YOSHUA 21
21
Emechie y’Abalawi
1Abateneneri be chiamate chi’Abalawi bagacha ase Eleazari, omokuani, na Yoshua, mosinto o Nuni, na ase abateneneri be chiamate chi’ebisaku bionsi bi’Abaisraeli, 2bagakwana nabarabwo agwo Silo, bakabatebia, “Omonene nigo achigete goetera ase Musa ng’a toegwe emechie ase tokomenya, amo namarisio, ase chitugo chiaito chirarisie.” 3Ase igo Abaisraeli bakaa Abalawi emechie gete amo namarisio arengeo korwa ase emiando yabo, koreng’ana buna Omonene achigete.
4Obomera bokagwera chiamate chi’Abakohati buna iga: Abalawi abarenge b’ororeria rwa Haroni, omokuani, bakanyora emechie ikomi na etato korwa ase egesaku kia Yuda, na egia Simeoni, na ekia Benjamin, buna obomera bwabagwerete. 5Na Abakohati abatigarete bakanyora emechie ikomi korwa ase chiamate chi’egesaku ki’Efraimu na ekia Dani, na ekeng’ese kia Manase, buna obomera bwabagwerete.
6Abagerisoni bakanyora emechie ikomi na etato korwa ase chiamate chi’egesaku gia Isakaru, na egi’Aseri, na ekia Nafutali, na ekeng’ese ki’egesaku kia Manase agwo Basani, buna obomera bwabagwerete.
7Abamerari bakanyora emechie ikomi na ebere ase chiamate chiabo korwa ase chiamate chi’egesaku kia Reuben, na ekia Gadi, na egia Sabuloni.
8Nabo Abaisraeli baete Abalawi emechie eyio amo namarisio arengeo, ase ogoaka obomera, buna Omonene konya achikire goetera ase Musa.
9Korwa ase egesaku kia Yuda, na egia Simeoni bakarua emechie eyio egwatorwa aiga. 10Obomera bwe ritang’ani bokagwera abanto b’ororeria rwa Haroni, eamate eyemo y’Abakohati, abarenge Abalawi. 11Barabwo bakaegwa Kiriati‐Ariba (noro Heburoni), ase ense y’ebitunwa ya Yuda, amo namarisio aetanaineo. (Ariba nigo arenge sokoro y’Anaki.) 12Korende emegondo amo nebichie bi’omochie oyio konya baeire Kalebu, mosinto o Yefune, bikaba omwando oye.
13Eye nero emechie abanto b’ororeria rwa Haroni omokuani baetwe: Heburoni, omochie oyio abaiti ba mosiabano baare gotamera, na Libuna, 14na Yatiri, na Esitemoa, 15na Holoni, na Debiri, 16na Aini, na Yuta, na Beti‐Semesi, emechie kianda, amo namarisio arengeo, korwa ase ebisaku ebio bibere. 17Korwa ase egesaku kia Benjamin bakaegwa Gibeoni, na Geba, 18na Anatoti, na Alamoni, emechie ene, amo namarisio arengeo. 19Emechie yonsi abanto b’ororeria rwa Haroni baetwe nigo yarenge ikomi na etato; bakayeegwa, amo namarisio arengeo.
20Abanto be chiamate chinde chi’Abakohati, abarenge Abalawi, bakaegwa emechie korwa ase egesaku gi’Efraimu, buna obomera bwabagwerete. 21Bakaegwa Sekemu, omochie oyomo abaiti ba mosiabano baare gotamera, ase ense y’ebitunwa y’Efraimu, na Geseri, 22na Kibusaimu, na Beti‐Horoni, emechie ene, amo namarisio arengeo. 23Na korwa ase egesaku kia Dani bakaegwa Eliteke, na Gibetoni, 24na Ayaloni, na Gati‐Rimoni, emechie ene, amo namarisio arengeo. 25Na korwa ase ekeng’ese ki’egesaku kia Manase bakaegwa Taanaki na Gati‐Rimoni, emechie ebere, amo namarisio arengeo. 26Abanto be chiamate echio chi’Abakohati nigo baetwe emechie eyio ikomi, amo namarisio arengeo.
27Abagerisoni, chiamate chinde chi’Abalawi, bakaegwa korwa ase ekeng’ese ki’egesaku kia Manase Golani o Basani, omochie abaiti ba mosiabano baare gotamera, na Besitera, emechie ebere, amo namarisio arengeo. 28Na korwa ase egesaku gia Isakaru bakaegwa Kisioni, na Daberati, 29na Yarimuti na Eni‐Ganimu, emechie ene, amo namarisio arengeo. 30Korwa ase egesaku gi’Aseri bakaegwa Misali, na Abidoni, 31na Helikati, na Rehobo, emechie ene, amo namarisio arengeo. 32Na korwa ase egesaku kia Nafutali bakaegwa Kedesi o Galili, omochie abaiti ba mosiabano baare gotamera, na Hamoti‐Dori, na Karitani, emechie etato, amo namarisio arengeo. 33Nabo abanto be chiamate chionsi chi’Abagerisoni baetwe emechie ikomi na etato, amo namarisio arengeo.
34Korwa ase egesaku gia Sabuloni, Abalawi abatigarete, chiamate chia Merari, bakaegwa emechie ya Yokinamu, na Karita, 35na Dimuna, na Nahalali, emechie ene, amo namarisio arengeo.
36Na korwa ase egesaku kia Reuben bakaegwa Beseri, na Yahasi, 37na Kedemoti, na Mefaati, emechie ene, amo namarisio arengeo. 38Korwa ase egesaku kia Gadi bakaegwa Ramoti o Gileadi, omochie abaiti ba mosiabano baare gotamera, na Mahanaimu, 39na Hesiboni, na Yaeseri, emechie ene, amo namarisio arengeo. 40Nabo abanto b’eamate ya Merari, abatigarete ase chiamate chi’Abalawi, baetwe emechie ikomi na ebere, buna obomera bwabagwerete.
41Emechie yonsi y’Abalawi eyarenge ase egati y’omwando bw’Abaisraeli nigo yarenge emerongo ene, na etano na etato, amo namarisio arengeo. 42Kera omochie bw’eyio nigo orenge namarisio aetanaineo, Nabo arenge ase emechie eyio yonsi.
Abaisraeli bakoira ense eria
43Ase igo Omonene akaa Abaisraeli ense eyio yonsi arierete chisokoro chiabo eira ng’a nabayee; barabwo kobayeeirwe bakamenya aroro. 44Omonene akabaa obotoereru ase chinsemo chionsi, buna arierete chisokoro chiabo eira ase ogotiana. Onde tarenge ase ababisa babo obabuete, ekiagera Omonene abegete ababisa babo bonsi ase amaboko abo. 45Nabo Omonene aikeranetie chiira chionsi chingiya echi abarierete Abaisraeli. Ende teri etaikeranetigwe.
Currently Selected:
YOSHUA 21: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
