ABAGALATIA 3

Amachiko gose okwegena

1Inwe Abagalatia abariri! Ning’o obarogete inwe ase amaiso aino Yeso Kristo oorogetigwe buna abambetwe? 2Tiga mbaborie ring’ana eri rioka: Igo mwanyorete Omoika ase ogokora kw’amachiko, gose ase okwegena goetera ase okoigwa? 3Nabo more abariri buna iga? Mogachaka ase Omoika, na bono morigetie goikeranigwa ase chingencho chiaino abanyene? 4Inee! Igo mwanarete emechando emenge enga buna eye bosa? Aande gose tiyarenge bosa. 5Ere oyokobaa inwe Omoika na gokora ebikone bie chinguru egati yaino, Inee, igo agokora ayio ase ogokora kw’amachiko gose ase okwegena goetera ase okoigwa?

6Nabo “Ibrahimu nigo amwegenete Nyasae, na ase engencho eyio akabarwa koba omonyene oboronge.” 7Gaki manya iga, ng’a baria bare nokwegena, abwo nabwo bare abana ba Ibrahimu. 8Korende ayio amariko aroche korwa kare, ng’a Nyasae nae abanto b’Ebisaku oboronge ase okwegena. Ase ayio akaranderia Ibrahimu enchili kare, akabora, “Asore aye abanto b’ebisaku bionsi nabasesenigwe.” 9Naboigo abwo bare nokwegena mbasesenirie amo na Ibrahimu oyorenge omwegeni.

10Naki baria bonsi basemeretie ogokora kw’amachiko, nigo bare inse y’okoragererigwa, ekiagera nerikire, “Kera omonto oyotari kobwata onsi ayarikire ase ebuku y’amachiko na koyakora oragererigwe.” 11Bono nigo are maiso marore, ng’a onde tari oranyore oboronge ase obosio bwa Nyasae ase amachiko; ekiagera nigo arikire, “Omonyene oboronge nabe moyo ase okwegena.” 12Amachiko nigo are ao ase okwegena, ekiagera nigo arikire, “Omonto oyorakore ayio nabe moyo ase aro.” 13Kristo natobooretie korwa ase okoragererigwa kw’amachiko, ekero akoretwe koba okoragererigwa ase engencho yaito, ekiagera nerikire, “Kera omonto oyobambirwe igoro ase omote oragererigwe.” 14Igo ogosesenigwa okwo Ibrahimu anyorete goikera abanto b’Ebisaku goetera ase Kristo Yeso, erinde tonyare konyora Omoika ase enchera y’okwegena, buna twarieretwe eira.

Amachiko na Eira

15Abaminto, ngokwana nde buna engencho ya mwanyabanto ere. Ekero okoriera kw’omwando bw’omonto kogoikerana, onde tari oranyare gokoonchora gose komenta ring’ana. 16Chiira chiria chiarieretwe Ibrahimu na omoiborwa oye. Takwanetwe, “Ase oroiboro” buna nase abange; korende eira iga erengete ase oyomo, “Ase omoiborwa oo”, nere Kristo. 17Aya ngokwana naya: Okobwatana koria gwakoretwe ritang’ani na Nyasae; na amachiko aria akarentwa nyuma y’emiaka amagana ane, na emerongo etato, tagosaria okobwatana koria, erinde eira eria ebe eya bosa. 18Naki omwando korabe ase amachiko, tokoba naende ase eira; korende Nyasae akayoa Ibrahimu ase eira.

Emeremo y’amachiko

19Amachiko rende, inki agwenete? Akamentwa ase engencho y’amamocho, goika omoiborwa oria orieretwe eira anyare gocha. Amachiko aria nigo aruetwe goetera ase abamalaika ase okoboko kw’omobwatania. 20Oyore omobwatania tari omobwatania ase oyomo, korende Nyasae noyomo.

21Inee! Amachiko nigo are mamincha e chiira chia Nyasae? Yaya, taibo! Naki onye amachiko aruetwe ayaranyare koa abanto obogima, anga oboronge nigo bwanyorekanete ase amachiko. 22Korende amariko asiekeire bonsi inse y’okobua kw’ebibe, erinde abegenire baegwe ayio ariereretwe eira ase enchera y’okomwegena Yeso Kristo.

23Korende ekero okwegena gotaracha, nigo twabwatire inse y’amachiko, twasibire goika okwegena goche koorokigwa. 24Naboigo amachiko abeire omotebereria oito agotoira goika ase Kristo, erinde tonyore oboronge ase okwegena.

Egekonyorekana ase okwegena

25Korende bono okwegena kogwachire, titori naende inse y’omotebereria. 26Naki ime ase Kristo Yeso inwe mwensi mwabeire abana ba Nyasae ase enchera y’okwegena. 27Ekiagera inwe mwensi, abamwabatisetwe ase Kristo, mwamweboire Kristo. 28Aiga tari Omoyahudi gose Omogiriki, tari omosomba gose omosibore, tari omosacha gose omokungu, ekiagera inwe mwensi nigo more oyomo ime ase Kristo Yeso. 29Naki onye inwe naba Kristo, rirorio mwabeire oroiboro rwa Ibrahimu, na abanyamwando ase eira.

Currently Selected:

ABAGALATIA 3: EKEGUSIIBBLE

Highlight

Copy