ABALAWI 4
4
Ekeng’wanso ki’ebibe bia mosiabano
1Naende Omonene agakwana na Musa, akamotebia, 2“Kwana n’Abaisraeli, obatebie ng’a monto onde bwensi orakore ebibe mosiabano atancheti, ase amang’ana ande onsi inche Omonene nakanete ng’a takorwa, goika abe okobwatia amachiko aya:
3“Onye omokuani oyoakire amaguta ogokora ebibe, na igo arentere abanto bonsi okomocha, goika arue eeri ensae etari na kemocho ase omobere oye, ase engencho y’ebibe ebio akorire, ayerue asende ebe ekeng’wanso ki’ebibe biaye. 4Arente eeri eria ase obosio bwane agwo ase egesoero ki’Eema y’Omosangererekano. Erio goika abeke okoboko kwaye igoro ase omotwe bw’eeri eria, na ayenyenyere agwo ase obosio bwane. 5Omokuani oyoakire amaguta aimokie amanyinga make ay’eeri eria, ayarente ime ase Eema y’Omosangererekano. 6Naende atobeke ekiara kiaye ase amanyinga ayio, ayanyororokerie ara gatano na kabere bosio bw’etoto eyio enachete Obomenyo Obochenu, agwo ase obosio bwane. 7Nyuma y’ayio omokuani oria agindie amanyinga make ase emegwekano ye chingunchara ere ase chikoona chi’egesasimero ase ubani egosamberwa, kere ime ase Eema y’Omosangererekano, ase obosio bwane, na amanyinga ’eeri eria agotigara ayaumore inse agwo ase egesasimero gi’ekeng’wanso ki’ogosambwa kere ase egesoero ki’Eema y’Omosangererekano. 8Erio arusie ebitinya bionsi bi’eeri eria y’ekeng’wanso ki’ebibe, na ebitinya bitubete chinyama chi’enda, na ebitinya binde bionsi bire ase enda ime, 9amo ne chinyigo chionsi ibere, na ebitinya bichitubete bire ang’e nomogongo; na ebitinya bie riini abirusie amo ne chinyigo, 10koreng’ana buna akobirusia korwa ase eng’ombe eria ekonyenywa ebe ekeng’wanso ki’omorembe. Erio abisambere ase egesasimero gi’ekeng’wanso. 11Korende riiyo ri’eeri eyio amo ne chinyama chionsi, na omotwe, na ebirenge, na enda, na esike, 12ebinto ebio bionsi bi’eeri eyio abisokie isiko y’ebitwori, abiire gochia aase achenire, ase ribu rigotugutwa, abisambere ase omorero bwe chinko agwo igoro ase ribu.
13“Onye omoganda bwonsi bw’Abaisraeli okorire ebibe mosiabano otancheti, na amang’ana ayio abe abisekanire asebare, kerabe bakorire kende gionsi eki inche Omonene nakanete ng’a tigekorwa, na igo babeire nokomocha, 14agwo ekero ebibe biria birabe biamanyekanire, omosangererekano orue eeri ensae ebe ekeng’wanso ki’ebibe na koyerenta agwo bosio bw’Eema y’Omosangererekano. 15Agwo ase obosio bwane abagaaka b’omoganda oria goika babeke amaboko abo igoro ase omotwe bw’eeri eyio, na ero enyenyerwe agwo ase obosio bwane. 16Omokuani oyio oakire amaguta, aire amanyinga make ay’eeri eyio ase Eema y’Omosangererekano ime. 17Erio atobeke ekiara kiaye ime ase amanyinga na anyororokererie ara gatano na kabere ase obosio bwane agwo bosio bw’etoto eria y’egetambaa, 18agindie amanyinga make ase emegwekano ye chingunchara chi’egesasimero kere ime y’Eema y’Omosangererekano, agwo ase obosio bwane, korende amanyinga onsi aya agotigara ayaumore agwo inse ase egesasimero gi’ekeng’wanso ki’ogosamba kere ase egesoero ki’Eema y’Omosangererekano. 19Naende ebitinya bionsi bi’eeri eyio abirusie na kobisambera ase egesasimero. 20Naboigo arakore eeri eyio buna akorete eeri eria ye ritang’ani y’ekeng’wanso ki’ebibe. Ase enchera eyio omokuani akore okobwatanigwa asebare, na barabwo nabaaberwe. 21Erio aire eeri eyio isiko y’egetwori, ayesambere aroro, buna asambete eeri eria ye ritang’ani. Ekio nekeng’wanso ki’ebibe ase engencho y’omoganda bwonsi.
22“Omogambi karakore ebibe mosiabano atancheti, na akore amang’ana ande onsi inche Omonene, Nyasae oye, nakanete ng’a takorwa, na igo obeire nokomocha, 23agwo ekero ebibe biria akorete birabe biamanyekanire asare, arente egoree etari na kemocho ase omobere oye, ebe ekeng’wanso kiaye. 24Ere goika abeke okoboko kwaye igoro ase omotwe bw’egoree eyio, ayenyenyere agwo aase abanto bakonyenyera ebing’wanso bi’ogosambwa, ase obosio bwane inche Omonene. Ekio nekeng’wanso ki’ebibe. 25Omokuani atobeke ekiara kiaye ime ase amanyinga ayagindie ase emegwekano ye chingunchara chi’egesasimero gi’ekeng’wanso ki’ogosambwa, korende amanyinga onsi agotigara ayaumore agwo inse ase egesasimero ekio. 26Ebitinya biaye bionsi abisambere ase egesasimero buna ebi’ekeng’wanso ki’omorembe bigosambwa. Ase enchera eyio omokuani akore okobwatanigwa ase omogambi oria ase engencho y’ebibe biaye, na omogambi oria naaberwe.
27“Onye omonto onde bwensi ogokora ebibe mosiabano atancheti, ase amang’ana ande onsi inche Omonene nakanete ng’a takorwa, na igo obeire nokomocha, 28agwo ekero ebibe bi’omonto oria birabe biamanyekanire asare arente embori eaberi etari na kemocho ase omobere oye, ebe ekeng’wanso ki’ebibe biaye. 29Erio abeke okoboko kwaye igoro ase omotwe bw’embori eria ekoruegwa ekeng’wanso ki’ebibe, na ayenyenyere agwo ase ebing’wanso bi’ogosambwa bikonyenyerwa. 30Omokuani aimokie amanyinga make, atobeke ekiara kiaye agindie emegwekano ye chingunchara chi’egesasimero ki’ogosambera ebing’wanso; amanyinga aya agotigara ayaumore agwo inse, ase egesasimero ekio. 31Erio arusie ebitinya bionsi bi’embori eyio buna ebitinya bi’eng’iti y’ekeng’wanso ki’omorembe bikorusigwa, na omokuani asambere ebitinya ebio ase egesasimero bibe rimisu rigiya rikongwenera. Ase enchera eyio omokuani akore okobwatanigwa ase omonto oria, na omonto oria naaberwe.
32“Omonto oria kararue emanwa y’eng’ondi ebe ekeng’wanso ki’ebibe, arente esigiti etari na kemocho ase omobere oye. 33Ere abeke okoboko kwaye igoro ase omotwe bw’emanwa eria, ayenyenyere agwo ase ebing’wanso bi’ogosambwa bikonyenyerwa, ebe ekeng’wanso ki’ebibe. 34Omokuani aimokie amanyinga make ay’emanwa eyio, atobeke ekiara kiaye agindie emegwekano ye chingunchara chi’egesasimero ki’ogosambera ebing’wanso, korende amanyinga ayagotigara ayaumore agwo inse, ase egesasimero ekio. 35Erio arusie ebitinya bionsi bi’eng’ondi eyio, buna ebitinya bi’emanwa y’eng’ondi y’ekeng’wanso ki’omorembe bikorusigwa, na omokuani abisambere ase egesasimero, igoro ase ekeng’wanso kegosamberwa nomorero asende. Ase enchera eyio omokuani nakore okobwatanigwa ase omonto oria ase engencho y’ebibe biaye, na omonto oria naaberwe.
Currently Selected:
ABALAWI 4: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
