MEKO MA ATŨMWA 24
24
Sila wa Vaulo mbee wa ngavana Velike
1Na ĩtina wa mĩthenya ĩtano ũla mũthembi mũnene Anania atheea na amwe ma atumĩa, na mũneeni ũmwe wetawa Telitulo; nao mamũtavya ngavana ũvoo wa Vaulo. 2Na Vaulo eetwa, Telitulo ambĩlĩlya ũmũvinganĩsya aiasya,
Nĩkwĩthĩwa ithyĩ twonaa mũuo mũnene nũndũ waku, we, Velike mũtaĩwa, na kwa ũsũvĩo waku maũndũ mathũku nĩmaseũvaw’a nthĩnĩ wa mbaĩ ĩno, 3#Meko 23.26; 26.25.nĩtũwosaa na nzĩa syonthe, na kũndũ kw’onthe, na mũvea w’onthe. 4Ĩndĩ ndikakwĩkalye vaa mũno, nĩngũkwĩsũva ũtwĩw’ĩe ndeto mbũthũ nũndũ wa ĩnee yaku. 5#Meko 17.6.Nũndũ nĩtwonete mũndũ ũũ, e mũndũ wĩ kolokolo, mwene kwambĩlĩlya mong’endu katĩ wa Ayuti onthe kũũ kw’onthe nthĩ, nake nĩ mũtongoi wa kĩthemba kya Anasali: 6#Meko 21.28.ũla watatie naw’o mbee wa ũu kũvukya ĩkalũ: na twamũkwata: (tũkyenda kũmũsilĩla kwĩanana na mĩao yaitũ. 7Ĩndĩ ũla mũnene wa asikalĩ ngili wĩtawa Lisiasi ooka, na amumya mokonĩ maitũ na vinva mũnene, 8#Meko 23.30.aimeaĩa avinganĩsya make moke mbee waku.) Nũtonya, kwa ũmũkũlya mwene, kũmanya maũndũ onthe ala tũũmũvinganĩĩsya. 9Na Ayuti nao maatĩĩa ũvingan’yo ũsu, makyasya, kana maũndũ asu nĩ ma w’o.
10Na ngavana amũkĩlĩlya kw’oko, nĩ kana aneene, Vaulo asũngĩa,
Nĩkwĩthĩwa nĩnĩsĩ kana we wĩ mũsili wa mbaĩ ĩno myaka mingĩ, nyie nĩngumya ũsũngĩo wakwa na mũyo; 11#Meko 21.17.nĩkwithĩwa nũtonya kũmanya vyũ, kana kuma yĩla naendie Yelusaleme kũthaitha, ndĩvĩtũka mĩthenya ĩkũmi na ĩli: 12na maiaambona ngĩkananĩa na mũndũ ĩkalũnĩ kana ngĩthokoan’ya nguthu, o na masinakokenĩ, o na ndũanĩ. 13O na maitonya kwonan’ya vyũ kana maũndũ asu ala meũmbinganĩĩsya kwaku nĩ ma w’o. 14#Meko 24.5.Ĩndĩ nĩngũlĩkĩla ũndũ ũũ ũmwe mbee waku, kana kũatĩĩa ĩla Nzĩa ĩla mamĩtaa kĩthemba kya ũvũngũ, nĩw’o nĩmũthũkũmaa Ngai wa aasa maitũ, ngĩtĩkĩla maũndũ onthe ala mosana na ĩla mĩao, na onthe ala maandĩkĩtwe mavukunĩ ma athani: 15#Nda 12.2; Yoa 5.28,29.nĩ na wĩkwatyo kwa Ngai, ũla aa namo ene meteele, kana kũkeethĩwa ũthayũũkyo wa ala alũngalu, na ala mate alũngalu nao. 16#Meko 23.1.Na kwa ũu nĩngwĩmanyĩsya mwene nĩthĩwe na wasya wa ngoo ũte na ũthũkyo kwa Ngai na kwa andũ mĩthenya yonthe. 17#Alo 15.25,26; Aka 2.10.Na ĩtina wa myaka ĩmwe nĩnookie kũetee mbaĩ yakwa ũtethyo na nthembo: 18#Meko 21.27.na ngĩka ũu mambonie nĩ mũthesye ĩkalũnĩ, nde na nguthu, kana kĩthokoan’yo: ĩndĩ kwaĩ Ayuti amwe maumie Asia— 19nao nĩmaĩlwe nĩ kwĩthĩwa vaa mbee waku, na kũmbinganĩsya, ethĩwa me na ũndũ ĩũlũ wakwa. 20Kana andũ aa ene nĩmaneene ũndũ ũtaĩle wakwa ũla moonie yĩla naũngamie mbee wa nzama, 21#Meko 23.6.ate o kwondũ wa wasya ũmwe, ũla naneenie nĩũngeme katĩ wamo, ngyasya, Kwondũ wa kũthayũũkw’a kwa akw’ũ nĩngũsilĩlwa ũmũnthĩ mbee wenyu.
Velike aitĩsya sila
22 #
Meko 23.26. Ĩndĩ Velike, nĩkwĩthĩwa nĩwesĩ nesa ũndũ wa ĩla Nzĩa, amatĩsya, aiasya, O yĩla Lisiasi ũla mũnene wa asikalĩ ngili wĩtheea, ngatw’a ũndũ wenyu. 23#Meko 27.3.Nake eeaia ũla mũnene wa asikalĩ ĩana kana Vaulo asũvĩwe, ĩndĩ nĩethĩwe na ũthei; na anyanyae make maikavatwe kũmũtethya.
24Ĩndĩ ĩtina wa mĩthenya ĩmwe, Velike ooka na mũka wake Ndilusila, nake aĩ Mũyutĩ, na amũtũmana Vaulo, na amwĩthukĩĩsya ũvoonĩ wa mũĩkĩĩo ũla wĩ nthĩnĩ wa Klĩsto Yesũ. 25Na akĩneena ũndũ wa ũlũngalu, na wĩting’o, na ũsilĩlo ũla ũkoka, Velike akwatwa nĩ w’ĩa, na amũsũngĩa, Enda yu; na yĩla nĩona ũthei, ngakwĩta ũke kwakwa. 26Nake vamwe na ũu, aĩ na wĩkwatyo wa ũnengwa mbesa nĩ Vaulo: na kwondũ wa ũu amwĩtangaa kaingĩ, na ũneena nake. 27#Meko 25.9.Ĩndĩ myaka ĩlĩ yathela. Velike alivũlwa nĩ Volikio Vesito; na akyenda kwendeesya Ayuti, amũeka Vaulo e o mwove.
Currently Selected:
MEKO MA ATŨMWA 24: Mbivlia
Highlight
Copy
Compare
Share
Want to have your highlights saved across all your devices? Sign up or sign in
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
