ABAGAMBI 17
17
Omogwekano bw’ogosasimwa o Mika
1Ase ense y’ebitunwa y’Efraimu narengeo omonto oyomo ore korokwa Mika. 2Ere agatebia ng’ina, “Ekero omonto aibete chisekeli chie chifeta amagana ikomi na rimo naigure ng’a, nkwaragereretie omoibi bwe chifeta chiria. Rora aiga, ninche nchibwate. Ninche nachiirete.”
Ngi’na akamotebia, “Omwana one, Nyasae agosesenie.” 3Omomura oria akairania chisekeli chiria chie chifeta amagana ikomi na rimo ase ng’ina. Ng’ina agateba, “Naatananire chifeta echi ase Omonene ase engencho y’omwana one. Chifeta echio nachibe echi’okoroisia omogwekano bw’ogosasimwa orabe obaachire na oomire ne chifeta. Ase ayio, omwana one, ningochiiranerie.” 4Korende ere akairaneria ng’ina chibesa chiria. Ngi’na akaimokia chifeta amagana abere, agachiirera omoturi bwe chifeta, na ere akaroisia omogwekano obaachire na oomire ne chifeta. Omogwekano oyio okabekwa ase enyomba ya Mika.
5Omonto oyio Mika nabwate enyomba yaye aase arenge gosasimera ebinyasae biaye. Akaroisia egesibao ki’obokuani na emegwekano y’ogosasimwa, naende akabeka oyomo bw’abamura baye abe omokuani. 6Ase amatuko aria omoruoti tarenge ase Abaisraeli; kera omonto nigo arenge gokora kende gionsi aroche kere ekeronge.
7Bono narenge omomura omosae, Omolawi omenyete agwo Bethlehemu o Yuda buna omomenyi. 8Omosae oria konya orure Bethlehemu ogendire korigia aase akomenya. Na ase orogendo rwaye agaika ase ense y’ebitunwa y’Efraimu, ase enyomba ya Mika. 9Mika akamoboria, “Ng’ai okorwa?”
Ere akairaneria, “Inche n’Omolawi o Bethlehemu o Yuda, naende nigo nkogenda korigia aase nkomenya.”
10Mika akamotebia, “Menya aa amo nainche, obe asende tata, na obe omokuani one, na inche nkoe chisekeli chie chifeta ikomi kera omwaka, naende nkoe chianga amo nendagera.” 11Omolawi oria agancha komenya amo nomonto oria, na ere akamokora buna oyomo bw’abana baye abamura. 12Mika agaatanana omosae oria, nere akaba omokuani oye, akamenya ase enyomba ya Mika. 13Mika agateba “Bono namanyire ng’a Omonene nankorere amaya, ekiagera mbwate Omolawi ore omokuani one.”
Currently Selected:
ABAGAMBI 17: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
