2 AKOLINTHO 8
8
Ũelo kwondũ wa etĩkĩli ngya ma Yelusaleme
1 #
Alo 15.26. O na ĩngĩ, ana‐a‐asa, twĩmũtavya mumo wa Ngai ũla ũnenganĩtwe makanisanĩ ma Masetonia; 2ũndũ wa kũtatwa na monyamao maingĩ, wingĩ wa ũtanu woo na ũkya woo mũnene waingĩvie mũno kũvika ũthwii wa ũlau woo. 3Nũndũ nĩngũmakũsĩĩa, kana kwĩanana na ũndũ maĩ matonya, ĩĩ, na mbee wa kũtonya kwoo, nĩmanenganie na kwenda kwa ngoo syoo ene, 4#2 Ako 9.1; Meko 11.29.makĩtũthing’ĩĩsya vamwe na kũtwĩsũva mũno ũndũ wa mumo ũũ na mũamba wa ũthũkũmi ũũ kwa atheu: 5na ti tondũ twaasya, ĩndĩ mbee nĩmeenenganie ene kwa Mwĩaĩi, na kwitũ, o tondũ Ngai wendete. 6Kwa ũu twamũtaie Tito, kana o ũndũ wambĩlĩlye mbee, o ta ũu eanĩsye nthĩnĩ wenyu mumo ũũ naw’o. 7#1 Ako 1.5; 16.1,2.Ĩndĩ o tondũ mwingĩvĩwe mũno maũndũnĩ onthe, mũĩkĩĩonĩ, na kũneenanĩ, na ũmanyinĩ, na kĩthing’ĩĩsyonĩ kyonthe, na wendonĩ wenyu kwa ithyĩ, sisyai kana mwingĩvĩwe mumonĩ ũũ naw’o.
Ngelekan’yo ya Yesũ
8Ndiũneena na kwĩaa, ĩndĩ nĩngũtata w’o wa wendo wenyu kwa kĩthing’ĩĩsyo kya angĩ. 9#Mt 8.20.Nũndũ nĩmũũmanya mumo wa Mwĩaĩi waitũ Yesũ Klĩsto, kana, o na kau aĩ mũthwii, atw’ĩka ngya kwondũ wenyu, nĩ kana inyw’ĩ kwondũ wa ũkya wake mũtonye ũtw’ĩka athwii. 10Na ũndũnĩ ũu nĩmũtavya ũndũ ngwona: nũndũ ũũ nũmwaĩle inyw’ĩ, ala mwambĩlĩlye mbee, yu mũminĩte mwaka, na ti kwĩka kw’oka, ĩndĩ nĩ kwĩka na kwenda nakw’o. 11Ĩndĩ yu ĩanĩsyai kwĩka nakw’o; nĩ kana ũndũ mweeyũmbanĩtye kwenda, o ta ũu mwĩanĩsye kwĩka kwĩanana na ũndũ mũtonya. 12#Nth 3.27,28; Mko 12.43.Nũndũ kweethĩwa kwĩ ngoo ĩyũmbanĩtye, nĩkwĩtĩkĩlawa kwĩanana na kĩla mũndũ wĩ nakyo, ti kwĩanana na kĩla mũndũ ũte nakyo. 13Nũndũ ndikwasya ũu kana angĩ mathũmũe na inyw’ĩ mũthĩne: 14#2 Ako 9.12.ĩndĩ nĩkwĩthĩwe kwĩanan’ya: ĩvinda yĩĩ kusũa kwenyu kũtethye kũnyivĩwa kwoo, nĩ kana kusũa kwoo kũtethye kũnyivĩwa kwenyu: nĩ kana mwĩanan’ye: 15#Kuma 16.18.o ũndũ kũandĩkĩtwe, Ũla wombanisye mwingĩ ndaatialya; na ũla wombanisye mũnini ndaanyivĩwa.
Ũtũme na ũthũkũmi wa Tito na angĩ
16Ĩndĩ Ngai nataĩwe, ũla wĩkĩaa kĩthing’iĩsyo kyu kwondũ wenyu ngoonĩ ya Tito. 17Nũndũ nĩwosie ũtao witũ; ĩndĩ nĩkwĩthĩwa we mwene aĩ na kĩthing’ĩĩsyo kingĩ mũno, ooka kwenyu kwa kwenda kwake mwene. 18Naitũ tũmũtũmanĩsye na mwana‐a‐asa ũsu, ũla nguma yake ũvoonĩ mũseo ĩnyaĩĩkĩte makanisanĩ onthe 19#Aka 2.10.o na ti ũu w’oka, ĩndĩ anyuvĩtwe nĩ makanisa asu athi vamwe naitũ ũthũkũminĩ wa moelo nĩ kana Mwĩaĩi ataĩwe, na kwonan’ya kwĩyũmban’ya kwitũ; 20tũkĩsũvĩa, mũndũ o na wĩva ndakatwilĩĩle mavĩtyo ũlaunĩ ũũ ũthũkũmawa nĩ ithyĩ: 21#Nth 3.4.nũndũ twĩsũanĩa maũndũ ala maĩlu, ti mbee wa Ngai weka, ĩndĩ o na mbee wa andũ. 22Naitũ tũmũtũmĩte mwana‐a‐asa waitũ vamwe nao, ũla tũmwonete kaingĩ e kĩthing’ĩĩsyo maũndũni maingĩ, ĩndĩ yu e kĩthing’ĩĩsyo mũno mbee, nũndũ wa kũĩkĩĩa kũnene kũla ũmũĩkĩĩe inyw’ĩ. 23#2 Ako 7.13; 12.18; Alo 16.7.Na ethĩwa mũndũ nũnũũkũlya ũndũ wa Tito, we e mũamba nakwa na nĩ mũtethya wa wĩa vamwe nakwa kwondũ wenyu; na ethĩwa mũndũ nũnũũkũlya ũndũ wa ana‐a‐asa maitũ, nao nĩ atũmwa ma makanisa, na nĩmo matumaa Klĩsto ataĩwa. 24#2 Ako 7.14.Kwondũ wa ũu monesyei mbee wa makanisa w’o wa wendo wenyu na wa kwĩkathĩĩa kwitũ kwondũ wenyu.
Currently Selected:
2 AKOLINTHO 8: Mbivlia
Highlight
Copy
Compare
Share
Want to have your highlights saved across all your devices? Sign up or sign in
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
