nzĩa ya Veva. 15Mũndũ wa mwĩkalĩle wa kĩ-veva ekuũaa maũndũ onthe, ĩndĩ we mwene vai mũndũ ũtonya kũmwĩkuũa. 16#Ĩsa 40.13 O tondũ Maandĩko Matheu maĩtye:
“Nũũ ũla wĩsĩ mosũanĩo ma Mwĩai
nĩ kana amũmanyĩsye?”
Ĩndĩ ithyĩ nĩtwĩsĩ mosũanĩo ma Klĩsto.
Currently Selected:
1Ako 2: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
