NAHUMU 3
3
1Obobe nobwaye omochie oyio oiteire amanyinga amange, oyio oichire noborimo na obouri, oyio otari gotiga gosakora na koira! 2Igwa eriogi ri’emecharichi egoaka, na ogochura kw’amagoro e chigari, na ogw’okominyoka gwe chibarasi, na okorunda kw’amagoro e chigari.
3Abariini be chibarasi nigo bakominyoka gochia bosio;
emioro nigo ekomesigwa, na amatimo akobarigwa.
Emeganda y’abanto yaitirwe,
ebitondo nigo birorekanete aande onsi.
Emebere y’abanto bakwete tekobareka,
nigo ekogocha abanto aande onsi.
4Ayio onsi nigo achete ase engencho y’obonyaka obonge bw’omochie oyo.
Oyio orenge omotayayi omonyakieni bwenaretie oborogi;
nigo asiretie abanto b’ebisaku nobonyaka bwaye,
ne chiamate chinyinge noborogi bwaye.
5Omonene bw’Emeganda nigo agoteba iga:
“Rora, nigo inde mamincha yao,
ningwasiorie chianga chiao,
na abanto b’ebisaku barore obogetirianga bwao,
na amaruoti arore obosooku bwao.
6“Ningosiarere eubi y’okogechia, ningotige ochaywe,
nobe gokorigererigwa na gosekererigwa.
7Kera omonto orabe ogokorora nigo
aregose atenenere aare, atebe:
Nineva otigirwe bosa,
ning’o orayororere amabeebe?
Ng’ai toranyore oyokoyoremia?”
8Aye Nineva, Inee, nomuya ore kobua Tebesi, omochie ore ase orooche rwa Naili oetananire namache? Enyancha nero yarenge egekengero kiaye, na amache naro arenge orwaki rwaye. 9Abaetiopia na Abamisiri batarenge korengeka nabwo barenge chinguru chiaye; Abaputi na Abalibia nabwo barenge koyokonya. 10Korende nonya naboigo, abanto b’omochie oyio nigo bairetwe ase obosomba. Abana baye nigo basenyenteretwe agwo ase amatabekania e chinchera chionsi. Abanto baye abasike nigo baakeretwe obomera, na abanto baye abanene bagasibwa nebinyuri.
11Naye boigo notinde bwerusie moyo. Aye boigo norigie aase okwebisa korwa ase ababisa bao. 12Chiburi chiao chionsi nigo chinga buna emeko ere nokwama kwe ritang’ani. Ekero egotengechigwa, amako abo nigo akoaroroka, agwa ase emenwa y’abanto baria bakoyaria. 13Rora, abarwani bao b’esegi nigo banga abakungu, na ebiita bi’ense yao nigo biigoire biasie ase ababisa bao. Omorero osambire emekorogoto y’ebiita biao. 14Buucha amache oyagache, ekiagera noche koboerwa, okong’ie chiburi chiao. Soa ase engoro, otiringe esike, bwebeke ang’e obombe amatabori. 15Aroro agwo omorero nogosambe, na omoro nogoite okorie buna chingeeti chikoria.
Aye menteka obuche buna chingeeti, na buna chingige. 16Nigo kwamentete abaonchoreria bao bakaba abange goetania ching’enang’eni chia igoro, bakaba buna ebisase bie chingige, bakaria ense bakairuruka, bakagenda. 17Abagambi bao nigo banga buna chingige, na abaraai bao nigo banga buna amasendo e chingige chigosoa ase chimbago ime ekero ki’obokendu; ekero omobaso obarire chiairuruka chiagenda, onde takomanya ase chiagenda.
18Aye omoruoti bw’Abaasuri, abarisia bao nigo baraire, na abanto bao abasike nigo basundogete. Abanto bao baserebanigwe ase ebitunwa igoro; na onde tari okobasangereria. 19Okogwenigwa tikori ase ogoakwa kwao, eriote riao riabeire riibe, tirikogwena. Abanto bonsi abaraigwe aya akonyorire nigo baraake chinkobi ase engencho y’okogwa kwao. Inee! Onde nare otanyoretwe nobobe bwao bwa botambe?
Currently Selected:
NAHUMU 3: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
