AMOSI 2
2
Moabu
1Aya naro Omonene atebire: “Ase engencho y’ogosaria kw’abanto ba Moabu ara gatato, ee, ara kane, tingotanga egesusuro tikebanyora. Barabwo nigo basambete amauga ’omoruoti o Edomu akaba ribu. 2Ase ayio nintome omorero ase ense ya Moabu; oro nosambe osirie chinyomba chinkong’u chia Kerioti. Abamoabu mbakwe ase ebikuuro bi’esegi, na ase eriogi ri’ebitureri bi’esegi. 3Ninsirie omogambi ebina korwa ase egati yabo, nimoite amo nabagambi b’aroro.” Nabo Omonene atebire.
Yuda
4Aya naro Omonene atebire: “Ase engencho y’ogosaria kw’Abayuda ara gatato, ee, ara kane, tingotanga egesusuro tikebanyora. Barabwo nigo bachayete amachiko ’Omonene, gose tibabwatete emeroberio yaye echikire, korende amang’ana ’obong’ainereria bwabo, ayio chisokoro chiabo chiarenge kobwatia abasiririe. 5Ase ayio nintome omorero ase ense y’Abayuda; oro nosambe osirie chinyomba chinkong’u chia Yerusalemu.”
Nyasae okonachera Abaisraeli ekina
6Aya naro Omonene atebire: “Ase engencho y’ogosaria kw’Abaisraeli ara gatato, ee, ara kane, tingotanga egesusuro tikebanyora. Barabwo nigo baoonetie omonyene oboronge ase rigori ri’efeta, na omotaka bakamoonia ase rigori ri’ebikoroto bibere. 7Abanto abwo nigo bagotiringera emetwe y’abataka ase orotu rw’ense, naende nigo bagokorekania amang’ana ’omonto omoitongo. Omomura na ise nigo bagokora obonyaka nomoiseke oyomo, na igo bakora erieta riane riaba eritachenegeti. 8Mbarabare ase kera egesasimero barabwo nigo bakorara inse igoro ye chianga chikobekwa kebwaterero. Ase enyomba y’enyasae yabo banywa edivai y’abwo bagambetigwe bakarusigwa chibesa.
9“Korende ase engencho y’Abaisraeli, inche Omonene ngasiria Abaamori abwo barenge abatambe buna emecharake, naende abakong’u buna omote onga buna omotontera. Nigo nasiretie amatunda abo, ngasimora nemeri yabo yonsi. 10Ninche nabarusetie inwe korwa ase ense ya Misiri, erio nkabaraa ase erooro ase engaki y’emiaka emerongo ene, na inwe mokaira ense y’Abaamori ekaba eyaino. 11Erio ngachora abana baino bande bakaba ababani, na abamura bande nkabaatanana bakaba Aberwa baane. Inwe Abaisraeli, Inee, amang’ana ayio tari bo are?” Nabo Omonene atebire. 12“Korende inwe mokaa Aberwa abwo beritete edivai bakanywa, mogakania ababani tibabana. 13Rora nimbaritoere gochia inse buna egari eichire chigurube ekoritoerwa. 14Ekero ekio abanto bamanyete kominyoka chimbero, mbasinywe gotama, na abwo bare ne chinguru, mbaborwe chinguru, na abarwani esegi bare chituoni, tibagotooria obogima bwabo. 15Omonto omanyete koruta chinsara, tagotenena arwane, gose oyomanyete kominyoka chimbero, tagwetooria, na omoriini ebarasi tagwetooria. 16Ase rituko erio omonto ore omoremu mono ase egati y’abarwani chituoni, natame ore getirianda.” Nabo Omonene atebire.
Currently Selected:
AMOSI 2: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
