MATAYO 15

Yeso okoiraneria abwo bare koengereria ekiagera aborokigwa baye tibabwateti chingencho chi’abagaaka

(Mar 7:1–23)

1Ekero ekio Abafarisai na aborokia b’amariko bakarwa Yerusalemu, bagachiera Yeso, bakamoboria, 2“Nase ki aborokigwa bao bagosaria chingencho chi’abagaaka? Naki kobakoragera tibari goisaba amaboko abo.” 3Akabairaneria, “Nase ki inwe mogosaria ogochika kwa Nyasae ase chingencho chiaino? 4Naki Nyasae nigo achigete, agateba: Sika iso na nyoko, na: Oyorakwane bobe ase ise, gose ase ng’ina, ogokwa nakwe. 5Korende inwe moteba: Oyoratebie ise gose ng’ina: Bionsi ebi anga kwanyora korwa asende biaeirwe Nyasae, ere temogwenereti gosika ise. 6Ase chingencho chiaino chia kare nigo mogosaria ring’ana ria Nyasae. 7Inwe abang’ainereria! Mbuya Isaya abanete igoro asemore, ekero atebete:

8“Abanto aba nigo bansigete ase ebikoba biabo igoro,

korende chinkoro chiabo nigo chire aare korwa asende.

9Abwo nigo bagonsasima ogosasima kwa bosa

kobakworokereria amorokererio ayare amachiko a mwanyabanto

oka.”

10Akarangeria abanto bache asare, akabatebia, “Igwa na manya: 11Tari ekio kegosoa omonwa gekobekera omonto ogotacheneka, korende egekorwa ase omonwa nakio ekio gekobekera omonto ogotacheneka.” 12Ekero ekio aborokigwa baye bagacha, bakamoboria, “Inee! Kwamanyire ng’a Abafarisai, ekero baigwete ring’ana riria, mbagechetigwe?” 13Akairaneria, “Kera ekemeri getasimekiri na Tata one ore igoro ngesimorwe. 14Batige; barabwo nabaraai emeuko. Omouko oise koraa omouko onde, nigo baragwe ase engoro bonsi babere.” 15Korende Petero akamotebia, “Totebererie omoreng’anio oyio.” 16Akabora, “Inee! Nonya mbono nainwe timori nobong’aini? 17Timomanyeti ng’a kende gionsi kegosoa ase omonwa nigo kegoeta enda, kiagwa kebara? 18Korende ebikorwa ase omonwa nigo bikorwa ase enkoro; nabio bikobekera omonto ogotacheneka. 19Naki ase enkoro nao bikorwa ebirengerio ebibe, oboiti, obotomani, obonyaka, oboibi, amang’ana ’oborimo, na okorama. 20Ayio naro akobekera omonto ogotacheneka korende okoria namaboko ataisabiri tikori kobekera omonto ogotacheneka.”

Okogwenigwa kw’omoiseke bw’abanto b’Ebisaku

(Mar 7:24–30)

21Yeso akarua aroro, akagenda chinsemo chia Turo na Sidoni. 22Na rora, omokungu o Kanani korwa ase ensemo eria akaoroka, agakaa eriogi, akabora, “Omonene, omwana o Daudi, indorera amabera; enyaroka yane yachandirwe mono nekerecha.” 23Korende tamoiraneria ing’ana. Aborokigwa baye bagacha, bakamosorora, bakabora, “Mokanie, agende, ekiagera akona‐gototunyana ogotoakera eriogi.” 24Akairaneria, “Nigo natometwe ase ching’ondi chinsiru chi’enyomba ya Israeli chioka.” 25Korende omokungu oria akamochiera akamosasima, akabora, “Omonene, nkonya.” 26Akairaneria, “Tari buya kobogoria obokima bw’abana na koborutera chisese.” 27Akabora, “Ee, Omonene, korende nonya ne chisese nkoria chire amatori ayakogwa korwa ase chimesa chi’abanene babo.” 28Erio Yeso akamoiraneria, “Aye omong’ina, okwegena kwao nokonene! Tiga abe buna oganetie.” Na ekero ekio enyaroka yaye ekagwenigwa.

Abange bakogwenigwa

(Mar 7:31–37)

29Yeso akarua aroro akagenderera, agacha ensemo y’enyancha ya Galili, akariina ebitunwa igoro, agaikaransa aroro. 30Emeganda emenene ekamochiera, ekarenta amagata, na ebirema, na emeuko, na amamama, na abande abange, bakababeka ase amagoro a Yeso, na ere akabagwenia. 31Goika emeganda egakumia ekero bachia korora abarenge amamama bagokwana, abarenge ebirema babeire buya, abarenge amagata bakogenda, na abarenge emeuko bakorora; bakamobaka Nyasae bw’Abaisraeli.

Okoragerigwa kw’abanto chilifu inye

(Mar 8:1–10)

32Erio Yeso akarangeria aborokigwa baye bache asare, akabora, “Inche naroreire emeganda amabera, ekiagera babeire amo nainche amatuko atato, batari nendagera; na tindigeti kobatiga bagende nenchara, babaise kogoya inchera.” 33Aborokigwa baye bakamotebia, “Aa nerooro, ng’ai toranyore emegati emenge eraisane abanto abange buna aba baigote?” 34Yeso akababoria, “Emegati nerenga mobwate?” Bakamoiraneria, “Netano na ebere, ne chinswe chinsinini nke igo.” 35Agachika omoganda oikaranse inse. 36Akabogoria emegati eria etano na ebere, ne chinswe chiria. Ekero airaneirie ng’a mbuya mono, akabisamunyora, akaa aborokigwa, na barabwo bakayea emeganda eria. 37Bakaria bonsi, bakaigota; bagasangereria ebisamunye bi’emegati ebiatigarete, ebitonga bitano na bibere biichire. 38Na abwo bariete nigo barenge abasacha chilifu inye, otatiga abakungu na abana. 39Agatiga emeganda egende, akariina obwato ime, akagenda chinsemo chia Magadani.

Currently Selected:

MATAYO 15: EKEGUSIIBBLE

Highlight

Copy