2 SAMWELI 12
12
Amang’ana a Nathani na okweitia gwa Daudi
1Erio Omonene agatoma Nathani ase Daudi. Nathani akagenda asare, akamotebia, “Abanto babere mbamenyete ase omochie gete, oyomo obo igo arenge omonda, na oria onde nomotaka. 2Oria omonda nigo abwate ching’ondi ne chiombe chinyinge mono. 3Korende oria omotaka tarenge na gento, otatiga abwate akamanwa agasigiti, akwo agorete ng’a atuge. Akamanwa akwo gakaba gakomenya inka amo nabana baye, gakaba gakoria endagera abwate na konywera korwa ase egekombe kiaye. Nigo kanarete korara ase egekuba kiaye, gakaba asare buna omwana oye omoiseke. 4Omogeni agacha bw’omonto oria omonda, na ere tanchete komonyenyera embori gose eng’ondi korwa ase riicho riaye, korende akaira akamanwa karia k’eng’ondi k’omotaka oria, erio agakanyenyerao mogeni oye.”
5Bono Daudi akaba nendamwamu enene ase engencho y’omonda oria, agatebia Nathani, “Ekeene, buna Omonene are moyo, omonto oyio okorete amang’ana ayio goika akwe. 6Ere goika amoiranerie akamanwa karia ara kane, ekiagera akora ring’ana erio, na ekiagera atabwate amabera.”
7Agwo Nathani agatebia Daudi, “Naye omonto oria. Omonene, Nyasae bw’Abaisraeli, nigo agoteba iga: Inche nakoagete amaguta okaba omoruoti igoro y’Abaisraeli, nkagotooria korwa ase okoboko gwa Saulo. 8Ngakoa abanto bonsi b’omonene oo, nkabeka abakungu baye ase amaboko ao. Ngakoa n’Abaisraeli na Abayuda. Onye ayio namake arenge, nabo naare gokomenta ayande amange kobua. 9Nase ki gwachayire ring’ana riane inche Omonene, na gwakorire amabe ase obosio bwane? Gwaitire Uria Omohiti; okamorua, na Abaamoni bakamoita nomoro, naende kwairire mokaye koba mokao. 10Bono omoro tokorua ase ororeria rwao, ekiagera gwanchayire, kwairire moka Uria akaba mokao. 11Ee, Omonene otebire iga: Ningotubokerie obobe korwa ase enyomba yao; nkoure abakungu bao, mbae omonto omoao, nere arare nabarabwo maiso marore. 12Aye nigo gwakorire ebibe ebio bobisi, korende inche nigo ndakoe egesusuro ekio maiso marore ase Abaisraeli bonsi baroche.”
13Daudi agatebia Nathani, “Nakoreire Omonene ebibe.”
Nathani akamoiraneria, “Omonene okwabeire ebibe biao; togokwa. 14Korende ekiagera gwakorire ayio kwagerire ababisa b’Omonene bamochaye, omwana oria oraiborwe goika akwe.” 15Erio Nathani akagenda bwoye.
Omwana o Daudi ogokwa
Omonene akarenta oborwaire ase omwana oria moka Uria aiborerete Daudi, na omwana oria akanyareka mono. 16Agwo Daudi agasaba Nyasae ng’a omwana agwene, akeng’ata, akagenda nyomba akarara inse ase obotuko obogima. 17Na abagaaka b’enyomba yaye bagacha bamoimokie korwa agwo inse, korende ere tancha, nonya nokoragera, taria amo nabarabwo. 18Ase rituko ria gatano na kabere omwana oria agakwa. Abasomba ba Daudi bakoboa komotebia ng’a omwana okure, naki nigo batebete, “Ekero omwana arenge moyo, togachia gokwana nere, korende tanchete gotoigwa. Naki rende toranyare komotebia ng’a omwana okure? Nigo arabaise gwekora bobe.”
19Korende Daudi akarora abasomba baye bakona‐komonyererana, akamanya ng’a omwana okure. Ase igo Daudi akababoria, “Inee! Omwana nakure?”
Bakamoiraneria, “Ee, okure.”
20Daudi akaimoka korwa inse agesibia, ageaka amaguta, akaonchoreria chianga chiaye; agasoa ase enyomba y’Omonene agasasima. Erio akairana bwoye, akaboria endagera, akaegwa akaria. 21Abasomba baye bakamotebia, “Ing’ana ki eri gwakora? Ekero omwana arenge moyo okeng’ata na korera korende bono omwana gakure, kwaimokire kwarageire.”
22Akabairaneria, “Ee, ekero omwana arenge moyo, nabo neng’atete na korera, nigo narengereretie ng’a ande Omonene nandorere amabera, erinde omwana abe moyo. 23Korende bono okure, nase ki rende ndeng’ate? Inee! Ninyare komoirania abe moyo? Ninche ndagende aase agenda, korende ere takoirana asende.”
Sulemani okoiborwa
24Erio Daudi akaba okoremia Batiseba mokaye; akaba nere, na ere akaibora omwana omoisia, na Daudi akamoroka Sulemani. Na Omonene akaba bwanchete omwana oria, 25agatoma amang’ana ase Nathani omobani, na ere akaroka omwana oria Yedidia,#12:25 yedidia, engencho yaye: oyobwanchire na Nyasae ase engencho y’Omonene.
Daudi okobua omochie o Raba
(1 Am ’Eb 20:1–3)
26Yoabu akarwania Raba bw’Abaamoni, akaira ensemo y’omochie eyarenge y’omoruoti. 27Erio Yoabu agatoma abanto gochia ase Daudi komotebia, “Narwanirie Raba, nabwatire ensemo y’omochie ase amache aochaine.
28“Gaki bono sangereria abanto abwo batigarete oetanane omochie, aye omonyene oyoire, inche timbaisa koyoira na igo orokwe ase erieta riane.” 29Ase igo Daudi agasangereria abanto bonsi, akagenda Raba, akayorwania, akayobua na koyoira. 30Erio akarusia egutwa y’etahabu korwa ase omotwe bw’omoruoti bw’aroro. Oborito bw’egutwa eria nigo bwarenge koreng’ana chikiro emerongo etato na inye naende nigo yachabeire amagena e rigori rinene. Egutwa eyio ekabekerwa Daudi ase omotwe oye igoro. Ere agasakora ebinto ebinge mono bi’omochie oria: 31agasokia abanto barenge ase omochie ime, akabanachana ne chinseke, amo nebikombe bi’ebioma na ebisire, akabaetia ase amariko are gosamba amatabori. Naboigo akorete abanto b’emechie yonsi y’Abaamoni.
Erio Daudi akairana Yerusalemu amo nabanto bonsi.
Currently Selected:
2 SAMWELI 12: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
