OMORANDIA 8
8
1Ning’o onga buna omonto omong’aini? Ning’o omanyete engencho y’amang’ana? Obong’aini nigo bogokora obosio bw’omonto bwagirigenta, nigo bokoonchora obokong’u bw’okororekana kwaye.
Igwera Omoruoti
2Inche nigo nkogosemia: Oigwere amang’ana omoruoti achikire, ekiagera nkwarierete Nyasae eira. 3Toayerera gotiga obokoreri ase obosio bwaye, na tobwatana nogokora okobe, ekiagera ere nigo agokora onsi ayanchete. 4Ring’ana ri’omoruoti nigo rire nokobua. Ning’o oranyare komotebia, “Aye ngento ki eke ogokora?” 5Omonto okoigwera amachiko takonyorwa namabe, na enkoro y’omonto omong’aini nigo ekomanya engaki na enchera y’okonacha boronge. 6Kera ring’ana ndibwate engaki yaye na enchera yaye y’okonacha boronge, na emechando y’omonto nigo ekomoritoera. 7Omonto tamanyeti ayagochia koba, na ning’o oranyare komotebia buna amang’ana arabe? 8Monto onde tari obwate okobua igoro y’omoika, gose igoro ye rituko ri’ogokwa kwaye; ogotooreka tikori ase esegi, gose obobe tibogotooria abwo bakobokora.
Ababe na abaronge
9Ayio onsi nigo nayaroche ekero nabegete ebirengererio biane kwegera aya onsi agokorwa aiga inse y’erioba, ekero omonto oyomo akogambera omonto onde na komokorera bobe ase okomochanda. 10Nkarora abakori amabe batindekirwe batimogete, na abwo baare gokora ayare boronge barure ase Obomenyo bw’Oyore Omochenu, bakebwa ase omochie. Ayio boigo mbosa.
11Mwanyabanto nigo bakwerua ase chinkoro chiabo gokora ayare amabe, ekiagera ebibe tibiri konacherwa ekina bwango. 12Omonyabibe nakora ebibe ara rigana, naende agenderere koba moyo ase engaki entambe; nonya naboigo, nimanyete ng’a nigo erabe buya ase abwo bamoirogete Nyasae, ekiagera bamoirogete. 13Korende abakori amabe tibakonyora amaya ayio, gose obogima bwabo tibokoba obotambe. Nigo banga buna omorengari ogoeta, ekiagera tibamoirogete Nyasae. 14Nare amang’ana a bosa kegima agokorekana aiga ase ense; mbareo abanto abanyaboronge bakonyorwa negesusuro ki’ogokora kw’abanyabibe, na boigo abanyabibe banyora obuya bw’ogokora kw’abanyaboronge. Ase ayio ngateba, “Ayio boigo mbosa.”
15Ngatogia omogoko, na nkarora ng’a mwanyabanto tabwati gento kende kere ekiya aiga inse y’erioba, otatiga arie na anywe, na kwegokia nayio. Ayio naro aranyare kobeera asare ekero agendererete gokora emeremo emekong’u ase obogima obo are moyo, obo Nyasae amoeire aiga inse y’erioba.
16Ekero nabegete ebirengererio biane komanya obong’aini na korora emeremo emekong’u abanto bagokora aiga ase ense, batari korara chitoro omobaso gose obotuko. 17Erio nkarora ng’a omonto takonyara komanya emeremo ende yonsi ya Nyasae egokorekana aiga inse y’erioba. Omonto naisa gwechanda mono ase okorigia koyemanya, takonyara koyemanya. Nonya omonto omong’aini ogoteba ng’a namanyete, takonyara koyemanya.
Currently Selected:
OMORANDIA 8: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
