ABARUMI 14

Oboremereria ase abanto batari abaikeranu

1Moroisie ere oyotari na nguru ase okwegena, motari koamererania. 2Omonto oyomo bwegenete ng’a nanyare koria bionsi, korende ere oyotari na nguru nigo akoria chinyeni. 3Oyokoria tachaya oria otari koria, na oria otari koria tagambia oria okoria, ekiagera Nyasae omwancheire. 4Aye naye ng’o okogambia omosomba bw’omonto onde? Ase omonene oye omonyene nigo ateneine gose nigo akogwa. Ee, natenene, ekiagera Omonene nere ore nokobua gw’okomotenenia.

5Omonto oyomo narengereretie ng’a rituko erimo nerinene kobua erinde, na oyonde arora ng’a amatuko onsi nigo areng’aine. Tiga kera omonto aisaneke ase aya amanyete omonyene. 6Ere oyokorenda rituko, nigo akorirenda ase Omonene, na ere oyokoria, nigo akoria ase Omonene, ekiagera nigo agoakera Nyasae ng’a mbuya mono; ere oyotari koria, nigo agokora bo ase Omonene, na aakera Nyasae ng’a mbuya mono. 7Ekiagera onde tari ase egati yaito ore moyo ase engencho yaye omonyene; na onde tari ogokwa ase engencho yaye omonyene. 8Naki onye tore moyo, nigo tore moyo ase Omonene; gose gatorakwe, nigo torakwe ase Omonene. Naboigo, onye tore moyo, gose gatorakwe, nigo tore ab’Omonene. 9Naki Kristo nigo akwete, naende akaba moyo, erinde abe Omonene ase abare moyo na ase abakure boigo.

10Korende aye, nase ki okogambia oyomino? Gose aye, nase ki ogochaya oyomino? Naki intwe twensi natoche gotenena bosio bw’ekerogo gi’ekina kia Nyasae. 11Naki nerikire,

“Omonene otebire: Amaene buna inde moyo,

kera riru naribekwe inse ase obosio bwane,

na kera oromeme naromobere Nyasae kirori.”

12Ase igo, kera omonto ore ase egati yaito nache gwekwanera ere omonyene ase obosio bwa Nyasae.

13Ase ayio, titoba nkona‐kogambania tore, korende anga mbuya kobua togambe ng’a onde tabekera oyomwabo egento gekomogocha gose gekomotanga. 14Namanyire, naende naenekirie ase Omonene Yeso, ng’a gento kende tikeri ekebe ekenyene, korende nigo kere ekebe ase oyo okeroche ng’a negento ekebe. 15Onye oyomino okoba nogwechanda ase engencho y’endagera okoria aye, gwatigire gotaara ase obwanchani. Ase engencho y’endagera yao tosaria omonto oria, ere Kristo akwete ase engencho yaye. 16Timotiga ayare amaya asemore atorwe ng’a namabe. 17Naki oboruoti bwa Nyasae tari okoria na okonywa, korende oboronge, na omorembe, na omogoko bikorwa ase Omoika Omochenu. 18Ere oyogokorera Kristo ase amang’ana aya onsi nigo akogwenera Nyasae, naende nigo agwancherwa na mwanyabanto. 19Ase igo, tiga torigie chingencho chi’omorembe ne chingencho chigwenerete ase okoagachana. 20Ase engencho y’endagera tosaria emeremo ya Nyasae. Bionsi nebichenu; korende mbobe omonto oragere abande bagochwe ase engencho y’ebiakoria. 21Mbuya gotaria enyama, nonya nkonywa edivai, gose gokora gento kende gionsi keragoche oyomino. 22Okwegena okwo ore nakwo, obe nakorokwo ase egati yao na Nyasae. Nasesenirie omonto oria otenachereti ekina ase ring’ana riria anchete. 23Korende oyore ne chitang’u‐tang’u onye okoria, onacheirwe ekina, ekiagera tarieti ase okwegena; na ogokora konde gwonsi gotarueti ase okwegena nebibe.

Currently Selected:

ABARUMI 14: EKEGUSIIBBLE

Highlight

Copy