ABAGAMBI 15
15
1Engaki enke ekaera, na ekero kie rigesa ri’engano kegaika, Samison akagenda gokwania mokaye, akamoirera emanwa y’embori buna ekeegwa, agateba, “Ninganetie gosoa nyomba mwa mokane.”
Korende ise biara tamoa ribaga. 2Ere agatebia Samison, “Nigo narengereretie ng’a nkwamogechete; ase ayio nkamoa omong’wansi oo, na ere akamonyuoma. Omoiseke omwabo omoke nare aa, ere nigo are omonyakieni kobua oria. Moire oyio ribaga ri’oria.”
3Korende Samison agateba, “Engaki eye tinkoba nokomocha igoro y’Abafilisti, ekero ndabakorere amabe.” 4Akagenda akabwata ebibwe amagana atato, akabisiberania bibere bibere ase ebimincha biabo, erio agasiberania ebieri bi’omorero ase egati y’ebimincha biria bibere. 5Bono agatongia omorero ase ebieri biria, agatiga ebibwe bikominyoka ase emegondo y’Abafilisti, na birobio bigasamba engano yagesire ebekire amo, amo neye konya etarageswa, na emegondo y’emezeituni egasambwa boigo. 6Ekero Abafilisti baboretie, “Ning’o okora aya?” Bagatebigwa ng’a Samison, oria onyuomete omoiseke bw’omonto o Timuna, nere okora ayio. Omonto oria o Timuna nigo aimogetie omokungu o Samison, akamoa omong’wansi oye, na ere akamonyuoma. Abafilisti bakagenda, bagasamba omokungu oria nomorero, bagasamba na ise; bonsi babere bagakwa.
7Samison agatebia Abafilisti, “Onye mogokora amang’ana anga buna aya, natianire ng’a tingotimoka goika inyeruserie egesiomba igoro yaino.” 8Akabasanyorera, akabaaka bobe mono, agaita abange. Erio agatirimboka, akagenda komenya ase rikuruma ri’egetare gi’Etamu.
Samison okobua Abafilisti
9Erio Abafilisti bagatiira, bagatoora ase ense ya Yuda, bakaumokera omochie o Lei. 10Abayuda bakababoria, “Nase ki mwachire gotorwania?”
Barabwo bakairaneria, “Nigo twachire gosiba Samison, tomokorere ere buna atokorera intwe.” 11Abayuda chilifu isato bagatirimboka gochia ase rikuruma riria ri’egetare gi’Etamu, bakaboria Samison, “Aye tomanyeti ng’a Abafilisti nabwo bagotogambera? Ase ayio, ngento ki eke gwatokoreire?”
Ere akabairaneria, “Eke bakorete asende, nakio nainche nabakoreire barabwo.”
12Barabwo bakamotebia, “Intwe nigo twachire kogosiba, erio tokobeke ase amaboko ’Abafilisti.”
Samison akabatebia, “Tiana asende ng’a inwe abanyene timokong’ita.”
13Bakamotebia, “Ee bono, titokogoita, nigo toragosibe rioka, erio tokobeke ase amaboko ’Abafilisti.” Ase ayio bakamosiba ne chingori ibere chinyia, erio bakamorusia korwa ase egetare keria.
14Ekero aigete Lei, Abafilisti bakaminyoka gochia asare, bagaaka eriogi bagokuura, na omoika bw’Omonene ogacha igoro asare, okamobeka chinguru, ne chingori echio asiberetwe amaboko chikaba buna chiusi chi’egatani chiabwatirwe nomorero, chigasansoka korwa ase amaboko aye. 15Akanyora riuga ri’orosea rw’etigere, akariimokia na ase riuga riria agaitera abanto elifu eyemo. 16Erio Samison agakwana,
“Ase riuga ri’orosea rw’etigere naitire abanto elifu eyemo, ase riuga ri’orosea rw’etigere nababekire chitui.”
17Ekero akwanire amang’ana aya agatuguta riuga riria ri’orosea. Aase aria akarokwa Ramati Lei.
18Samison akaba nerang’o y’amache enene mono, erio akarangeria Omonene, agateba, “Aye omonyene kwarua obobui goetera asende inche omosomba oo, na bono nigo ndakwe inde nerang’o, naende ngwe ase amaboko ’abanto batarogeti.” 19Nyasae akabochora engoro yarenge agwo Lei, na amache agasoka korwa agwo. Samison akanywa amache ayio, na akaigwa obeire buna omonto omoyia, akanyora chinguru. Eke nakio gekogera ensoko eria ya Lei ekarokwa Eni‐Hakore; nabo ekorokwa nonya ngoika rero iga.
20Samison akaba omogambi bw’Abaisraeli ase engaki y’emiaka emerongo ebere, ekero Abafilisti baare kogambera ense eria.
Currently Selected:
ABAGAMBI 15: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
