ABAGALATIA 5

Chora Kristo gose amachiko

1Kristo agatosibora, erinde tomenye ase obosibore; gaki tenena bokong’u, timobwatwa naende ase obosibwa bw’obosomba.

2Igwa, inche Paulo nkobatebia nde inwe, ng’a moise kwarokigwa, rirorio Kristo takoba nengencho ende asemore. 3Naende ngotebia nde kera omonto oyokwarokigwa, ng’a rirorio osibirwe ase ogoikerania amachiko onsi. 4Mwatananirwe korwa ase Kristo, inwe abamorigetie konyora oboronge korwa ase amachiko, mwagure korwa ase obuya. 5Naki intwe ase Omoika ntoganyete oboronge boria tosemeretie ase enchera y’okwegena. 6Naki ase Kristo Yeso okwaroka tikogokonyorera kende, gose ogotaroka, korende okwegena okwo nakwo kogokora emeremo ase obwanchani. 7Nigo mwarenge kominyoka buya; ning’o obatangete timoigwera ekeene? 8Okoebereria okwo tikwarwete asare ere oyobarangeretie inwe. 9Ememera emeke nigo ekobotia ribomba rigima. 10Ase Omonene ninde nogosemeria asemore ng’a timokoba nebirengererio binde ebiao, korende ere oyokobachanda nabogorie okogambigwa kwaye, naba onde bwensi. 11Korende baminto, onye inche ngendererete nonya mbono koraria amang’ana ’okwaroka, nase ki rende nkona‐gochandwa? Igo ekegocha ki’omosalaba kiarusigwe. 12Anga nancha ng’a abwo bakobachanda begombayie abanyene.

Obosibore goika bogamberwe nobwanchani

13Inwe abaminto, nigo mwarangeretigwe monyore obosibore; korende ogosiborwa kwaino tikoba ogw’okobwatia chingencho chiaino chi’ebibe, mbuya mokorerane inwe ase inwe ase obwanchani. 14Naki amachiko onsi aikeranigwe ase ring’ana erimo, na rirorio nario eri, “Mwanche omogisangio oo buna bweanchete.” 15Korende kerabe mokoromana na koriana, rigereria timocha gosirania inwe ase inwe.

Okwama kw’Omoika na ogokora gwe chingencho chi’ebibe

16Gaki nigo nkobatebia, mogenderere ase Omoika na timogoikerania okogania gwe chingencho chiaino chi’ebibe. 17Naki okogania gwe chingencho chi’ebibe nigo gokoamererania n’Omoika na okogania kw’Omoika nigo gokoamererania ne chingencho chi’ebibe; naki ebi iga bikorwana goika timokonyara gokora ayamorigetie gokora. 18Korende komokoraagwa n’Omoika, rirorio timori inse y’amachiko. 19Ogokora gwe chingencho chi’ebibe nigo kore maiso marore na korokwo nobotomani, eubi, obonyaka, 20ogosasima emegwekano, oborogi, obobisa, eriomana, ribero, endamwamu, obong’iti, okwerusanania, ogweatanana, 21emoko, oboiti, ogotinda, chigosori chimbe, na amang’ana ande buna ayio. Nabakureire buna narenge kobakurera ritang’ani, ng’a abwo bagokora amang’ana anga buna ayio, tibakonyora omwando bw’oboruoti bwa Nyasae. 22Korende okwama kw’Omoika nobwanchani, omogoko, omorembe, oboremereria, obwororo, obuya, obwegenwa, 23oboitongo, okwerita ase onsi; machiko ande tari arange amang’ana buna ayio. 24Abwo bare aba Kristo Yeso babambire chingencho chiabo chi’ebibe amo nokogania okobe na okorengereria kwabo.

25Onye intwe twabeire moyo ase Omoika, togenderere boigo ase Omoika. 26Titoba nokogania kw’ogwetogia abanyene, titochegania, gose koba nemoko intwe ase intwe.

Currently Selected:

ABAGALATIA 5: EKEGUSIIBBLE

Highlight

Copy