2 SAMWELI 9
9
Daudi na Mefiboseti
1Rituko erimo Daudi akaboria, “Inee! Monto onde natigarete ase enka ya Saulo inyare komokorera amaya ase engencho ya Yonathani?”
2Narengeo omosomba oyomo bw’enyomba ya Saulo, orenge korokwa Siba. Abanto bakamorangeria agende ase Daudi. Omoruoti akamoboria, “Naye Siba?”
Ere akamoiraneria, “Ee, ninche omosomba oo.” 3Naende omoruoti akamoboria, “Inee! Monto onde natigarete ase enka ya Saulo inyare komokorera obuya bwa Nyasae?”
Siba akamoiraneria, “Ee, nareo omonto oyomo, mosinto o Yonathani, ore ekerema.” 4Omoruoti akamoboria, “Ng’ai akare?”
Siba akamoiraneria, “Nigo akare o Makiri, mosinto bw’Amieli, aaria Lo‐Debari.” 5Erio omoruoti agatoma abanto bagachia komwoyia korwa o Makiri, mosinto bw’Amieli, aaria Lo‐Debari.
6Ekero Mefiboseti, mosinto o Yonathani o Saulo, achete ase Daudi, agatung’ama inse, akaumama ase okoorokia amasikani.
Daudi akabora, “Mefiboseti.”
Ere agaitaba, “Nao inde aa, inche omosomba oo!” 7Daudi akamotebia, “Toondoka, ekiagera ningokorere amaya ase engencho ya Yonathani iso. Ninkoiranerie emegondo yonsi ya Saulo, sokoro yao, naye nobe gokoragera ase emesa yane botambe.”
8Mefiboseti agatung’ama inse naende, akabora, “Inche inde buna esese ekwete. Ninki ing’isaine orankorere amaya buna ayio?”
9Erio omoruoti akarangeria Siba, omosomba o Saulo, akamotebia, “Ebinto bionsi ebiarenge bia Saulo, na bionsi ebia nyomba mwaye, nabieire omochokoro bw’omonene oo. 10Aye, amo nabana bao na abasomba bao mobe mokomoremera emegondo. Norentere omochokoro bw’omonene oo okwama korwa mogondo, erinde anyore endagera, korende Mefiboseti omonyene, omochokoro bw’omonene oo, nigo arabe okoragera ase emesa yane botambe.” Siba nigo abwate abamura ikomi na batano na abasomba emerongo ebere.
11Erio Siba akairaneria omoruoti, “Inche omosomba oo ninkore ayio onsi gwachikire.” Ase igo Mefiboseti akaba okoragera ase emesa ya Daudi, akaba buna oyomo bw’abana b’omoruoti. 12Mefiboseti nabwate omwana omomura ore korokwa Mika. Abanto bonsi abarenge o Siba bakaba abasomba ba Mefiboseti. 13Mefiboseti akaba okomenya Yerusalemu, ekiagera nigo arenge koragera ase emesa y’omoruoti. Ere nigo aremarete amagoro aye onsi abere.
Currently Selected:
2 SAMWELI 9: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
