HOSEA 8
8
Omonene okonachera Abaisraeli ekina ase engencho y’ogosasima kwabo kw’emegwekano
1“Beka egetureri monwa mokebugie! Omobisa ngocha are igoro y’enyomba y’Omonene buna ekeongo, ekiagera abanto basaririe okobwatana kwane kw’ogotianania, na batigire amachiko aane. 2Abaisraeli nigo bakorera asende, kera oyomo oteba: Aye Nyasae one, intwe Abaisraeli ntokomanyete. 3Barabwo bangire amang’ana are amaya, ase ayio ababisa mbababwatie.
4“Abaisraeli bebekeire abaruoti, batamboreti, bebekeire abagambi abwo ntamanyeti, na korwa ase chifeta ne chitahabu chiabo beroiseirie emegwekano bagosasima; ayio nigo arabarentere ogosirigwa. 5Aye Samaria, omogwekano oria bw’emori ore ase egati yao yabeire okogechia asende. Endamwamu yane nigo egwoka igoro y’abanto abwo. Ngoika ririri baragenderere koba iga bataracheneka? 6Omogwekano oyio nigo oruete ase Abaisraeli. Nigo oroisetigwe nomoroisia bw’ebinto, oyio tari oro Nyasae. Omogwekano oria bw’emori ore Samaria nosenyentwe obe ebisamunye. 7Abanto abwo babusuire embeo, mbagese ekembugu‐mbugu. Ebimeri bigokina ase emegondo yabo tibigosomoria, ase ayio tibikwama chindagera. Biise kwama, abanto b’ebisaku ebigeni mbache bachigese. 8Abaisraeli bamerirwe. Bono nigo bare ase egati y’ebisaku babarire koba buna egekorero getagwenereti kende. 9Bagendire Asuri, babeire buna etigere y’orosana ere ao yoka; ee, Abaefraimu benyoreire abanchi. 10Ee, nonya benyoreire abanto b’ebisaku ebiaao ng’a babakonye, nimbasangererie amo bwango, mbakeyie babe inse y’ogochandwa kw’omoruoti oria bw’abagambi.
11“Ekiagera Abaefraimu beagacheire ebisasimero ebinge bikogera bakore ebibe, ebio biabeire ebibe asebare. 12Nonya nare korika amachiko aane asebare ara chilifu ikomi, tibaare koyancha, korende bayabarire koba egento ekegeni asebare. 13Nigo banchete korua ebing’wanso asende, erinde barie chinyama chi’ebing’wanso ebio, korende inche Omonene timbagokereti. Bono ning’inyore okomocha kwabo mbae egesusuro ase engencho y’ebibe biabo; barabwo bairane gochia Misiri.
14“Abaisraeli bebire Omotongi obo, baagachire chinyomba chi’obonene, na Abayuda baagachire emechie emenge egiteire chindwaki, korende nindete omorero ase emechie eyio, na oro nosambe amaagacho abo bagwekengera.”
Currently Selected:
HOSEA 8: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
