2 ABAKORINTO 11

Ribaga ria Paulo buna omotomwa

1Anga yaba buya onye mwandemereria ake ase oboriri bwane. Ee, namanyire ng’a mondemererie. 2Naki nabaroreire ribero, na eri neribero ria Nyasae; naki nabariereire boko ase omosacha oyomo, erinde nyare kobarenta buna omoiseke omwekungi omochenu ase Kristo. 3Korende nairokire ng’a buna eng’iti eria, ase obong’ainereria bwaye, yang’ainete Hawa, naboigo ebirengererio biaino birasareke, na mobaise gotiga obwegenwa bwaino bw’ekeene more nabwo ase Kristo. 4Naki onye omonto ogocha okorandia Yeso onde omoao, otatiga oyo twarandetie intwe, gose mwanche omoika onde omoao oyomotanyorete, gose enchili ende eng’ao eyemotanchete, igo moremereretie buya nayio. 5Naki igo nkagete ng’a inche tindemeiri gento eki abatomwa baria abanene bare nakio. 6Nonya timanyeti gokwana buya, korende obong’aini nimbwate, na ase kera enchera twaorokirie amang’ana onsi asemore.

7Inee! Nebibe nakorire ase okweirania inse, erio mokinigwe, ekiagera nabarandeirie enchili ya Nyasae ntari neng’eria? 8Naurire abanto be chikanisa chinde enibo yabo ase okorusia eng’eria yane asebare, erinde mbakorere inwe. 9Inche ekero narenge amo nainwe ekero naremeretwe, timoraarereti monto onde, ekiagera abaminto bagachia gocha korwa Makedonia bagankonya ase okoremerwa kwane. Ase amang’ana onsi nkerenda inche omonyene timbaraarereria nonya ng’ake, naende ningenderere gokora bo. 10Naende buna ekeene gia Kristo kere ime asende, omonto tari oranyare gontanga ase ogwetogia okwo ase chinsemo chi’Akaya. 11Nase ki? Ekiagera ntabancheti inwe? Nyasae namanyete ng’a nimbanchete.

12Korende eri ngokora, ningenderere korikora, erinde mbatange abakorigia ribaga tibanyora ribaga ri’ogwetogia barorekane koba buna intwe tore. 13Naki abwo nabatomwa b’oborimo, bagokora emeremo ase obong’ainereria, bakweonchora babe omogwekano bw’abatomwa ba Kristo. 14Nabo tari ogokumia, ekiagera Saitani omonyene nigo akweonchora bwekora buna omomalaika bw’omobaso. 15Ase ayio tari ring’ana rigeni ng’a abasomba baye nabarabwo bakweonchora bekora buna abasomba b’oboronge. Omoerio obo nobe koreng’ana nemeremo yabo.

Okogwekania egati ya Paulo na abamosoeri

16Nakwanire naende, omonto takaga ng’a inche nomoriri inde; korende namonkagera bo, monyanche buna omonto omoriri, erinde nainche boigo ninyare gwetogia ake. 17(Eri ngokwana tindi korikwana ase okobua kw’Omonene, korende buna omoriri ase oboremu obo bw’ogwetogia 18ekiagera abange bagwetogia ase engencho yabo abanyene, na inche boigo ninyetogie). 19Inwe, ekiagera more nobong’aini, nigo mokoremereria nabariri ase omogoko. 20Naki iga mokoremereria nomonto, karabakore mobe abasomba, kararie ebiaino, abasakore, kareimokererie igoro, karabaake inwe ase obosio. 21Ase obosooku bwane nigo ngokwana ng’a nigo twarenge abareu ase ogokora amang’ana aya.

Emechando ya Paulo na obokong’u bwaye

Korende onye omonto ore noboremu bw’ogwetogia ase rinde rionsi (nakwanire ase oboriri), na inche ninde noboremu boigo bw’ogwetogia. 22Barabwo n’Abaibirania? Nainche boigo. Barabwo n’Abaisraeli? Nainche boigo. Barabwo noroiboro rwa Ibrahimu? Nainche boigo. 23Inee! Barabwo nabasomba ba Kristo? (Bono nigo ngokwana buna ebarimo). Inche mbuya kobua; ase emeremo kobua mono, ase ogosibwa kobua mono, ase ogoakwa goetania ekerengo, ang’e namakweri ebiro ebinge. 24Ase Abayahudi ara gatano nkanyora ogoakwa emerongo ene otatiga okomo. 25Ara gatato ngaakwa chinyimbo, erimo ngaakwa amagena. Ara gatato ngasarekerwa nemeeri, obotuko obomo na omobaso oyomo ngaikaransa igoro y’endiba; 26nkaba ase orogendo ekero ase ekero, ase emechando ye chindooche, ase ogochandwa nabauri, ase ogochandwa neamate yane, ase ogochandwa nabanto b’Ebisaku, ase emechando emechie ime, ase emechando y’erooro, ase emechando y’enyancha, ase ogochandwa nabaminto b’oborimo; 27ase emeremo na obokong’u, ase okogeesa ara aange, ase enchara na erang’o, ase ogotanyora endagera ara aange, ase embeo na ase okoba getirianda. 28Kobua ase amang’ana onsi ayare korwa isiko naro okorigereria gwe chikanisa chionsi, ayare gonchichera kera rituko. 29Ning’o ore omoreu, na inche timba omoreu? Ning’o ogerire ogwe, na inche tingechigwa?

30Onye ngwenerete gwetogia, ninyetogerie amang’ana ’oboreu bwane. 31Nyasae, Ise Omonene Yeso, oyorabakwe goika kare na kare, omanyire ng’a tindi gokwana oborimo. 32Aaria Damesiki gavuna, oyorenge inse y’omoruoti Areta, nigo arenge korenda omochie o Damesiki, akarigia kombwata. 33Korende nkabekwa ase egetonga ime, ngaikerigwa ase ekebao ase orwaki, ngatooreka korwa ase amaboko aye.

Currently Selected:

2 ABAKORINTO 11: EKEGUSIIBBLE

Highlight

Copy