YAKOBO 4

Okoba omosani bw’Omonene

1Esegi na okorwana ebire ase egati yaino, ng’ai bikorwa? Inee! Tibiri korwa agwo ase okogania kwaino okobe, ogokorwana nebiimo biaino? 2Nigo mokogania, korende timori na gento; moita na koba ne ribero, korende timokonyora gento. Nigo mogokora esegi na korwana, korende timori na gento, ekiagera timori gosaba. 3Ngosaba more, ko timori koegwa, ekiagera nigo mogosaba bobe. Ayio mogosaba nigo moganetie gokorera ase okogania kwaino okobe. 4Inwe abamotari abegenwa, timomanyeti ng’a obosani bw’ense nobobisa ase Nyasae? Gaki, oyorigetie koba omosani bw’ense bwekorire koba omobisa o Nyasae. 5Gose nigo mokagete ng’a namang’ana a bosa, ekero amariko agoteba iga, “Omoika oyomenyete ime yaito nigo okogania ore ne risemi.” 6Korende obuya obo, ere atoeire, nobonge kobua. Naki amariko nigo agoteba, “Nyasae nigo akwanga abare abaenenu, korende abare abaitongo nigo akobaa obuya.” 7Gaki, mwebeke inse ase Nyasae; korende mwange Saitani, na ere nabatame. 8Moike Nyasae ang’e, na ere nabaike ang’e inwe. Inwe abanyene ebibe, mochene amaboko aino; inwe abanyene emioyo ebere, mochene chinkoro chiaino. 9Eichanie na kweng’ereria, na korera. Ogoseka kwaino koonchorwe kobe okweng’ereria, na omogoko oino obe omoichano. 10Mwekeyie ase obosio bw’Omonene, na ere nabaimokererie igoro.

Okogambia oyomino

11Abaminto, timong’achana. Oyokong’acha oyomwabo, gose komogambia nigo akong’acha amachiko na koyagambia, korende onye gokogambia amachiko, rirorio tori omokori amachiko, korende omogambia amachiko. 12Omorua amachiko na omogambia noyomo bweka, nere oranyare gotooria na gosiria. Korende aye naye ng’o okogambia omogisangio oo?

Ogokurera kw’ogotaba noboenenu

13Igwa bono inwe abamogoteba, “Rero gose ankio inatogende omochie gete, na tobeere aroro omwaka omogima na kogora, na koonia, na konyora ebitoki.” 14Inwe timomanyeti ayarache abe ankio. Obogima bwaino ninki? Naki inwe neritaturi, rikororekana ase egeka egeke, naende riasira. 15Ayamogwenerete goteba naya, “Omonene karanche, natobe moyo, naende tokore iga gose iga”. 16Korende bono iga mogwetogia ase oboenenu bwaino. Ogwetogia gwonsi konga buna okwo nokobe. 17Ase ayio, oyomanyete gokora amaya, ko tayakora, asare ere nebibe.

Currently Selected:

YAKOBO 4: EKEGUSIIBBLE

Highlight

Copy

Compare