EKERERO 4
4
Yerusalemu nyuma kogure
1Naki etahabu yasiririe obomeka‐meku bwaye!
Naki etahabu echenire yaonchokire!
Amagena ay’Aase Aachenu asiareirwe
ase amatabekania e chinchera chionsi.
2Abamura ba Sayoni abare nengencho enene,
abwo bareng’anirie ne chitahabu chingiya,
naki yabeire ng’a bareng’anigwe ne chinyongo chi’amaroba,
echire emeremo y’amaboko ’abakori chinyongo?
3Nonya ne chisese chi’orosana nkogonkia chire chimanwa chiabo,
korende abakungu b’omochie bw’abanto baane babeire abatindi,
buna chisagero chire ase erooro.
4Chimeme chi’abana bakogonka chiabwatanire namang’ang’ura ase engencho y’erang’o;
abana abake nigo bagosaba endagera,
korende monto onde tari okobaa.
5Abanto abwo barenge koria endagera engiya mono
bakwereire ase chinchera;
na abwo barenge kweboyia chianga chimonyinga,
nigo baraire ase chitui chie ribu.
6Aya nigo abanyorete,
ekiagera ebibe biakorire ase omochie bw’abanto baane nigo biarenge ebinene
kobua ebi’abanto ba Sodomu,
omochie oyio nigo oonchoranetwe ase etagika eyemo,
na okoboko kw’onde tikwayokunete.
7Abagambi baye nigo barenge komeka‐meka kobua amagena ’embura,
nigo barenge abarabu se kobua amabeere,
emebere yabo nigo yarenge emebariri kobua amagena amabariri,
na okororekana kwabo nigo kwarenge buna safiro, rigena rie rigori rinene.
8Bono amaiso abo abeire amamwamuti kobua embiro,
tibari komanywa agwo ase chinchera;
amasankwa ’emebere yabo abwatanire namauga abo,
omire pa buna amasabo amomo.
9Mbare negesio abwo bagokwa ase ogoitwa nemioro
kobua abwo enchara egoita,
ekiagera barabwo nigo bakogenderera korea na korea,
ase okoborwa gw’okwama kw’emegondo.
10Amaboko ’abakungu abare namayianda
aiyekire abana babo abanyene;
abwo nigo babete endagera yabo,
ekero omochie bw’abanto baane orenge gosirigwa.
11Omonene oumoire okogechigwa kwaye,
ee, oumoire endamwamu yaye entindi;
na ase Sayoni otongirie omorero,
osambire amaroso aye.
12Abaruoti b’ense, na abanto bonsi bamenyeteo,
tibegenete ng’a omochandi, gose omobisa onde bwensi,
nkonyara arenge gosoa ase ebiita bia Yerusalemu.
13Ayio nigo akoregete ase engencho
y’ebibe bi’ababani baye,
na ebi’abakuani baye,
abwo baiterete amanyinga ’abanyene oboronge,
agwo ase omochie ime.
14Barabwo bakaba bakoong’anya ase chinchera bare buna emeuko
bakaba bakwegindia amanyinga,
na onde tarenge gokuna chianga chiabo.
15Abanto bakagobera, bakabora, “Karue aa! Inwe timochenegeti!
Karue aa! Karue aa! Timokuna abanto!”
Ase ayio barabwo bagatama na koombogana.
Abanto b’ebisaku bakabakwana bakabora,
“Tibakogenderera komenya asetore.”
16Okobea kw’Omonene kwabasiareire,
takobechandera naende;
abakuani tibasigetwe,
na abagaaka tibaroreretwe amabera.
17Amaiso aito arosire ase okorigereria,
na okoganya bosa ng’a natokonywe;
korwa ase ebitengero biaito,
nigo twaganyete egesaku getanyare gototooria.
18Ababisa baito nigo batoboerete,
titwarenge konyara gotaara ase
chinchera chiaito.
Engaki yaito nigo ere ang’e koera; amatuko aito abarirwe;
ee, omoerio oito oikire.
19Abachandi baito nigo baare abaango kobua chinsoti chikoiruruka,
nigo batoseretie gochia ase ebitunwa igoro,
bagatoboera ase erooro
20Omoakwa amaguta bw’Omonene,
oyio orenge omoika bw’obogima bwaito,
akabwatwa ne chiirima chiabo,
oyio nere twatebete ng’a ase ekiriri kiaye
nao toramenye ase egati y’ebisaku.
21Inwe abanto ba Edomu, inwe abamomenyete ase ense ya Usi,
goka na gochenga!
Nonya nasemore egekombe nkebaikere,
monywe motinde goika motigare getirianda.
22Inwe abanto ba Sayoni,
egesusuro ki’ebibe biaino giaikeranigwe.
Omonene takogenderera gokoira ase obosomba;
korende inwe abanto ba Edomu,
Omonene nabae egesusuro ase engencho y’ebibe biaino,
ee, naorokie ebibe biaino maiso marore.
Currently Selected:
EKERERO 4: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
