MEKO MA ATŨMWA 10
10
Vetelo na Kolinelio
1 #
Mt 8.5; Meko 27.1. Na kwaĩ mũndũ ũmwe Kaisalea, wetawa Kolinelio, mũnene wa nguthu ya asikalĩ ĩana yetawa nguthu ya Italia, 2mũthaithi mũnene, wakĩaa Ngai vamwe na nyũmba yake yonthe, nake nĩwanengae andũ motethyo maingĩ, na amũvoyaa Ngai mĩthenya yonthe. 3#Meko 3.1.Ũsu nĩwonie woninĩ ki, mũthenya ta saa kenda, mũlaĩka wa Ngai akyũka vala ũĩ, na aneena, Kolinelio. 4Nake, akĩmũketeea, e na w’ĩa, asya, Nĩ kyaũ, Mwĩaĩi? Nake amwĩa, Mboya syaku na motethyo maku nĩmavikĩte ĩũlũ, matw’ĩkĩte ũlilikan’yo kwa Ngai. 5Na yu tũma andũ mathi Yova, malatye mũndũ wĩtawa Simoni, ũla wĩ na syĩtwa ya kelĩ, Vetelo: 6#Meko 9.43.nake nĩ mũeni kwa mũndũ wĩtawa Simoni, mũseũvya wa ithuma, nyũmba yake ĩ ũtee wa ũkanga. 7Na ũla mũlaĩka ũnũũneenaa nake athi, Kolinelio ameta athũkũmi elĩ ma nyũmba, na mũsikalĩ ũmwe ũkĩaa Ngai wa ala mamũthũkũmaa mĩthenya yonthe; 8na amatavya maũndũ onthe, amatũma mathi Yova.
9Na ũnĩ ũsu, maendete, makĩthengeea ndũa, Vetelo ambata nyũmbanĩ ĩũlũ avoye, syũa yĩkĩũngama: 10na eew’a nzaa, na enda ũya: ĩndĩ maiseũvya lĩu, akwatwa nĩ too ũilyĩ ta kĩkw’ũ; 11#Meko 11.5–17.na oona ĩtu yĩkĩvingũka, na kĩndũ kĩitheea ta ngũa nene, ĩkĩtheew’a nthĩ na mĩthya ĩna yayo: 12nayo nthĩnĩ wayo vaĩ nyamũ syĩ maũũ ana sya mĩthemba yonthe, na tũsamũ twa nthĩ tũla tũtambũkaa, na syĩndũ ila iũlũkaa yayayanĩ. 13Na kwooka wasya vala ũĩ, ũkyasya, Ũkĩla, Vetelo; wũae, ũye. 14#Esek 4.14; Ali 11.1–47.Ĩndĩ Vetelo asya, Aiee, Mwĩaĩi; ndyaamba ũya kĩndũ o na kĩva kĩvuku kana kĩte kĩtheu. 15#Mt 15.11; Mko 7.15,19.Na wasya wooka vala ũĩ ĩngĩ ya kelĩ ũkyasya, Ila itheetw’e nĩ Ngai ndũkaitw’e mbuku. 16Na ũndũ ũsu weekwa katatũ: na oyu kĩla kĩndũ kyambatw’a ĩtunĩ.
17Na Vetelo aisũanĩwa mũno nthĩnĩ wake ũndũ ũilyĩ woni ũsu ũla wonie, sisya, andũ ala manatũmiwe nĩ Kolinelio, makũlilye nyũmba ya Simoni, maũngama mbingĩlonĩ, 18na meetana makũlya ethĩwa Simoni, ũla wĩ na syĩtwa ya kelĩ, Vetelo, ekalĩte vo. 19#Meko 13.2; 15.28.Na Vetelo aisũanĩa ũndũ wa woni, Veva amwĩa, Sisya, ve andũ atatũ meũkũmantha. 20Ĩndĩ ũkĩla, ũtheee ũendan’ye nao ũte na nzika: nũndũ ninyie nĩmatũmĩte. 21Na Vetelo atheea vala ve ala andũ, na amea, Sisya, ninyie ũla mũũmantha: mwooka nũndũ wa kĩ? 22Nao mamwĩa, Kolinelio mũnene wa asikalĩ ĩana, mũndũ mũlũngalu na ũkĩaa Ngaĩ, ũla wĩ na nguma nzeo kwa mbaĩ yonthe ya Ayuti, oniw’e nĩ mũlaĩka mũtheu akũtũmane ũthi nyũmba kwake nĩ kana ethukĩĩsye ndeto syaku. 23#Meko 11.12.Na ĩndĩ amea malike nyũmba na amon’ya mokomo.
Na ũnĩ ũsu ookĩla na aendan’ya nao, na ana‐a‐ĩthe amwe ma ndũa ya Yova mathi nake. 24Na ũnĩ ũsu malika Kaisalea. Na Kolinelio nĩwameteele, ombanĩtye andũ ma mũvĩa wake na anyanyae anene. 25Na Vetelo ailika, Kolinelio amũthaũa, na avalũka maũũnĩ make, amũthaitha. 26#Meko 14.15; Ũvu 19.10.Ĩndĩ Vetelo amũkĩlya, akyasya, Ũngama; nyie nakwa nĩ mũndũ. 27Na akĩneena nake, avota, na eethĩa andũ aingĩ mombene: 28na amea, Inyw’ĩ ene nĩmwisĩ kana nĩ ũndũ ũvatanĩtwe nĩ mĩao mũndũ Mũyuti kwĩvulan’ya, kana kũlika kwa mũndũ wa mbaĩ ĩngĩ; ĩndĩ Ngai nũmbonetye ndikete mũndũ o na wĩva mũvuku kana ũte mũtheu: 29kwondũ wa ũu nĩnooka vate ngananĩo, natũmanwa. Kwondũ wa ũu nĩmũkũlya indĩ ũndũ ũla mũnandũmanĩe. 30Na Kolinelio amũsũngĩa, Yu nĩ mĩthenya ĩna ĩnathela, kũvika saa ũũ, naĩ nyũmbanĩ yakwa ngĩvoya Ngai saa kenda; na sisya, mũndũ aũngama mbee wakwa evw’ikĩte ngũa ndisu, 31nake asya, Kolinelio, kũvoya kwaku nĩkwĩw’ĩkĩte, na motethyo maku nĩmalilikenwe kwa Ngai. 32Tũmana ĩndĩ Yova ũmwĩte Simoni, ũla wĩ na syĩtwa ya kelĩ, Vetelo, oke kwaku; athokete nyũmbanĩ ya Simoni, mũseũvya wa ithuma, nayo ĩ ũtee wa ũkanga. 33Na ĩndĩ o kavinda kau nĩnakũtũmana; naku weka nesa wooka. Na ĩndĩ yu twĩ vaa ithyonthe mbee wa Ngai, nĩ kana twĩw’e maũndũ onthe ala weeaĩwe nĩ Mwĩaĩi.
Ũtavan’yo wa Vetelo
34 #
Kũt 10.17; 1 Sam 16.7; Alo 2.11. Na Vetelo aathamya kanyw’a wake, asya,
Nĩ w’o, nĩngũmanya kana Ngai ti mwendeesya wa andũ; 35#Yoa 9.31; 10.16.ĩndĩ mbaĩnĩ syonthe ũla ũmũkĩaa we, na kwĩka ũlũngalu, nĩwĩtĩkĩlawa nĩwe. 36#Sav 107.20; 147.18; Isa 52.7; Nau 1.15; Mt 28.18.Ndeto ila watwaĩe ana ma Isilaeli, aitavan’ya ũla ũvoo mũseo wa mũuo kwondũ wa Yesũ Klĩsto (we nĩ Mwĩaĩi wa onthe)— 37#Mt 4.12–17.ndeto isu inyw’i nenyu nĩmwĩsĩ, ĩla yatavaniw’e nthĩ yonthe ya Yutia, ĩkyambĩlĩlw’a Kalilii, ĩtina wa ũvatisi ũla watavaniw’e nĩ Yoana; 38#Isa 61.1; Mt 3.16.ũvoo wa Yesũ wa Nasaleti, o ũndũ Ngai wamwĩtĩkĩsye Veva Mũtheu, o na vinya: ũla waendaa aiĩka nesa, na aimavosya onthe ala manyamaaw’a nĩ ndevili; nĩkwĩthĩwa Ngai aĩ vamwe nake. 39#Kũt 21.22.Na ithyĩ twĩ ngũsĩ sya maũndũ asu onthe ala wekie nthĩ ya Ayuti, na Yelusaleme nayo; nake nĩmamũaie makĩmwamba mũtĩnĩ. 40#1 Ako 15.4–7.Mũndũ ũsu Ngai nĩwamũthayũũkisye mũthenya wa katatũ na amumĩlya onanw’e, 41#Yoa 14.19,22; 15.27; Meko 1.4.ti kwa andũ onthe, indĩ kwa ngũsĩ ila Ngai wambie ũnyuva, nasyo nĩ ithyĩ, ala twaĩe na kũnyw’a vamwe nake ĩtina wa kũthayũũka kwake kuma kwa akw’ũ. 42#Meko 17.31; Alo 14.9,10; 1 Vet 4.5; 2 Tim 4.1.Nake atwĩaĩe tũtavan’ye kwa andũ, na kũneena ũkũsĩ kana ũsu nĩwe wiĩtwe nĩ Ngai ethĩwe Mũsili wa ala me thayũ na wa ala akw’ũ. 43#Isa 33.24; 53.5,6; Yel 31.34; Esek 34.16; Nda 9.24.Athani onthe nĩmeũmũkũsĩĩa kana kwondũ wa syitwa yake kĩla mũndũ ũmwĩtĩkĩlaa akoosa ũekeo wa naĩ.
Andũ‐ma‐mbaĩ‐ingĩ mayosa Veva Mũtheu na kũvatiswa
44Na Vetelo aineena ndeto isu, Veva Mũtheu amatheeea onthe ala methukĩĩsye ĩla ndeto. 45Na ala ma nzaĩko metĩkĩlĩte, ala mookanĩtye na Vetelo, maseng’a nũndũ mũthĩnzĩo wa Veva Mũtheu watulũĩlwe Andũ‐ma‐mbaĩ‐ĩngĩ nao. 46#Meko 2.4; 19.6; Mko 16.17.Nũndũ nĩmeewie maineena na ithyomo, na kũmũtaĩa Ngai. Na ĩndĩ Vetelo asũngĩa, 47Ve mũndũ ũtonya kũmavata aa manzĩ, maikavatiswe, ala mosete Veva Mũtheu o taitũ? 48#Yoa 4.40.Na atw’a mavatiswe syĩtwanĩ ya Yesũ Klĩsto. Na ĩndĩ mamwĩsũva ekale nao mĩthenya ĩmwe.
Currently Selected:
MEKO MA ATŨMWA 10: Mbivlia
Highlight
Copy
Compare
Share
Want to have your highlights saved across all your devices? Sign up or sign in
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
