ZABURI 40
40
Ogotera gw’okomotogia Nyasae
(Ogotera gwa Daudi)
1Nkaba imoganyete Omonene ase okoremereria,
na ere akanyeonchorera akaigwa ekerero kiane.
2Ere akandusia korwa ase engoro y’obosareku,
korwa ase etintira na esike;
agatenenia amagoro aane ase egetare igoro,
agankong’ia ase ngoeta.
3Akanyorokereria gotera ogotera okoyia,
ogotera gw’okomotogia Nyasae oito.
Abange nabayarore na koiroka,
na igo mbamosemerie Omonene.
4Nasesenirie omonto oria omosemeretie Omonene,
otari kweonchora gochia ase abanto abaenenu,
gose ase abwo bagosira ase okoonchokera chinyasae chi’oborimo.
5Aye Omonene, Nyasae one,
ogokora kwao na ebirengererio biao asetore nebi’ogokumia;
onde tari orareng’anigwe naye.
Ninganetie koraria ayio na koyakwana,
korende namange mono, takobareka.
6Ebing’wanso na ebiruegwa tobiganeti,
korende amato aane kwayatinoire.
Ebing’wanso bi’ogosambwa, na ebi’ebibe tobiganeti.
7Erio ngateba, “Rigereria, nachire;
ase ebuku nigo erikire aya ngwenrete gokora.
8Aye Nyasae one, ninganetie nkore ogwancha kwao,
amachiko ao nigo are ase enkoro yane ime.”
9Ase omosangererekano omonene narandirie amang’ana amaya ay’oboronge;
aye Omonene, nomanyete ng’a tingotanga ebikoba biane tibiyakwana.
10Tinyegachereti inche bweka oboronge bwao ase enkoro yane ime;
korende nararirie obwegenwa bwao, na ogotooreka kwao.
Timbiseti obuya bwao, na obwegenwa bwao,
korwa ase omosangererekano omonene.
11Aye Omonene, tondina amabera ao!
Obuya na obwegenwa bwao bindende botambe.
Ogosaba gw’okonyora ogokonyeka
(Zab 70)
12Amabe amange atari kobareka nigo ang’etanaine.
Ebibe biane biambuire, goika tinkonyara korora;
biabeire ebinge kobua etukia y’omotwe one, goika nerusirie moyo.
13Omonene, koranche ontoorie!
Omonene, oche bwango onkonye!
14Abwo bonsi barigetie kong’ita,
tiga basookigwe na batantanigwe bonsi amo,
na abwo baganetie obobe banyore,
tiga bairanigwe nyuma barore obosooku.
15Abwo bagonsiereria bagoteba, “Kiamonyorire!”
Tiga bakirigwe‐kiri ase obosooku bwabo.
16Korende abwo bonsi bagokorigia,
tiga bakogokere na kogochengera;
abwo banchete ogotooreka kwao batebe botambe,
“Omonene nigo are omonene!”
17Inche nigo inde omotaka na omoremerwa,
korende Omonene nigo akonyechandera.
Naye ore ogokonywa kwane, na ogotooreka kwane.
Aye Nyasae one, totebana!
Currently Selected:
ZABURI 40: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
