EKEKIELI6 44
44
Amang’ana igoro y’egeita kia moocha
1Erio omonto oria akang’ira gochia ase egeita gia isiko kiarenge ensemo ya moocha ye Hekalu; egeita ekio nigo giasiekire. 2Omonene agantebia, “Egeita eke nigo keragenderere gosiekwa, tigekoigorwa rinde, na monto onde tagosoera aroro, ekiagera aiga nao Omonene, Nyasae bw’Abaisraeli, asoerete ime. Ase ayio goika kegenderere gosiekwa. 3Omogambi bweka nere oraikaranseo ariere endagera ase obosio bw’Omonene. Nigo arasoere goetera gesona ki’oboagacho bore geita, naende asokere enchera eyio eyio.”
Amachiko ay’ogosoa ase Hekalu
4Naende akang’ira, akang’eteria ase egeita gia sugusu, bosio bwe Hekalu; nkarigereria nkarora obonene bw’Omonene bwaichoire ase enyomba y’Omonene. Agwo ngatung’ama inse nkaumama. 5Erio Omonene agantebia, “Aye mwanyabanto, rengereria mono, origererie namaiso ao, na oigwe namato ao amang’ana onsi ngochia kogotebia igoro y’emeroberio echikire ase enyomba y’Omonene, na amachiko onsi igoro y’enyomba eye. Origererie mono buna abanto baranyare gosoa ase enyomba y’Omonene na buna baranyare gosoka.
6“Otebie abanto b’egesaku ki’Abaisraeli, abwo bare abasaria, ng’a aya naro inche Omonene Nyasae ngoteba: Inwe Abaisraeli, tiga ogokora kwaino gw’okogechia goisanere agwo. 7Inwe mwarentire ime ase enyomba yane enchenu abanto b’ebisaku ebigeni abatarogeti ase chinkoro chiabo, na ase emebere yabo, kobeera ime ase enyomba yane na mwayekorire yabeire eyetachenegeti, ekero mokorua asende okoruegwa kw’endagera, na ebitinya, na amanyinga. Inwe mwasaririe okobwatana kwane kw’ogotianania, boigo mwakorire ogokora konde gwonsi gw’okogechia. 8Inwe abanyene timobeti mogokorera ebinto biane ebichenu, korende mwabekire abanto abaao bakaba bakobikorera ase enyomba yane enchenu ribaga riaino.
9“Ase ayio, aya naro inche Omonene Nyasae ngoteba: Omonto onde bwensi bw’egesaku ekegeni otarogeti ase enkoro, na ase omobere, ore ase egati y’Abaisraeli, tabaisa gosoa ase enyomba yane enchenu.
Abalawi bakorusigwa ase obokuani bwabo
10“Abalawi abwo baruete asende bagantiga, bakagenda gosasima emegwekano yabo, ekero Abaisraeli bande basaretie; egesusuro ki’ogosaria kwabo nkebairanere. 11Nabo baranyare gokora emeremo ase enyomba yane enchenu, naende bagenderere korenda ebiita bi’enyomba yane na gokora emeremo ende ase enyomba eyio; mbabe bakonyenya ebing’wanso bi’ogosambwa, na ebing’wanso binde ase engencho y’abanto, mbabe bagotenena ase amasio abo kobakorera. 12Ekiagera abakuani abwo batenenete ase amasio ’abanto gokorera emegwekano yabo bagosasima, na igo bakaba ekegocha ase Abaisraeli, bakagera barabwo bagakora ebibe, ase ayio inche Omonene Nyasae natianire ng’a egesusuro ki’ogosaria kwabo goika kebairanere. 13Tibagocha ang’e ase ebinto biane ebichenu, gose ase ebio bire ebichenu mono. Goika berorere obosooku bw’ogokora kwabo gw’okogechia okwo babeire bagokora. 14Korende nimbabeke babe abarendi be Hekalu, babe bagokora emeremo ende yonsi eganeirie aroro.
Abakuani
15“Korende abakuani Abalawi, abwo b’ororeria rwa Zadoki, abwo bagendererete gonkorera ase enyomba yane enchenu, ekero Abaisraeli bande basaretie bagantiga, barabwo mbache ang’e nainche bankorere, mbabe bagotenena ase obosio bwane banduere ebitinya na amanyinga. Nabo Omonene Nyasae atebire. 16Barabwo mbasoe ase enyomba yane enchenu, bache ang’e nemesa yane bankorere, naende bagenderere korenda amang’ana aane nachikire. 17Ekero barabe bagosoa ase ebiita bigosoerwa ase eraaro ya ime, babeke chianga chiroisirie korwa ase egatani. Tibabaisa kobeka chianga chiroisirie korwa ase amarionya, ekero bagendererete gokora emeremo agwo ase amaagacho are egeita kegosoerwa ase eraaro ya ime, na ime ase enyomba. 18Barabwo mbabeke ase emetwe yabo ebitambaa biroisirie korwa ase egatani, naende babeke chisirwari chi’egatani; tibakweboeria kende gionsi keragere bagiramore. 19Ekero batarasoka gochia ase abanto bare ase eraaro ya isiko goika barusie chianga echio chi’obokoreri, bachitige agwo ase ebinyomba biria ebichenu, na babeke chianga ching’ao. Batakoreti bo, nigo barabaise gochena abanto ne chianga echio chiabo.
20“Abakuani abwo tibagokigita chitukia chi’emetwe yabo, gose tibagochitiga chitambee, korende nigo barachinache chieng’ee. 21Omokuani onde bwensi takonywa edivai ekero agochia gosoa ase eraaro ya ime. 22Ere takonyuoma omokungu omoboraka, gose oyotiganire nomosacha oye, korende nanyare konyuoma omoiseke omwekungi bw’ororeria rw’Abaisraeli, gose nabo aranyare konyuoma omokungu omoboraka bw’omokuani.
23“Barabwo mborokererie abanto baane bamanye gwatanana ebinto bire ebichenu na ebitaatananiri koba ebichenu, naende baborokererie bamanye gwatanana ebinto bichenegete na ebitachenegeti. 24Ekero amariomana are ase abanto, abakuani mbabe abagambi b’ebina, mbabe bakogamba ebina ase okobwatia oboronge bwane. Mbarende emeroberio yane echikire, na amachiko aane ay’Amatuko Amanene. Boigo mbarende Chisabato chiane chibe chinchenu.
25“Omokuani tabaisa gwesoyia ase ogotacheneka ase ogokuna egetondo ki’omonto okure. Nare ne ribaga gwesoyia ase ogotacheneka ase abanto aba: ise, na ng’ina, na omwana oye, omomura gose omoiseke, na momura omwabo, na moiseke omwabo oyotaraba nomosacha. 26Ekero omokuani oyio achenirwe nabarerwe amatuko atano na abere. 27Ase rituko riria arasoe ase eraaro ya ime ase obokoreri bwaye agwo Aase Aachenu, goika arue ekeng’wanso kiaye ki’ebibe. Nabo Omonene Nyasae atebire.
28“Omwando obo nigo orabe iga: Ninche omonyene inde omwando obo. Timokobaa enibo ende yonsi, ekiagera ninche omonyene inde enibo yabo. 29Barabwo mbabe bakoria okoruegwa kw’endagera, na ebing’wanso bi’ebibe, na ebi’okomocha, na kera egento keraatananwe na gokungwa asende korwa ase egati y’Abaisraeli nkebe eki’abakuani. 30Moe abakuani okwama kwaino ogotang’ani gwa kera egento; boigo mobae okorua kwaino, na obosie bw’ogotongora kwaino. Erio nario ogosesenigwa koragenderere koba ase chinyomba chiaino. 31Abakuani tibabaisa koria enyama ende yonsi y’enyoni gose ey’eng’iti ekwete yoka enyene, gose eitire ne ching’iti chinde.
Currently Selected:
EKEKIELI6 44: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
